သိုၵ်းမၢၼ်ႈလႄႈ သိုၵ်းၵႅတ်ႇၶႄၵူၼ်းမိူင်း PDF ပိုတ်းယိုဝ်းၵၼ်တီႈဝၢၼ်ႈလႂႃႉၸဵၼ်ႇ ဝဵင်းယႂႃႇငၢၼ်ႇၸိုင်ႈတႆးပွတ်းၸၢၼ်း၊   ဝၢႆးပၢင်တိုၵ်းယဝ်ႉသိုၵ်းမၢၼ်ႈလိုပ်ႈလမ်းတီႉၺွပ်းၵူၼ်းၼုမ်ႇၼႂ်းဝဵင်း။

ပၢင်တိုၵ်းၼႆႉပဵၼ်မိူဝ်ႈဝၼ်းတီႈ 9/4/2022 ယၢမ်းဝႆၢးဝၼ်းမွၵ်ႈ 4 မူင်း။ ၾၢႆႇသိုၵ်းမၢၼ်ႈ လူႉတၢႆ 4 ၵေႃႉ ၊ သိုၵ်းၵႅတ်ႇၶႄၵူၼ်းမိူင်းဢမ်ႇမီးလွင်ႈမၢတ်ႇၸဵပ်းလူႉတၢႆ။

ၵူၼ်းၸမ်ၸႂ်သိုၵ်းၵူၼ်းမိူင်း PDF တၢင်းဝဵင်းယႂႃႇငၢၼ်ႇလၢတ်ႈတီႈၽူႈတွႆႇႁွၵ်ႈဝႃႈ-“ၸုမ်းPDF ၵႂႃႇပႂ်ႉတီႈႁိမ်းဝၢၼ်ႈ လႂႃႇၸဵၼ်ႇလႄႈ ဝၢၼ်ႈတွင်ႇပူဝ်ႇၵႂၢႆး တီႈသဵၼ်ႈတၢင်းရူတ်ႉၵႃးသိုၵ်းမၢၼ်ႈတေမႃးသေ ပႂ်ႉယိုဝ်းၶႃႈဢေႃႈ။ သိုၵ်းမၢၼ်ႈတၢႆ 4 ၵေႃႉ ။ ၾၢႆႇသိုၵ်းၵူၼ်းၼုမ်ႇႁဝ်းတႄႉ ဢမ်ႇမီးလွင်ႈမၢတ်ႇၸဵပ်း။ ယိုဝ်းသိုၵ်းမၢၼ်ႈတၢႆယဝ်ႉၵေႃႈထွႆထွၼ်လႆႈၶိုၼ်းလွတ်ႈၽေးလီငၢမ်း  ” – ဝႃႈၼႆ။

ဝၢႆးပၢင်တိုၵ်းၼၼ်ႉဢမ်ႇပေႃးႁိုင်လႆႈယိၼ်းသဵင်ပိုတ်းယိုဝ်းၵၼ်တီႈႁိမ်းဝၢၼ်ႈ မျိၼ်းၵျႃႇတူဝ်းထႅင်ႈ ။

ၼႂ်းဝၼ်းၼၼ်ႉယၢမ်းဝၢႆးဝၼ်းသိုၵ်းမၢၼ်ႈ ၵႃး 3 လမ်း ဢဵၼ်ႁႅင်းမွၵ်ႈ 60 ႁွတ်ႈထိုင်ဝၢၼ်လႂႃႉၸဵၼ်ႇသေ ၽႄၵၼ်ၵႂႃႇသွၵ်ႈတဝ်ႁိူၼ်းယေးၵူၼ်းဝၢၼ်ႈ လိုပ်ႈလမ်းတီႉၺွပ်းၵူၼ်းဝၢၼ်ႈလႄႈၵူၼ်းၼုမ်ႇဢၼ်ၶဝ်ထၢင်ႇထိူမ်ဝႃႈပဵၼ်သိုၵ်းၵႅတ်ႇၶႄၵူၼ်းမိူင်း ၸွမ်းဝၢၼ်ႈမျိၼ်းၵျႃႇတူဝ်းၸိူဝ်းၼႆႉထႅင်ႈ။

 ၵူၼ်းၼုမ်ႇဢႃယု 27 ပီ ၵူၼ်းဝၢၼ်ႈတႄႉလူႉ လၢတ်ႈတီႈၽူႈတွႆႇႁွၵ်ႈဝႃႈ- “ဝၢႆးလင်သဵင်ၵွင်ႈတႅၵ်ႇယဝ်ႉသိုၵ်းမၢၼ်ႈ ၶဝ်ႈတဝ်ၼႂ်းဝၢၼ်ႈမျိၼ်းၵျႃႇတူဝ်း၊ ဝၢၼ်ႈတႄႉလူႉ ၸိူဝ်းၼႆႉသေ ၵေႃႈသွၵ်ႈႁိူၼ်းၵူၼ်းဝၢၼ်ႈ၊ လမ်းတီႉၺွပ်း ၵူၼ်းၼုမ်ႇၸိူဝ်းၼႆႉဢေႃႈ။ ၵူၼ်းထဝ်ႈၵေႃႈတီႉယဝ်ႉၶႃႈ။”- ဝႃႈၼႆ။

 ၼႂ်းဝၼ်းတီႈ 9 လႄႈဝၼ်းတီႈ 10 သိုၵ်းမၢၼ်ႈလမ်းတီႉၵူၼ်းဝၢၼ်ႈ လႆႈၵႂႃႇ 12 ၵေႃႉပႃးတင်းလုၵ်ႈဢွၼ်ႇလႅင်ၵေႃႉၼိုင်ႈ။ ပဵၼ်ၵူၼ်းဝၢၼ်ႈၼႂႃးပၢၼ်းၵျီး 8 ၵေႃႉ၊ ၵူၼ်းဝၢၼ်ႈ လႄႇၵႅင်း 2 ၵေႃႉလႄႈၵူၼ်းဝၢၼ်ႈလႂႃႇၸဵၼ်ႇ 2 ၵေႃႉ။

ယၢမ်းလဵဝ်ၵေႃႈသိုၵ်းမၢၼ်ႈဢဝ်တီႈယူႇဝႆႉၸွမ်းၸိူဝ်းဝၢၼ်ႈၸိူဝ်းၼၼ်ႉသေသွၵ်ႈတဝ်ႁိူၼ်းယေးၵူၼ်းဝၢၼ်ႈ၊ ပၵ်းတႃပႂ်ႉတူၺ်း ၵူၼ်းၶဝ်ႈဢွၵ်ႇဝၢၼ်ႈ။ ပေႃးၶဝ်ထၢင်ႇထိူမ်ဝႃႈၵွင်ႉၵၢႆႇၸွမ်းၵူၼ်းၼုမ်ႇယိပ်းၵွင်ႈၵၢင်ႇၼႆ တီႉၺွပ်းၵႂႃႇပေႃႉထုပ်ႉထဵတ်ႈထၢမ်။

ၸႄႈဝဵင်းယႂႃႇငၢၼ်ႇ ၊ ပၢင်းတလ ၸိုင်ႈတႆးပွတ်းၸၢၼ်း ဢၼ်သိုၵ်းမၢၼ်ႈပၼ်ဝႆႉပဵၼ်ၼႃႈလိၼ်ၽွင်းငမ်းတူဝ်ၵဝ်ႇထၼု (ၼႂ်းပပ်ႉပိူင်ငဝ်ႈပိုင်းမိူင်း 2008) ၼႆႉၼၼ်ႉ မိူဝ်ႈၵူႈပွၵ်ႈ ပဵၼ်ၼႃႈလိၼ်တီႈဢၼ်ဢမ်ႇမီးၸုမ်းယိပ်းၵွင်ႈၵၢင်ႇ၊ ဢမ်ႇမီးလွင်ႈၽုၵ်ႇသွမ်ႈယႃႈမဝ်းၵမ်။ ပဵၼ်ပီႈၼွင်ႉၸၢဝ်းၶိူဝ်း ထၼု ယူႇသဝ်းမႃးၵတ်းၵတ်းယဵၼ်ယဵၼ် ဢမ်ႇႁဵတ်းၶဵၼ်တေႃႇၽႂ်။ ယၢမ်းလဵဝ် ဢိင်ၼိူဝ်သိုၵ်းမၢၼ်ႈယိုတ်းမိူင်းပေႉၵိၼ်တဵၵ်းတဵင်ၵူၼ်းမိူင်းလိူဝ်ၸႂ်လႄႈ တၢင်းထုင်ႉဢၼ်ၵတ်းယဵၼ်မႃးတႃႇသေႇၼၼ်ႉၵေႃႈမီးၸုမ်းသိုၵ်းၵႅတ်ႇၶႄၵူၼ်းမိူင်း၊ မီးပၢင်တိုၵ်းသိုၵ်းသိူဝ်မႃး။

လွင်ႈသိုၵ်ႈမၢၼ်ႈ ၶဝ်ႈဝၢၼ်ႈသေပေႉၵိၼ်တဵၵ်းတဵင်ၵူၼ်းမိူင်းၵူၼ်းဝၢၼ်ႈယူႇၸိူင်ႉၼႆၼႆႉ ၵူၼ်းဝၢၼ်ႈတၢင်းထုင်ႉယႂႃႇငၢၼ်ႇ တုၵ်းယွၼ်းတိုၵ်းသူၼ်းထိုင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢိၵ်ႇသိုၵ်းၵူၼ်းၼုမ်ႇ တၢင်ႇတီႈတၢင်ႇဝဵင်းမႃးၸွႆႈထႅမ်ပၼ်ၵူၼ်းဝၢၼ်ႈၵူၼ်းမိူင်းၽွင်ႈ ဝႃႈၼႆ။