ၾၢႆႇလိူမ်ႈလႆႇ ႁူဝ်ပူင်း  ၵဵပ်းငိုၼ်း တီႈၵူၼ်းၶၢႆၼႂ်းၵၢတ်ႇ တႃႇႁဵတ်းၶဵင်ႇၸၢတ်ႈပွႆးသွၼ်းၼမ်ႉ

ၾၢႆႇလိူမ်ႈလႆႇ ၸႄႈဝဵင်းႁူဝ်ပူင်း  ၵဵပ်းငိုၼ်း တီႈၵူၼ်းၶၢႆၼႂ်းၵၢတ်ႇလႄႈ ၸဝ်ႈၶွင်ႁၢၼ်ႉၶၢႆၶူဝ်းၶွင်ၸွမ်းၶၢင်ႈတၢင်း ႁၢဝ်ႈႁႅင်း တႃႇၸတ်းႁဵတ်း ၶဵင်ႇလဝ်ႇမူၼ်ႈၵႃႈဝႅၼ်မူၼ်ႈသိူဝ်း ၽွင်းၶၢဝ်းသွၼ်းၼမ်ႉ လိူၼ်ႁႃႈၼႆႉ ဝႃႈၼႆ။

တႄႇဢဝ်ဝၼ်းတီႈ 7/4/2022 ၼႆႉမႃး ယူႇတီႈၾၢႆႇလိူမ်ႈလႆႇ ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း  ၵဵပ်းငိုၼ်းၸွမ်းႁၢၼ်ႉၶၢႆၶူဝ်း ၼႂ်းၵၢတ်ႇလူင်  ၵဵပ်းပႃးႁၢၼ်ႉၶၢႆၶူဝ်း ၸွမ်းၶၢင်ႈတၢင်းလူင် ၸိူဝ်းၼႆႉ၊ ဢိင်ၼိူဝ်ႁၢၼ်ႉယႂ်ႇ/လဵၵ်ႉသေ ၵဵပ်း   1 ႁၢၼ်ႉ လႂ် 5 ႁဵင်ပျႃး တေႃႇထိုင် 5 မိုၼ်ႇပျႃး  ။

ၽူႈယိင်းဢႃယုမွၵ်ႈ 40 ပီ ဢၼ်ပိုတ်ႇႁၢၼ်ႉၶၢႆၶူဝ်းဝႆႉၼႂ်းဝဵင်းႁူဝ်ပူင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၶဝ်တေႁဵတ်းၶဵင်ႇမၢၼ်ႇတၢပ်ႈၼႆၶႃႈဝႃႇၼၼ်ႉၶဝ်မႃးၵဵပ်းငိုၼ်း။  ဢမ်ႇသႂ်ႇၵေႃႈဢမ်ႇလႆႈ   ၶဝ်ဢထမ်ႇမ  ၵဵပ်းဢေႃႈ။ပဵၼ်ၾၢႆႇလိူမ်ႈလႆႇမႃးၵဵပ်းဢေႃႈ။ ပေႃးဢဝ် ႁၢၼ်ႉၶၢႆၶူဝ်းၼႂ်းၵၢတ်ႇဝႃႈၼႆၸိုင် တေမီးႁၢၼ်ႉပဵၼ် 100 ပၢႆၶႃႈၼၼ်ႉ”- ဝႃႈၼႆ။

ႁၢၼ်ႉၶၢႆၶူဝ်း ၼႂ်းၵၢတ်ႇလႄႈသင် ဢၼ်ပိုတ်ႇဝႆႉ ၸွမ်းၶၢင်ႈတၢင်း ၸိူဝ်းၼၼ်ႉလႄႈသင် တေလႆႈသႂ်ႇၵူႈႁၢၼ်ႉ ပေႃးပဵၼ်ႁၢၼ်ႉဢွၼ်ႇ တေဢမ်ႇလႆႈ သႂ်ႇ ဢမ်ႇယွမ်း 5 ႁဵင်ပျႃး ပေႃးပဵၼ်ႁၢၼ်ႉယႂ်ႇသမ်ႉ တေလႆႈသႂ်ႇ 5 မိုၼ်ႇပျႃး ၼႆယဝ်ႉ။

 ၼႂ်းမိူင်းတႆးၼႆႉ ဢၼ်သၢၼ်ၶတ်းသိုၵ်းယိုတ်းမိူင်းႁၢဝ်ႈႁႅင်းၼႆႉ ပႃးပီႈၼွင်ႉၵူၼ်းမိူင်းႁူဝ်ပူင်းတီႈၼိုင်ႈ။ ၼင်ႇၵႃႈမီးတိုဝ်ႉတၢင်းၼၼ်ႉ တိုၼ်းဢဝ်ၵူႈလၢႆးလၢႆးသေ ၼႄၵၢင်ၸႂ်သၢၼ်ၶတ်းသိုၵ်းယိုတ်းမိူင်းမႃးတေႃႇထိုင်ဝၼ်းမိူဝ်ႈၼႆႉ။

ဢိင်ၼိူဝ်တၢင်းပဵၼ်ၶူဝ်ႊဝိတ်ႉတိတ်းၸပ်းလၢမ်းၽႄႈလႄႈ သိုၵ်းယိုတ်းမိူင်း ႁဵတ်းႁႂ်ႈဝၢၼ်ႈမိူင်းသုၵ်ႉယုင်ႈၼၼ်ႉသေ ပၢင်ပွႆးသွၼ်းၼမ်ႉ ဢမ်ႇလႆႈၸတ်းႁဵတ်းမႃး 2 ပီယဝ်ႉ။ ပီၼႆႉၵေႃႈ တၢင်းမိူင်းယၢင်းလႅင် မိူင်းၶျၢင်း တိူင်းၸႄႈၵႅင်းၸိူဝ်းၼႆႉ ၵူၼ်းၼုမ်ႇ ၵူၼ်းမိူင်း တိုၵ်ႉဢွၼ်ၵၼ်ပိုတ်းယိုဝ်းသၢၼ်ၶတ်းသိုၵ်းမၢၼ်ႈယူႇသေတႃႉ သိုၵ်းမၢၼ်ႈၶႂ်ႈႁဵတ်းၾၢင်ႁၢင်ႈၼႄလုမ်ႈၾႃႉဝႃႈ ၶဝ်ၵုမ်းထိင်းငဝ်းလၢႆးဝၢၼ်ႈမိူင်းလႆႈလီယဝ်ႉၼႆသေ ပိုၼ်ၽၢဝ်ႇၶိၼ်ႁဵတ်းပွႆး ၵူႈတီႈ ၵူႈဝဵင်း ၼႂ်းမိူင်းတႆး မိူင်းမၢၼ်ႈ။

ၾၢႆႇသိုၵ်းၵႅတ်ႇၶႄၵူၼ်းမိူင်း PDF လႄႈ လူင်ပွင်ၸိုင်ႈ NUG ဢိၵ်ႇပႃးတင်းၵူၼ်းမိူင်းၸိူဝ်းသၢၼ်ၶတ်းသိုၵ်းမၢၼ်ႈယူႇၼၼ်ႉတႄႉပိုၼ်ၽၢဝ်ႇ ပၼ်ၾၢင်ႉၵူၼ်းတင်းမိူင်းဝႃႈ ယႃႇၶဝ်ႈႁူမ်ႈပၢင်ပွႆးသၢင်းၵျၢၼ်ႇဢၼ်သိုၵ်းမၢၼ်ႈဢွၼ်ႁဵတ်း၊  ပေႃးၶဝ်ႈႁူမ်ႈၵေႃႈမိူၼ်တင်းဝႃႈ ႁၢၼ်ႉၸႂ်ပဵင်းပေႃး ၼိူဝ်လွင်ႈယူႇတႂ်ႈၵၢၼ်ၽွင်းငမ်းသိုၵ်းမၢၼ်ႈၼၼ်ႉၵူၺ်း ၊ ပေႃးပဵၼ်လွင်ႈမၢၵ်ႇတႅၵ်ႇ ပိုတ်းယိုဝ်း မၢတ်ႇၸဵပ်းလူႉတၢႆမႃး ၵူၼ်းမိူင်းၸၢင်ႈၺႃးၶီႈသူမ်ႈၸွမ်း- ဝႃႈၼႆဝႆႉ။