မိူဝ်ႈၼႆႉ ဝၼ်းတီႈ 7/4/2022 ယၢမ်းၵၢင်ဝၼ်း 11:50 မူင်း ၵူၼ်းဢမ်ႇႁူႉၾၢႆႇ ၵႂႃႇပွႆႇမၢၵ်ႇသႂ်ႇတီႈ  ပၢင်သွၼ်ၵၢၼ်သိုၵ်း  ပျီႇတူႉၸိတ်ႉ ႁိမ်းတႃႈရူတ်ႉ (သိန်းသန်း ချီကားကြီးကွင်း ) ၼႂ်းၸႄႈဝဵင်းမူႇၸေႊ တႅၵ်ႇ 2 လုၵ်ႈ ထပ်းၵၼ်။

ၵူၼ်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မိူဝ်ႈၵႆႈၼႆႉ ယၢမ်းၵၢင်ဝၼ်း 11:50 မူင်း မီးၵူၼ်းဢမ်ႇႁူႉၾၢႆႇ ၵႂႃႇယိုဝ်းမၢၵ်ႇလူင်သႂ်ႇ ဢွင်ႈတီႈၵၢၼ်သွၼ်သိုၵ်း ၶွင်ပျီႇတူႉၸိတ်ႉ တႅၵ်ႇ 2 လုၵ်ႈထပ်းၵၼ်ၼႆၶႃႈ။ ဢွင်ႈတီႈၼၼ်ႈ မၼ်းမီးတီႈလိၼ်ပဝ်ႇဝႆႉလွၵ်းၼိုင်ႈ။  ပျီႇတူႇၸိတ်ႉၶဝ်မႃးၾိုၵ်းၵၢၼ်သိုၵ်းပၼ်ၵၼ်တီႈၼၼ်ႈၶႃႈဢေႃႈ။ ပဵၼ်ပျီႇတူႉၸိတ်ႉၸုမ်းလႂ်ဢမ်ႇႁူႉၶႃႈ ”- ဝႃႈၼႆ။

ဢွင်ႈတီႈႁိမ်းတႃႈရူတ်ႉၼၼ်ႉ မီးဝႆႉႁၢၼ်ႉၶၢႆၶဝ်ႈၽၵ်း (ပွဲတော်ထမင်းဆိုင်) တင်းလင် ႁၢၼ်ႉၶၢႆၶဝ်ႈၽၵ်းၼၼ်ႉ မီးဝႆႉပၢင်တေႃႇလွင်း။  ၼႂ်းၵႄႈႁၢၼ်ႉၶၢႆၶဝ်ႈၽၵ်းလႄႈ ပၢင်တေႃႇလွင်းၼၼ်ႉ ပဵၼ်လွၵ်းလိၼ်ပဝ်ႇတီႈၸုမ်းပျီႇတူႉၸိတ်ႉ ၾိုၵ်းၵၢၼ်သိုၵ်း။

 မၢၵ်ႇလူင်ၼၼ်ႉပဵၼ်ၽႂ်မႃးယိုဝ်းၵေႃႈဢမ်ႇႁူႉ။ ယွၼ်ႉပိူဝ်ႈယိုဝ်းမၢၵ်ႇလူင်ၼၼ်ႉသေ လွင်ႈမၢတ်ႇၸဵပ်းလူႉတၢႆမီးၵႃႈႁိုဝ်ၵေႃႈဢမ်ႇႁူႉ။   ၽူႈမီးပုၼ်ႈၽွၼ်း တိုၵ်ႉၵူတ်ႇထတ်းတူၺ်း လွင်ႈပိူင်ပဵၼ် မၼ်းယူႇ ဝႃႈၼႆ။

 တီႈဝဵင်းမူႇၸေႊၼႆႉ မီးၸုမ်းပျီႇတူႉၸိတ်ႉတင်းၼမ်။ မၢင်ၸုမ်းမီးၵူၼ်းသိပ်းၵူၼ်းသၢဝ်း။ မၢင်ၸုမ်းၵေႃႈမီး ဢဵၼ်ႁႅင်းၼမ်။

ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ၼႂ်းၸႄႈဝဵင်းမူႇၸေႊ ၵႆႉမီးလွင်ႈပိုတ်းယိုဝ်းၵၼ်မႃးၶိူဝ်းယႂ်း။  မိူဝ်ႈဝၼ်းတီႈ 8/3/2022 ၼၼ်ႉၵေႃႈ မီး ၵူၼ်းဢမ်ႇႁူႉၾၢႆႇ ယိုဝ်းၵွင်ႈသႂ်ႇ ၼႂ်းႁိူၼ်းပၢင်မႃႇသႃႇ (ႁိူၼ်းပျီႇတူႉၸိတ်ႉ) လင်ၼိုင်ႈ တီႈပွၵ်ႉႁွင်ႇ ၸႄႈဝဵင်းမူႇၸေႊ ပျီႇတူႉၸိတ်ႉ ဢၼ်ဢဝ် ႁူမ်ႇလူမ်ႈပႂ်ႉတီႈႁိူၼ်းၼၼ်ႉ တိူဝ်ႉမၢတ်ႇ လူႉတၢႆ 2 ၵေႃႉ၊ မၢတ်ႇၸဵပ်း 2 ၵေႃႉ။