ၼႂ်းၸိုင်ႈတႆးပွတ်းၸၢၼ်းပီၼႆႉ ၼမ်ႉႁႅင်ႈႁၢႆႉႁႅင်းလိူဝ်တၢင်ႇပီ

ၼႂ်းၸိုင်ႈတႆး ပွတ်းၸၢၼ်း ၼမ်ႉၸၢင် လွႆလႅမ် တူၼ်ႈတီး လၢႆၸႄႈဝဵင်း ၼမ်ႉမေႃႇၼမ်ႉၼွင်ႁႅင်ႈၸဝ်ႉ ႁႅင်ႈႁႅင်းလိူဝ်ၵူႈပီ ၵူၼ်းမိူင်းယၢပ်ႇၽိုတ်ႇၼမ်ႉၵိၼ်ၼမ်ႉၸႂ်ႉ ။

ပီၵွၼ်ႇပူၼ်ႉမႃးဝၢႆးလင်သၢင်းၵျၢၼ်ႇ ၼႂ်းႁၢင်လိူၼ်ဢေႊပရိူဝ်ႊ ၵႂႃႇၼမ်ႉၸင်ႇတေတႄႇယၢပ်ႇ၊ ပီႈၼႆႉတႄႉတႄႇဢဝ်လိူၼ်မၢတ်ႊၶျ် 2022 ၼႆႉမႃး  ၼမ်ႉပေႃးဢမ်ႇၶႂ်ႈမီးယဝ်ႉ ၸဵမ်ၼမ်ႉမေႃႇ ၼမ်ႉတိုင်း ႁႅင်ႈၵူႈတီႈ ၵူၼ်းၼမ်ႉၸၢင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

  “တႄႇဢဝ် လိူၼ်သီႇတႆး လိူၼ်ႁႃႈ – ႁူၵ်ႈ ၸိူဝ်းၼႆႉ ၼမ်ႉမေႃႇၼႆႉ ႁႅင်ႈႁႅင်းၼႃႇယဝ်ႉ ၸွမ်း သၢပ်ႇဝဵင်း၊ ၼႂ်းဝဵင်းၼမ်ႉၸၢင် ၸိူဝ်းၼႆႉ။ တၢင်းပၢင်ႇလႅင်း ၸိူဝ်းၼၼ်ႉၵေႃႈ  ၼမ်ႉမေႃႇပေႃးႁႅင်ႈၼႃႇယဝ်ႉ ပေႃးလႆႈသိုဝ်ႉ ၸႂ်ႉဢဝ်ၶႃႈဢေႃႈ ။  ၼႂ်းဝဵင်း ယိင်ႈၶႅၼ်း ယၢပ်ႇၽိုတ်ႇႁႅင်းၶႃႈဢေႃႈ”- ဝႃႈၼႆ။

တီႈဝဵင်းၼမ်ႉၸၢင်ၼႆႉမီးၼမ်ႉလၢတ်ႈလႆလတ်းၵၢင်ဝဵင်း၊ ၵူႈပီတႄႉ ၼမ်ႉသႂ် ၼမ်ႉၶႅမ်ႉလိူင်ႇၼမ်သေတႃႉ ၼႂ်းၶၢဝ်းတၢင်း 2-3 ပီၼႆႉမႃး ၼမ်ႉႁႅင်ႈ ။ ၼမ်ႉမေႃႇၵေႃႈႁႅင်ႈလိူဝ်ႁႅင်း။ ၵူၼ်းပိုၼ်ႉတီႈတႄႉလၢတ်ႈဝႃႈ ပဵၼ်ယွၼ်ႉပႃႇထိူၼ်ႇလူႉဝႃႈၼႆ။

“ၵွၼ်ႇၼႃႈ 2-3 ပီၼၼ်ႉ တီႈၼမ်ႉၸၢင်ၼႆႉ ၼမ်ႉဢမ်ႇႁႅင်ႈႁႅင်းပဵၼ်ထၢၼ်ႇၼႆႉ။ ဝၢႆးၼၼ်ႉမႃး  ပႃႇထိူၼ်ႇလူႉ၊ ၸွမ်းႁူၺ်ႈၸွမ်းလွႆ ဢမ်ႇမီးတူၼ်ႈမႆႉတူၼ်ႈတွၵ်ႇယဝ်ႉလႄႈ ၼမ်ႉႁႅင်ႈႁႅင်းဢေႃႈ။ မၢင်ႁိၼ်းၼမ်ႉမေႃႇၶဝ်ႁႅင်ႈ သမ်ႉပေႃးဢမ်ႇမီးၼမ်ႉၸႂ်ႉဢေႃပီၼႆ။ ”- ၵူၼ်း  ၼမ်ႉၸၢင်ႈ သိုပ်ႇလၢတ်ႈၼႄၼင်ႇၼႆ။

 ဝၢၼ်ႈဢၼ်ယၢပ်ႇၽိုတ်ႇလွင်ႈၼမ်ႉ တီႈဝဵင်းၼမ်ႉၸၢင်ၼႆႉပဵၼ်ဝၢၼ်ႈမၢၵ်ႇမူင်ႈ၊ ဝၢၼ်ႈယၢင်း၊ ဝၢၼ်ႈမၢႆ 5 ၊ မၢႆ 6 လႄႈ မၢႆ 7 ၸိူဝ်းၼႆႉ။ ပေႃးသိုဝ်ႉၼမ်ႉဢၼ်တၢင်ႇထူဝ်ႈမႃးၶၢႆသမ်ႉလႆႈပၼ် 1 လမ်း 6 ႁဵင်ပျႃး။ ပေႃးၵူၼ်းႁိူၼ်းၼမ် ၸႂ်ႉၼမ်ႉၼမ်ၸိုင် ထူဝ်ႈၼိုင်ႈလမ်း ၵုမ်ႇလႆႈ မွၵ်ႈ 3 ဝၼ်း။ သင်ပႅင်းၸႂ်ႉၼႆ တေၵုမ်ႇလႆႈႁိုင် မွၵ်ႈ 6 ဝၼ်း။

မိူၼ်ၼၼ်ၼင်ႇၵဝ်ႇၼႂ်း ၸႄႈဝဵင်းတူၼ်ႈတီးၵေႃႈပီၼႆႉ တၢင်းပွၵ်ႉၵျွင်းၵျီးသူႉ၊ ဝႃးပျႃး ၸိူဝ်းၼႆႉ ၼမ်ႉမေႃႇႁႅင်ႈ ၊ ၼမ်ႉၼွင်ဢွၼ်ႇၸိူဝ်းမီးသၢပ်ႇဝဵင်း ႁိမ်းဝဵင်း ၼႂ်းဝဵင်းၵမ်ႈၽွင်ႈ ႁႅင်ႈလႅင်ႉလိူဝ်ႁႅင်း။  

ၵူၼ်းၼုမ်ႇ တူၼ်ႈတီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈတူၼ်ႈတီးၼႆႉ ဢၼ်ၼမ်ႉႁႅင်ႈႁႅင်းၼႃႇၼႆႉ ပဵၼ်တီႈပွၵ်ႉၵျွင်းၵျီးသူႉ လႄႈ ဝႃးပျႃးၶႃႈဢေႃႈ။ ယွၼ်ႉဝႃႈ ႁိူၼ်းၶဝ် တိတ်းၵၼ်ႁႅင်းၼႃႇလႄႈ တူၼ်ႈမႆႉ  ၵေႃႈ ဢမ်ႇမီး ဢမ်ႇၵုမ်းထိင်းပၼ်ၼမ်ႉၶဝ်လႆႈၵွပ်ႈၼႆလႄႈ ၼမ်ႉ ၼႆႉ ဢေႇမႃးၵူႈပီ။  တင်းဝၼ်းၼႆႉ လႆႈၸႂ်ႉၼမ်ႉ  ပုင်းလဵဝ်ၵူၺ်း  ၊ ပၢႆလိူဝ်ၾႆးၵႆႉမွတ်ႇ ၼမ်ႉသမ်ႉႁႅင်ႈထႅင်ႈ တၢင်ႇၼမ်ႉၵေႃႈဢမ်ႇၶိုၼ်ႈ၊ ၵႂႃႇတၵ်းတီႈၼွင်ၵေႃႈ ၼွင်သမ်ႉႁႅင်ႈႁဵတ်းၼႆဢေႃႈ”- ဝႃႈၼႆ။

ၼွၵ်ႈလိူဝ်ၼၼ်ႉ မိူၼ်ၼင်ႇ ၼႂ်းၸႄႈဝဵင်းပၢင်လွင်း၊ သီႇသႅင်ႇ ၸိူဝ်းၼႆႉၵေႃႈ ၼမ်ႉႁႅင်ႈႁႅင်း မိူၼ်ၵၼ် ၵူၼ်းပိုၼ်ႉတီႈ/ ၵူၼ်းပၢႆႈၽေးသိုၵ်း  ဢွၼ်ၵၼ်ထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း ၼႆယဝ်ႉ။