ၵူၼ်းမိူင်း ယၢင်းလႅင် ဢၼ်ပၢႆႈမႃးသွၼ်ႈဝႆႉတီႈ ဝဵင်းသီႇသႅင်ႇ ႁူဝ်ၵူၼ်း 3 ႁဵင်ပၢႆၼႆႉ ထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း ယၢမ်းလဵဝ် လူဝ်ႇတၢင်း ၸွႆႈထႅမ် ၶဝ်ႈၼမ်ႉတၢင်းၵိၼ်။
ၽူႈၸွႆႈထႅမ် ၵူၼ်းပၢႆႈၽေးသိုၵ်း သီႇသႅင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ဢၼ်ယၢပ်ႇၽိုတ်ႇႁႅင်းတႄႉ ပဵၼ်ၶဝ်ႈၼမ်ႉတၢင်း ၵိၼ်ၼႆႉၶႃႈဢေႃႈ။ ၸဝ်ႈတႃႇၼ ဢၼ်တေမႃးၵမ်ႉၸွႆႈ မိူၼ်မိူဝ်ႈၵူႈပွၵ်ႈၼၼ်ႉဢမ်ႇမီးယဝ်ႉဢေႇလူင်း တင်းၼမ်ၶႃႈ။ ယဝ်ႉၵေႃႈ ၼမ်ႉၵိၼ်ၸႂ်ႉ ၸိူဝ်းၼႆႉၵေႃႈ ယၢပ်ႇၽိုတ်ႇဢေႃႈ ႁူႉယူႇၼၼ်ႉၼႃႇ တီႈသီႇသႅင်ႇ၊ သၢႆးၶၢဝ်ၼႆႉ မၼ်းယၢပ်ႇၽိုတ်ႇႁႅင်း လွင်ႈၼမ်ႉၵိၼ်ၼမ်ႉၸႂ်ႉၶၢဝ်းၼႆႉ ၵွပ်ႈၼႆ လႄႈ လူဝ်ႇတၢင်းၸွႆႈထႅမ်ႁႅင်းၶႃႈဢေႃႈ”- ဝႃႈၼႆ။
ၵွပ်ႈၼႆ ၼင်ႇႁိုဝ် ပေႃးတေမီးတၢင်းဢွၵ်ႇ ႁႂ်ႈပေႃးမႃးၵမ်ႉၸွႆႈၶိုၼ်း တူဝ်ၽႂ်မၼ်းၼၼ်ႉ ၵူၼ်းပၢႆႈၽေး မၢင်ၵေႃႉ ႁႃႁဵတ်းၵၢၼ်ၵိၼ်ၸၢင်ႈၸွမ်း လၢႆး ဝၼ်း မိူၼ်ၼင်ႇ ၵၢၼ်ထူၺ်ႈၽၵ်းမီႇ၊ ၵၢၼ်ၵေႃႇသၢင်ႈ၊ ၵၢၼ်ၶုတ်းႁွင်ႈ လၢင်းႁွင်ႈ ၸိူဝ်းၼႆႉ။
“ၵွပ်ႈၼႆလႄႈ သင်ဝႃႈ ၸဝ်ႈၵၢၼ်/ပေႃႈလဵင်ႉႁဝ်းၶႃႈ ၼႂ်းသီႇသႅင်ႇ မီးၵၢၼ်သင် လူဝ်ႇႁဵတ်းၼႆ ၶႅၼ်းတေႃး မႃးႁွင်ႉ ၸၢင်ႈၵူၼ်းပၢႆႈၽေး မိူဝ်ႈႁဵတ်းၵၢၼ်ၸွမ်းၽွင်ႈၶႃႈ။ ၼင်ႇႁိုဝ် ၵူၼ်းပၢႆႈၽေး ပေႃးတေမီးငိုၼ်းၶဝ်ႈတႃႇၶဝ်ၽွင်ႈ။ မီးၵၢၼ်သင်ၵေႃႈ ၶႅၼ်းတေႃႈမွၵ်ႇမႃးၽွင်ႈ ၵူၼ်းပၢႆႈၽေးတႄႉ ဢမ်ႇလိူၵ်ႈၵၢၼ်သင် မွင်းႁႂ်ႈမီးၵၢၼ်ၵူၺ်းၶႃႈ”- ၽူႈၸွႆႈထႅမ်ၵူၼ်းပၢႆႈၽေး သိုပ်ႇလၢတ်ႈၼႄၼင်ႇၼႆ။
သိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်း မိူင်း PDF ပိုတ်းယိုဝ်းၵၼ်ႁၢဝ်ႈႁႅင်းလႄႈ တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊမႃးတေႃႇထိုင်ႁူဝ်လိူၼ်ဢေႊပရိူဝ်ႊ 2022 ၶၢဝ်းတၢင်း 3 လိူၼ်ပၢႆၵူၼ်းမိူင်းယၢင်းလႅင် ဢိၵ်ႇ ၵူၼ်းမိူင်းပၢႆး၊ ၾၢႆၶုၼ် လႅၼ်လိၼ် တႆး-ယၢင်းလႅင် ႁူဝ်ၵူၼ်း 3000 ပၢႆ ပၢႆႈမႃးသွၼ်ႈ ဝႆႉ ၸွမ်းဝတ်ႉမုၼ်ၸဝ်ႈ၊ ၸွမ်းႁိူၼ်းယေးပီႈၼွင်ႉၵူၼ်းဝၢၼ်ႈလႄႈ ၸွမ်းထမ်ႇမရူင်ႇ ၼႂ်းၸႄႈဝဵင်း သီႇသႅင်ႇ ၸိုင်ႈတႆးပွတ်းၸၢၼ်း ။ ယၢမ်းလဵဝ် လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉ ႁၢဝ်ႈႁႅင်း ယွၼ်ႉၸဝ်ႈတႃႇၼ ဢၼ်ယၢမ်ႈမႃးၸွႆႈထႅမ်ၼႆႉ လူတ်းယွမ်းလူင်းၼမ်လႄႈ ဢမ်ႇပေႃးမီးၽႂ်မႃးၸွႆႈ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ