ၼႂ်း ဝၼ်းတီႈ 11 ထိုင် 17 ၽွင်းၶၢဝ်းသွၼ်းၼမ်ႉ ပီ2022 ၼႆႉ ၵူၼ်းၼုမ်ႇ ထူပ်းၽေးၵိုင်ႉၵၢင်ႉ ၸူမ်ၼမ်ႉ သေလႆႈလုတၢႆ ၼႂ်းမိူင်းတႆး ဢမ်ႇယွမ်း 10 ၵေႃႉ ၵမ်ႈၽွင်ႈတူၵ်းၼမ်ႉတၢႆ ၵမ်ႈၽွင်ႉ ၺႃးရူတ်ႉၵႃးၽႃႇသႂ်ႇသေတၢႆ။
“ၵူၼ်းဢၼ်လူႉတၢႆၵႂႃႇၽွင်းၶၢဝ်းသွၼ်းၼမ်ႉၼႆႉလႆႈဝႃႈ ယွၼ်ႉၵျေႃႇလူၼ်ႉ ၵိၼ်မဝ်းသေလူႉတၢႆၵမ်ႈၼမ်။ ပေႃးၵႂႃႇလဵၼ်ႈၼမ်ႉၵေး ၼမ်ႉယႂ်ႇၼႆ လႆႈၾၢင်ႉၼႃႇ။ ပေႃးၼုင်ႈၵူၼ်ၵိၼ်းၼႆႉ ပေႃးယမ်းၼမ်ႉယဝ်ႉမၼ်းၼၵ်းလူးၼႄ။ ပေႃးဢမ်ႇပေႃးမေႃလုၺ်းၼမ်ႉသေၼႆယိင်ႈၶႅၼ်း လွင်ႈၸွမ်းငၢႆႈၶႃႈၼေႃႈ ” ၽူႈတူင်ႉၼိုင်တူင်ႇဝူင်းၵူၼ်းၵေႃႉၼိုင်ႈလၢတ်ႈ ။
ၸွမ်းၼင်ႇသဵၼ်ႈမၢႆ ဢၢၼ်ၽူႈတွႆႇႁွၵ်ႈလႆႈႁပ်ႉႁူႉၸွမ်းတႄႉ ဢၼ်တူၵ်းၼမ်ႉတၢႆ ၼႂ်းဝၼ်းသွၼ်းၼမ်ႉ မီးတီႈ လၢႆးၶႃႈ 2 ၵေႃႉ ယိင်း 1 ၵေႃႉလႄႈၸၢႆး 1 ၵေႃႉ ဢႃယုတိုၵ်ႉမီး 21 ၶူပ်ႇ၊ တီႈမူႇၸေႊသမ်ႉ ၵေႃႉၼိုင်ႈ ဢႃယု 19 ပီ ပဵၼ်ၵူၼ်းၼမ်ႉၶမ်း၊ တီႈဝဵင်းၼမ်ႉၸၢင်ၵေႃႈ ပဵၼ် လုၵ်ႈဢွၼ်ႇၸၢႆး ဢႃယု 14 ပီ ၵေႃႉၼိုင်ႈ၊ တီႈဝဵင်းၼမ်ႉလၼ်ႈသမ်ႉ ၵူၼ်းၼုမ်ႇၽူႈၸၢႆး ဢႃယု 23 ပီ၊ တီႈဝဵင်းလၢင်းၶိူဝ်းၵေႃႈ လုၵ်ႈဢွၼ်ႇၸၢႆး ဢႃယု 19 ပီ ၵေႃႉၼိုင်ႈ တူၵ်းၼမ်ႉတဵင်းတၢႆ၊ လိူဝ်ၼၼ်ႉ တီႈဝဵင်းတႃႈၶီႈလဵၵ်း ၽူႈၸၢႆ ဢႃယု 23 ပီၵေႃႉၼိုင်ႈလႄႈ တီႈဝဵင်းသီႇပေႃႉ ၽူႈၸၢႆး ဢႃယု 23 ပီၵေႃႉၼိုင်ႈ ၺႃးၽေးရူတ်ႉၵႃးၽႃႇသေ လူႉတၢႆ။
ဢိင်ၼိူဝ်တၢင်းပဵၼ်ၶူဝ်ႊဝိတ်ႉ ၽႄႈလၢမ်းလႄႈ သိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းသေ ၵူၼ်းမိူင်းဢမ်ႇလႆႈလဵၼ်ႈၼမ်ႉ ၶၢဝ်းပွႆးသွၼ်းၼမ်ႉ မီး 2 ပီယဝ်ႉ။ ပီၼႆႉ သိုၵ်းမၢၼ်ႈ ၶိၼ်ႁဵတ်းပွႆးလၢမ်းယႂ်ႇလူင်ၽွင်းသွၼ်းၼမ်ႉလႄႈ ပိုၼ်ၽၢဝ်ႇဝႆႉၵွၼ်ႇၼႃႈသွၼ်းၼမ်ႉဝႃႈ – ၶူဝ်ႊဝိတ်ႉဢမ်ႇၽႄႈလၢမ်းယဝ်ႉလႄႈ ၵူၼ်းမိူင်း ၶွၼ်ႈၵၼ်ၶိုၼ်းလႆႈထိုင် 400 ဝႃႈၼႆ။
လွင်ႈၼႆႉၵူၼ်းၼုမ်ႇၼႂ်းဝဵင်းယႂ်ႇဝဵင်းလူင်ၼႂ်းမိူင်းတႆး ၵမ်ႈၽွင်ႈလႄႈ ၵူၼ်းၼုမ်ႇမိူင်းမၢၼ်ႈ ၸိူဝ်းသၢၼ်ၶတ်းသိုၵ်းမၢၼ်ႈယိုတ်းမိူင်း တႄႉ တိုၼ်းဢမ်ႇဢွၵ်ႇႁိူၼ်း ဢမ်ႇလဵၼ်ႈၼမ်ႉ ဢမ်ႇၶဝ်ႈႁူမ်ႈပွႆးလဵၼ်ႈၼမ်ႉတႂ်ႉငဝ်းလၢႆးသိုၵ်းယိုတ်းမိူင်း သေ ဢွၼ်ၵၼ်ယူႇႁိူၼ်း ၼႄၾၢင်ႁၢင်ႈသၢၼ်ၶတ်း ပွႆးသွၼ်းၼမ်ႉဢၼ်သိုၵ်းမၢၼ်ႈဢွၼ်ႁဵတ်း မိူင်းပေႃးယဵၼ်သီႇသီႇ။ ပေႃးဝၢၼ်ႈမိူင်းၵတ်းယဵၼ် ၸင်ႇတေလဵၼ်ႈၼမ်ႉမူၼ်ႈၸႂ်ၸွမ်းၵၼ်တင်းၵူၼ်းၼုမ်ႇ ၸိူဝ်းတိုၵ်ႉမီးၼႂ်းထိူၼ်ႇ ယၢမ်းလဵဝ် – ဝႃႈၼႆ။
မိူၼ်ၼင်ႇၵူၼ်းၼုမ်ႇတၢင်းတိူင်းတၼၢဝ်းသီ ၊ တၢင်းမိူင်းၸႄႈၵႅင်း တိူင်းတႃႈလိူဝ်ႇ ၸိူဝ်းၼႆႉတႄႉ ၼႂ်းဝၼ်းသွၼ်းၼမ်ႉၼၼ်ႉ ဢွၼ်ၵၼ်ဢွၵ်ႇမႃးၼိူဝ်တၢင်း ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ ယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ