ၶွင်ႇသီႇသိုၵ်းမၢၼ်ႈ ယိုတ်းမိူင်း ၶၢၼ်းႁွင်ႉၵူၼ်းဝၢၼ်ႈ ႁႂ်ႈၵႂႃႇတူမ်ႈႁုင်ၶဝ်ႈၽၵ်းလဵင်ႉၶဝ် တီႈၶဝ်ႈပၵ်းပၢင်လိုဝ်ႈသဝ်းၼႂ်းၵျွင်းမုၼ်ၸဝ်ႈ တီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။
မိူဝ်ႈဝႃး ဝၼ်းတီႈ 6/4/2022 ယၢမ်းၵၢင်ဝၼ်း သိုၵ်းမၢၼ်ႈမႃးၶၢၼ်း ၼၢင်းယိင်းသႅၼ်းၶၢဝ်ႉ ၵူၼ်းဝၢၼ်ႈပႄးယိၼ်ႇတွင်ႇထႅင်ႈ 2 ၵေႃႉႁႂ်ႈၵႂႃႇႁဵတ်းၶဝ်ႈၽၵ်းတူမ်ႈႁုင်လဵင်ႉၶဝ် တီႈပၢင်သဝ်းၶဝ်ဢၼ်မီးၼႂ်းဝၢင်းၵျွင်းမုၼ်ၸဝ်ႈတီႈႁူဝ်ဝၢၼ်ႈၼၼ်ႉ။
ၵူၼ်းဝၢၼ်ႈပႄးယိၼ်ႇတွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼႆႉ ၶဝ်မႃးပၵ်းတပ်ႉဝႆႉ တီႈၼႂ်းဝၢင်းၵျွင်းမုၼ်ၸဝ်ႈ တင်ႈတႄႇႁူဝ် လိူၼ်ၼႆႉမႃးယဝ်ႉ။ ယၢမ်းလဵဝ် ႁွင်ႉၵူၼ်းဝၢၼ်ႈ ၵႂႃႇႁဵတ်းၽၵ်းလဵင်ႉၶဝ်ဝႆႉ 4 ၵေႃႉ။ မိူဝ်ႈဝႃးသမ်ႉ ၶိုၼ်းမႃးႁွင်ႉၵႂႃႇထႅင်ႈ 2 ၵေႃႉ။ ၵူၼ်းဝၢၼ်ႈဢမ်ႇၶႂ်ႈၵႂႃႇ ၶဝ်သမ်ႉတဵၵ်းတဵင်ၶၢၼ်းႁွင်ႉ”- ဝႃႈၼႆ။
သိုၵ်းမၢၼ်ႈ ၸိူဝ်းၼႆႉ ၼႄးဝႃႈ ၵူၼ်းဝၢၼ်ႈပႄးယိၼ်ႇတွင်ႇ ၵမ်ႉၸွႆႈသိုၵ်းၵႅတ်ႇၶႄၵူၼ်းမိူင်းၼႆသေ ၵႆႉၸႅတ်ႈထၢမ် ပေႃႉထုပ်ႉ တဵၵ်းၶၢၼ်းၸႂ်ႉၵူၼ်းဝၢၼ်ႈ ။ ႁႂ်ႈၵူၼ်းဝၢၼ်ႈ ဢမ်ႇၶႂ်ႈယူႇသေဢွၼ်ၵၼ်ပၢႆႈ၊ သိုၵ်းမၢၼ်ႈသမ်ႉ လမ်းတီႉ ႁွင်ႉၵူၼ်းဝၢၼ်ႈၶိုၼ်း၊ တဵင်ၵႂၢမ်းၼၵ်းတီႈဝၢၼ်ႈတႂ်ႈဝၢၼ်ႈၼိူဝ်ဝႆႉဝႃႈ သင်ႁၼ်ၵူၼ်းဝၢၼ်ႈ ပႄးယိၼ်ႇတွင်ႇ မႃးသွၼ်ႈယူႇ ႁႂ်ႈပွင်ႇၶၢဝ်ႇၸူးၶဝ်ဝႃႈၼႆထႅင်ႈ။
“ၾၢႆႇၸၢၼ်းဝၢၼ်ႈပေးယိၼ်းတွင်ႇ မွၵ်ႈ 5 လၵ်းၼႆႉ မီးဝႆႉၵဵၵ်ႉ/ လၢၼ်ႇၵူတ်ႇထတ်း ။ သိုၵ်းမၢၼ်ႈၵႂႃႇလၢတ်ႈဝႆႉတီႈၵဵၵ်ႉ ၼၼ်ႉဝႃႈ ပေႃးႁၼ်ၵူၼ်းဝၢၼ်ႈပႄးယိၼ်ႇ ပၢႆႈဢွၵ်ႇမႃးႁႂ်ႈတီႉၺွပ်းၵမ်းလဵဝ်။ ၵႂႃႇလၢတ်ႈတီႈဝၢၼ်ႈႁိမ်းႁွမ်းဝႃႈ တေဢမ်ႇလႆႈႁပ်ႉၵူၼ်းဝၢၼ်ႈပႄးယိၼ်ႇမႃးသွၼ်ႈယူႇသဝ်း ”- ၵူၼ်းပိုၼ်ႉတီႈ သိုပ်ႇလၢတ်ႈၼႄ ၼင်ႇၼႆ။
ၵူၼ်းဝၢၼ်ႈၸိူဝ်းပၢႆႈၵႂႃႇသွၼ်ႈယူႇသဝ်းတၢင်ႇတီႈတၢင်ႇဝၢၼ်ႈၼၼ်ႉၵေႃႈသိုၵ်းမၢၼ်ႈသွၵ်ႈတဝ်ယႃႉၵဝ်းႁိူၼ်းယေး ဢဝ်ၶူဝ်းၶွင်ၶဝ်ၵႂႃႇၵေႃႈမီးတင်းၼမ်- ၵူၼ်းဝၢၼ်ႈလၢတ်ႈၼင်ႇၼႆ။
ယွၼ်ႉပိူဝ်ႈသိုၵ်းမၢၼ်ႈ မႃးပၵ်းပၢင်သဝ်းယူႇၼႂ်းဝၢၼ်ႈပႄးယိၼ်ႇတွင်ႇသေ ပၵ်းတႃပႂ်ႉတူၺ်းၵူၼ်းဝၢၼ်ႈဢမ်ႇပၼ်ၶဝ်ႈဢွၵ်ႇ ၵႂႃႇမႃးလႄႈႁဵတ်းႁႂ်ႈၵူၼ်းဝၢၼ်ႈ ဢမ်ႇၸၢင်ႈၵႂႃႇၵႃႉၶၢႆ/ သိုဝ်ႉၶူဝ်းၵုၼ်ႇၵိၼ်ယမ်ႉ၊ ဢမ်ႇၸၢင်ႈၵႂႃႇလဵင်ႉဝူဝ်းၵႂၢႆးၼႂ်းႁႆႈၼႂ်းသူၼ်။
