·မိူဝ်ႈၼႆႉဝၼ်းတီႈ 8/4/2022 ယၢမ်းႁူဝ်ၶမ်ႈမွၵ်ႈ 4 မူင်းၶိုင်ႈ မၢၵ်ႇတႅၵ်ႇသႂ်ႇတီႈၶဵင်ႇမၢၼ်ႇတၢပ်ႈ (ၶဵင်ႇလဵၼ်ႈၼမ်ႉသၢင်းၵျၢၼ်ႇ) ဢၼ်သိုၵ်းမၢၼ်ႈတိုၵ်ႉၸႂ်ႉသၢင်ႈဝႆႉတီႈၵၢင်ဝဵင်းတႃႈၵုင်ႈ။
တီႈႁိမ်းၶဵင်ႇဢၼ်တိုၵ်ႉၵေႃႇသၢင်ႈဝႆႉတီႈႁူင်းႁေႃးလူင်ၵၢင်ဝဵင်းတႃႈၵုင်ႈၼၼ်ႉ မီးရူတ်ႉၵႃးသိုၵ်းလမ်းၼိုင်ႈၵိုတ်းဝႆႉ။ သိုၵ်းမၢၼ်ႈၵေႃႈမီးဝႆႉႁိမ်းၼၼ်ႉၽွင်ႈ။
မၢၵ်ႇတႅၵ်ႇတီႈႁိမ်းၵႃးသိုၵ်းမၢၼ်ႈၼၼ်ႉလႄႈႁဵတ်းႁႂ်ႈၵူၼ်းယူႇႁိမ်းႁွမ်းၼၼ်ႉတူၵ်းၸႂ်ၵူဝ်ႁႄလႅၼ်ႈပၢႆႈၵေႃႉႁူးၵေႃႉတၢင်း၊ ၵမ်ႈၽွင်ႈလႅၼ်ႈၶဝ်ႈၼႂ်းဝၢင်းႁူင်းႁေႃးၵၢင်ဝဵင်း(မဵဝ်ႉတေႃႇၶၢၼ်းမ) ၼၼ်ႉ – ၵူၼ်းႁၼ်သိုဝ်ႈၼႃႈတၼ်းတႃၵေႃႉၼိုင်ႈလၢတ်ႈ။
မၢၵ်ႇၼၼ်ႉပဵၼ်ၽႂ်မႃးဝၢင်းတႄႉဢမ်ႇႁူႉ။ ဝၢႆးလင်မၢၵ်ႇတႅၵ်ႇယဝ်ႉ သိုၵ်းမၢၼ်ႈ ပိၵ်ႉဢိုတ်းသဵၼ်ႈတၢင်းသေၵူတ်ႇထတ်းၵူၼ်းၸိူဝ်းၵႂႃႇမႃး- ၵူၼ်းႁၼ်တႂ်ႈၼႃႈတၼ်းတႃၼၼ်ႉလၢတ်ႈ။
ဝၢႆးလင်မၢၵ်ႇတႅၵ်ႇယဝ်ႉသေ ၸုမ်းသိုၵ်းမုတ်းဝဵင်းတႃႈၵုင်ႈ Dark Shadow(YGN) ပိုၼ်ၽၢဝ်ႇတီႈၼႃႈလိၵ်ႈၶၢဝ်ႇၶဝ်ဝႃႈ ပဵၼ်ၼမ်ႉမိုဝ်းၶဝ်။ ၶဝ်ဢဝ်မၢၵ်ႇထိုမ်ႈသႂ်ႇၵႃးသိုၵ်းမၢၼ်ႈ ၊ ၵၢပ်ႇႁႄႉၼႃႈရူတ်ႉၵႃးၼၼ်ႉသမ်ႉပေႃးၵွႆ ဝႃႈၼႆ။
ဢိင်ၼိူဝ်သိုၵ်းမၢၼ်ႈ တိုၵ်ႉၶိၼ်ႁဵတ်းသၢင်ႈပၢင်ပွႆးလဵၼ်ႈၼမ်ႉသၢင်းၵျၢၼ်ႇၵိုၼ်းၶွၼ်ႈယူႇၵူႈတီႈၵူႈဝဵင်း ဝဵင်းယႂ်ႇဝဵင်းလူင် ပႃးတင်းဝဵင်းလူင်ၼႂ်းၸိုင်ႈတႆးၵမ်ႈၽွင်ႈၼႆႉသေ ၸုမ်းသိုၵ်းမုတ်း လႄႈ ၸုမ်းသိုၵ်းၵႅတ်ႇၶႄၵူၼ်းမိူင်းဢွၼ်ၵၼ်ပိုၼ်ၽၢဝ်ႇပၼ်ၾၢင်ႉၵူၼ်းမိူင်းဝႆႉဝႃႈ ယႃႇၶဝ်ႈႁူမ်ႈပႃးၸွမ်း ပၢင်မူၼ်ႈသိူဝ်းလဵၼ်ႈၼမ်ႉလႃးလႃး- ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ