ၶွင်ႇသီႇသိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း မုင်ႈၸူးတၢင်းမိူင်းၵူဝ်းထႅင်ႈ ဢဵၼ်ႁႅင်း ဢမ်ႇယွမ်း 200 ၵူၼ်းမိူင်းပိုၼ်ႉတီႈမႆႈၸႂ် ၵူဝ်ပဵၼ်ပၢင် တိုၵ်းထႅင်ႈ ႁၢဝ်ႈႁႅင်း။
မိူဝ်ႈဝႃး ဝၼ်းတီႈ 11/4/2022 သိုၵ်းမၢၼ်ႈ တပ်ႉမ 77 တင်း တပ်ႉမ 99 လုၵ်ႉတၢင်းလႃႈသဵဝ်ႈ မုင်ႈၸူးတၢင်း ၵိင်ႇၽႄၸႄႈဝဵင်းမိူင်းၵူဝ်း ၸႄႈ တွၼ်ႈမူႇၸေႊ ၸိုင်ႈတႆးပွတ်းႁွင်ႇ တႃႇၵႃးသိုၵ်း 32 လမ်း ဢဵၼ်ႁႅင်းသိုၵ်း မွၵ်ႈ 240 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ၵႃးသိုၵ်းၶဝ် လုၵ်ႉတၢင်းလႃႈသဵဝ်ႈ ၶိုၼ်ႈမႃးတၢင်းမိူင်းၵူဝ်းၼႆႉ တင်းမူတ်း 32 လမ်း။ တႃႇ 17 လမ်း ၼႆႉ တၢင်ႇၶိူင်ႈၵွင်ႈၵၢင်ႇတဵမ်ၵႃး၊ တႃႇ 5 လမ်းသမ်ႉ တၢင်ႇၵူၼ်းသိုၵ်းၶဝ်။ လိူဝ်ၼၼ်ႉတႄႉ တၢင်ႇၶဝ်ႈၼမ်ႉတၢင်းၵိၼ်ၶဝ်ၶႃႈဢေႃႈ။ ပၢင်တိုၵ်းၼႆႉ ၵူဝ်ပဵၼ်ထႅင်ႈႁၢဝ်ႈႁႅင်းၵူၺ်းၶႃႈယဝ်ႉ”- ဝႃႈၼႆ။
ၵႃးသိုၵ်းမၢၼ်ႈ ဢၼ်လုၵ်ႉတၢင်းလႃႈသဵဝ်ႈ ၶိုၼ်ႈမႃးၼႆႉ တင်းမူတ်းမီး 75 လမ်း။ ၼႂ်းၼၼ်ႉ တႃႇ 20 လမ်း မုင်ႈၼႃႈၸူးတၢင်းၸႄႈဝဵင်းလၢဝ်ႇၵၢႆး ၼႃႈလိၼ်ၽွင်းငမ်းတူဝ်ၵဝ်ႇ သိုၵ်းၶႄႇၵဝ်ႈၵၢင်ႉ MNDAA ၊ တႃႇ 50 လမ်းသမ်ႉ မုင်ႈၼႃႈၸူးတၢင်းၼမ်ႉဢုမ်။ မိူဝ်ႈဝႃး ဝၼ်းတီႈ 11 တႃႇၵႃး 32 လမ်း မုင်ႈၸူးတၢင်းၵိင်ႇၽႄၸႄႈဝဵင်းမိူင်းၵူဝ်း ၼႆယဝ်ႉ။
“ ၶဝ် ထႅမ်ႁႅင်းသိုၵ်းမႃးတၢင်းမိူင်းၵူဝ်းၼႆႉ ၶဝ်ၶႂ်ႈဢုပ်ႉပိူင်ႇၽွင်းငမ်းတီႈဢၼ် သိုၵ်းၵူဝ်းၵၢင်ႉယူႇဝႆႉ ၸိူဝ်းၼၼ်ႉၶိုၼ်း။ ၵွပ်ႈၼႆ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၵႆႉၵႆႉပဵၼ်ပၢင်တိုၵ်းၵၼ် ။ ၾၢႆႇၼိုင်ႈၵေႃႈၶဝ်လႅၵ်ႈၵူၼ်းသိုၵ်းၶဝ်ပႃး”- ၵူၼ်းပိုၼ်ႉတီႈ သိုပ်ႇ လၢတ်ႈၼင်ႇၼႆ။
တႄႇဢဝ် လိူၼ်ၵျုႊလၢႆႊ 2021 ၼၼ်ႉမႃး သိုၵ်းမၢၼ်ႈတင်း သိုၵ်းၶႄႇၵဝ်ႈၵၢင်ႉ ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၵိင်ႇၸႄႈဝဵင်းမိူင်းၵူဝ်း။ ႁၢၼ်ႉတေႃႇ ထိုင်ယၢမ်းလဵဝ် ၵူၼ်းမိူင်း လႆႈပၢႆႈၽေးသိုၵ်း 800 ပၢႆ ။ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ႁၢဝ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ