သိုၵ်းမၢၼ်ႈ ပၼ်တၢမ်ႇၶွၵ်ႈၼၵ်ႉၶၢဝ်ႇလႄႈ ၽူႈႁၢပ်ႇၵၢၼ်ၼႂ်းႁူင်းႁဵၼ်း TSYU

ၶွင်ႇသီႇသိုၵ်းမၢၼ်ႈ ယိုတ်းမိူင်း ပၼ်တၢမ်ႇၶွၵ်ႈ ၽူႈသိုဝ်ႇၶၢဝ်ႇ ၼၢင်းယိင်း ၵေႃႉၼိုင်ႈလႄႈ ၽူႈႁၢပ်ႇၵၢၼ် ၼႂ်းႁူင်းႁဵၼ်းၵူၼ်းၼုမ်ႇတဢၢင်း TSYU  ၵေႃႉၼိုင်ႈ –  တီႈၶွၵ်ႈလူင် ဝဵင်းလႃႈသဵဝ်ႈ ၸိုင်ႈတႆးႁွင်ႇ။  

မိူဝ်ႈၼႆႉ ဝၼ်းတီႈ 7/4/2022 ယၢမ်းၵၢင်ၼႂ် သိုၵ်းမၢၼ်ႈပိုၼ်ၽၢဝ်ႇ ပၼ်တၢမ်ႇၶွၵ်ႈလူၺ်းဢၢမ်းၽွင် (လွေးအမ်ဖောင်) ၽူႈသိုဝ်ႇၶၢဝ်ႇၵဝ်ႇ ၶွင်ၸုမ်းၶၢဝ်ႇသူၺ်ႇၽီႇမျေႇလႄႈ မၢႆးတႅတ်ႉၼၢႆႇဢူး (မိုင်းသက်နိုင်ဉီး) ၽူႈႁၢပ်ႇၵၢၼ် ၼႂ်းႁူင်းႁဵၼ်းၵူၼ်းၼုမ်ႇတဢၢင်း (TSYU) ။

ၽူႈထတ်းလိၵ်ႈ ၸုမ်းၶၢဝ်ႇသူၺ်ႇၽီႇမျေႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လူၺ်းဢၢမ်းၽွင်ၼႆႉ ၺႃးၸွႆးတြႃး မတ်ႉတႃ 505 (ၵ) သေ ၶဝ်တႅပ်းတတ်း ပၼ်တၢမ်ႇတူၵ်းၶွၵ်ႇမၼ်းၼၢင်း 2 ပီ။  တႅပ်းတတ်းတြႃး  ၵႂႃႇမိူဝ်ႈၼႆႉ တီႈၶွၵ်ႈလႃႈသဵဝ်ႈ။ ယၢမ်းလဵဝ် မၼ်း ၼၢင်းမီးဝႆႉ ၼႂ်းၶွၵ်ႈလႃႈသဵဝ်ႈၶႃႈ”- ဝႃႈၼႆ။

လိူဝ်ၼၼ်ႉ မၢႆးတႅတ်ႉၼၢႆႇဢူးၵေႃႈ ၺႃးၸွႆးတြႃး မတ်ႉတႃ 52 (ၵ) သေ ထုၵ်ႇပၼ်တၢမ်ႇတူတ်ႈၶွၵ်ႈ 7 ပီ တီႈၶွၵ်ႈလႃႈသဵဝ်ႈ မိူဝ်ႈၼႆႉ ဝၼ်းတီႈ 7 မိူၼ်ၵၼ်။  

လူၺ်းဢၢမ်းၽွင်  ၼႆႉ ထုၵ်ႇသိုၵ်းမၢၼ်ႈ တီႉၺွပ်းၵႂႃႇ မိူဝ်ႈဝၼ်းတီႈ 25/9/2021 ။ မၢႆးတႅတ်ႉၼၢႆႇဢူး ၽူႈ ႁၢပ်ႇၵၢၼ် ၼႂ်း ႁူင်းႁဵၼ်းၵူၼ်းၼုမ်ႇတဢၢင်း TSYU သမ်ႉ ထုၵ်ႇတီႉၺွပ်းၵႂႃႇ မိူဝ်ႈ 26/9/2022 ၼႆယဝ်ႉ။

မိူၼ်ၼႆ ၼင်ႇၵဝ်ႇ ၶူးသွၼ် တီႈႁွင်ႈႁဵၼ်းပၢႆးပၺ်ႇၺႃႇ ပရႁိတ တဢၢင်း TEC မၢႆးၼၢႆႇဝိၼ်း (မိုင်းနိုင်ဝင်း)တင်း မၢႆးၺီႇလွႆႇ (မိုင်းညီလွယ်)  သွင်ၵေႃႉၼႆႉၵေႃႈ ထုၵ်ႇသိုၵ်းမၢၼ်ႈတီႉၺွပ်းၵႂႃႇ မိူဝ်ႈ 25/9/2021 ။ ၵူၺ်းၵႃႈ တႃႇသွင်ၵေႃႉၼႆႉ ပႆႇတႅပ်းတတ်းပၼ်တူတ်ႈတၢမ်ႇသင် တိုၵ်ႉထုၵ်ႇၸွႆး တြႃးဝႆႉ တီႈၼႂ်းၶွၵ်ႇလႃႈသဵဝ်ႈ ဝႆႉယူႇ။

လိူဝ်ၼၼ်ႉ မိူဝ်လိူဝ်ၼၼ်ႉ မိူဝ်ႈဝၼ်းတီႈ 5/4/2022   သိုၵ်းမၢၼ်ႈ ပၼ်တၢမ်ႇၶွၵ်ႈ မွင်ႇၵျေႃႇၸိၼ်ႇၶၢၼ်ႉ ဢႃယု 20 ပီ ယူႇပွၵ်ႈၵျွင်းၵျီးသူႉ ဝဵင်း တူၼ်ႈတီး ဢၼ်ၺႃးၶင်ၶွၵ်ႈတွင်ႇလေးလူင်းဝႆႉၼၼ်ႉၵေႃႈ ၺႃးတၢမ်ႇၶွၵ်ႈတႃႇ 30 ပီ ။ မၼ်းၸၢႆးၼႆႉ ထုၵ်ႇတီႉၺွပ်းၵႂႃႇ မိူဝ်ႈလိူၼ်ၵျုႊလၢႆႊ 2021 ။

ၼႂ်းလိူၼ်ဢေႊပရိူဝ်ႊၼႆႉသိုၵ်းမၢၼ်ႈတႅပ်းတတ်းတြႃးပၼ်တူတ်ႈတၢမ်ႇၵူၼ်းၼုမ်ႇတူၵ်းၶွၵ်ႈ ပီႈယၢဝ်း တင်းၼမ်။ ၵူၼ်းၼုမ်ႇၸိူဝ်းၼႆႉ သိုၵ်းမၢၼ်ႈၼႄးဝႃႈ ၶဝ်ႈပႃးၸွႆႈထႅမ် ၵူၼ်းၼႄၵၢင်ၸႂ်သၢၼ်ၶတ်းၸဝ်ႈဢႃႇၼႃႇသိုၵ်း၊ ၵမ်ႉၸွႆႈသိုၵ်းၵႅတ်ႇၶႄၵူၼ်းမိူင်း PDF ၼႆၸိူဝ်းၼႆႉသေဢမ်ႇၵႃးၸိူဝ်းပဵၼ်ၽူႈသိုဝ်ႇၶၢဝ်ႇၵေႃႈသိုၵ်းမၢၼ်ႈၼႄးဝႃႈ တႅမ်ႈၶၢဝ်ႇယႃႉသလေႇၼႃႈတႃ သိုၵ်းမၢၼ်ႈ၊  ႁဵတ်းႁႂ်ႈၵၢၼ်ပွင်ၸိုင်ႈမိူင်းၵိုတ်းၶၢတ်ႇၼႆသေ မၢပ်ႇမႂ်တီႉၺွပ်းၶင်ၶွၵ်ႈဢဝ်လိူင်ႈၸွႆးတြႃးဝႆႉလွၼ်ႉလွၼ်ႉ။