သိုၵ်းမၢၼ်ႈ ယိုတ်းမိူင်း ၶိုင်ၸတ်းပွႆးသွၼ်းၼမ်ႉ ၵၢင်ဝဵင်းၵဵင်းတုင်ၶိုၵ်ႉယႂ်ႇ ႁဵတ်း ၶဵင်ႇႁူတ်းၼမ်ႉ/ မၢၼ်ႇတၢပ်ႈ ယႂ်ႇလူင် တီႈႁေႃၼႃႇလီႇ ၵၢင်ဝဵင်း ။

ၵူၼ်းၼုမ်ႇၵဵင်းတုင်ဢႃယုမွၵ်ႈ 30 ပီ ဢၼ်ပိုတ်ႇႁၢၼ်ႉၶၢႆၶူဝ်းဝႆႉၵေႃႉၼိုင်ႈတႄႉလၢတ်ႈဝႃႈ သိုၵ်းမၢၼ်ႈၶႂ်ႈၼႄဝႃႈ ဝၢၼ်ႈမိူင်းဢမ်ႇမီးလွင်ႈသုၵ်ႉယုင်ႈ ၵုမ်းငဝ်းလၢႆးလႆႈလီငၢမ်းယဝ်ႉ – ၼႆၵူၺ်း ဝႃႈၼႆ ။  

  “ပီၼႆႉႁဵတ်းဢေႃႈ ၶဝ်တေၸတ်းယႂ်ႇလူင် ၶိုၵ်ႉၶႅမ်ႉၼႆၶႃႈ။ ယၢမ်းလဵဝ် ၶဝ်တိုၵ်ႉႁၢင်ႈ ႁႅၼ်းႁဵတ်းမၢၼ်ႇတၢပ်ႈ ယႂ်ႇယႂ်ႇလူင်လူင် တီႈႁေႃၼႃႈလီႇၵၢင်ဝဵင်းၼႆႉ။ ၶဝ်ၶႂ်ႈၼႄၾၢင်ႁၢင်ႈဝႃႈ ဝၢၼ်ႈမိူင်းၼႆႉ ၵတ်းယဵၼ်ယဝ်ႉ ဢမ်ႇမီးလွင်ႈ သုၵ်းယုင်ႈၼႆၼၼ်ႉၵူၺ်း”- ၵူၼ်းၼုမ်ႇၼၼ်ႉလၢတ်ႈၼင်ႇၼႆ။

သိုၵ်းမၢၼ်ႈႁၢင်ႈႁႅၼ်းတႃႇႁဵတ်းၶဵင်ႇၵႃႈဝႅၼ် မၢၼ်ႇတၢပ်ႈ ၼႃႈႁူင်း ႁဵၼ်းၸၼ်ႉသုင် တပ်ႉၶဝ်ဢၼ်ၼိုင်ႈ၊ တီႈပွႆးၵႅၼ်ၵွင် တီႈႁူဝ်ၵၢတ်ႇၼၼ်ႉဢၼ်ၼိုင်ႈ  ။

“တီႈၵဵင်းတုင်ၼႆႉ ယၢမ်းလဵဝ် ၶဝ်ပွႆႇလူမ်ၼႃႇယဝ်ႉ ပွႆးလၢမ်းၶႅၵ်ႇလီပၢင်ၸႃႉ ပၢင်ၶႅၵ်ႇ၊ ၶၢမ်ႇသၢင်ႇ ၸိူဝ်းၼႆႉ ၶဝ်ဢမ်ႇႁၢမ်ႈသင် ၽႂ်ၶႂ်ႈၸတ်းၸတ်း ၶႂ်ႈႁဵတ်းႁဵတ်း ဢမ်ႇဝႃႈသင်။ ယဝ်ႉၵေႃႈ ပွႆးၵႅၼ်ၵွင် တီႈႁူဝ်ၵၢတ်ႇၼႆႉၵေႃႈ တေၸတ်းမိူၼ်ၵၼ်ၼႆၶႃႈဢေႃႈ”- ၵူၼ်းၼုမ်ႇၼၼ်ႉလၢတ်ႈၼႄထႅင်ႈၼင်ႇၼႆ။

တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼၼ်ႉၵေႃႈ သိုၵ်းမၢၼ်ႈလႄႈၽူႈၵွၼ်းၸႄႊဝဵင်းလၢတ်ႈဝႃႈ ၶဵင်ႇၵႃႈဝႅၼ်လဵၼ်ႈၼမ်ႉယႂ်ႇလူင်တႄႉတေဢမ်ႇႁဵတ်း၊ ၽႂ်ၶႂ်ႈႁဵတ်းၵေႃႈ ႁဵတ်းၵႂႃႇႁင်းၵူၺ်းၼႂ်းပွၵ်ႉၽႂ်မၼ်း၊ လွင်ႈႁူမ်ႇလူမ်ႈၵေႃႈႁပ်ႉပုၼ်ႈၽွၼ်းႁင်းၽႂ်မၼ်း၊ ပေႃးဢမ်ႇပိၵ်ႉဢိုတ်းၵိတ်ႇၶႂၢင်သဵၼ်ႈတၢင်းၵႂႃႇမႃးၵေႃႈလႆႈယဝ်ႉ   –  Shan East News Agency ဢွၵ်ႇဝႆႉၼင်ႇၼႆ။

ၸဝ်ႈႁၢၼ်ႉၶူဝ်းတီႈတႃႈၶီႈလဵၵ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈတႃႈၶီႈလဵၵ်းၼႆႉ မိူဝ်ႈလဵဝ် ပႆႇႁၼ်ၶဝ် တူင်ႉၼိုင်သင်တႄႉတႄႉၶႃႈ။ မၢၼ်ႇတၢပ်ႈတႄႉ မၢင်တီႈၵေႃႈ ႁဵတ်းဝႆႉယူႇၶႃႈ”- ဝႃႈၼႆ။

ၵူၺ်းၵႃႈ တၢင်းဝဵင်းလူင် ပွတ်းႁွင်ႇ ၸႄႈဝဵင်းလႃႈသဵဝ်ႈၼၼ်ႉတႄႉ တေႃႇထိုင်ယၢမ်းလဵဝ် ပႆႇႁၼ်မီး လွင်ႈႁၢင်ႈႁႅၼ်း တူင်ႉၼိုင်သင် ဝႃႈၼႆ။

ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပီ ဢၼ်တီႈၶဝ်ႁဵတ်း မၢၼ်ႇတၢပ်ႈ ၸွမ်းၵၢင်ဝဵင်း၊ ၼႃႈတပ်ႉၶဝ်ၸိူဝ်းၼၼ်ႉ ပီၼႆႉ ပႆႇ ႁၼ်ၶဝ်ႁဵတ်းသင်၊  ၸွင်ႇတေႁဵတ်းႁိုဝ် ဢမ်ႇႁဵတ်း ဢၼ်ဝႃႈၼၼ်ႉ ပႆႇႁူႉ ဢမ်ႇၼၼ် ၶဝ်တေၸတ်းႁဵတ်း ၼႂ်းတပ်ႉ ၶဝ်ၵူၺ်းႁိုဝ် ဢမ်ႇႁူႉ”- ဝႃႈၼႆ။

တီႈၸႄႈဝဵင်းတူၼ်ႈတီႈတႄႉ တေၸတ်းႁဵတ်းပွႆးလဵၼ်ႈၼမ်ႉၶိုၵ်ႉယႂ်ႇလူင် ယၢမ်းလဵဝ် ၶဵင်ႇႁူတ်းၼမ်ႉ(မၢၼ်ႇတၢပ်ႈ) လူင်ၶဝ်တႄႉ ႁဵတ်းယဝ်ႉတူဝ်ႈလီ ငၢမ်းၵႂႃႇယဝ်ႉ တီႈႁိမ်းလုမ်းသၽႃးၸႄႈမိူင်းတႆးၼၼ်ႉ တီႈၼိုင်ႈ။

ပွႆးသွၼ်းၼမ်ႉ လိူၼ်ႁႃႈပီၼႆႉ ဢမ်ႇၵႃးတီႈဝဵင်းလူင် တူၼ်ႈတီး၊ ၵဵင်းတုင်၊ တႃႈၶီႈလဵဝ်း ၸိူဝ်းၼႆႉၵူၺ်း သိုၵ်းမၢၼ်ႈၶိုင်ၸတ်းႁဵတ်း ပဵၼ်လၢႆဝဵင်း တီႈဢၼ်ၶဝ်ယုမ်ႇယမ်ဝႃႈ သိုၵ်းၵူၼ်းၼုမ်ႇ PDF တေဢမ်ႇၸၢင်ႈၶဝ်ႈယႃႉၵဝ်း။