မိူဝ်ႈၼႆႉ ဝၼ်းတီႈ 4/4/2022 တႄႇဢဝ် ယၢမ်းၵၢင်ၼႂ် တေႃႇထိုင် ၵၢင်ဝၼ်းမွၵ်ႈ 12 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶႄႇၵဝ်ႈ ၵၢင်ႉ MNDAA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇမိူင်းပေႃႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ၼႂ်းဢိူင်ႇမိူင်းပေႃႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၼႆႉ သိုၵ်းမၢၼ်ႈတင်း သိုၵ်း ၵူဝ်းၵၢင်ႉ ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈၵွင်းမၢၵ်ႇၶီႈၼူၼၼ်ႉၶႃႈ”- ဝႃႈၼႆ။
မိူဝ်ႈဝႃး ဝၼ်းတီႈ 3 ယၢမ်းဝၢႆးဝၼ်း 2 မူင်း ထိုင် 5 မူင်းၶိုင်ႈၼၼ်ႉၵေႃႈ သိုၵ်းမၢၼ်ႈတင်း သိုၵ်းၶႄႇၵဝ်ႈၵၢင်ႉ ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈႁိမ်း ဝၢၼ်ႈၼွင်ၶမ်း ဢိူင်ႇမိူင်းပေႃႈ တင်းၾၢႆႇသိုၵ်းၶႄႇၵဝ်ႈၵၢင်ႉ လႆႈထွႆထွၼ်ပၼ် ။
“တီႈၵွင်းမၢၵ်ႇၶီႈၼူၼၼ်ႉ ပဵၼ်ဢွင်ႈတီႈသိုၵ်းၵူဝ်းၵၢင်ႉၶဝ်ပၵ်းတပ်ႉဝႆႉ။ ၵွပ်ႈၼႆလႄႈ ၶဝ်ပဵၼ်ပၢင်တိုၵ်းၵၼ် ႁိမ်းၼၼ်ႉသေ သိုၵ်းမၢၼ်ႈ ဢဝ်မၢၵ်ႇ လူင် ယိုဝ်းသႂ်ႇတီႈၵွင်းၼၼ်ႉ။ သိုၵ်းၵူဝ်းၵၢင်ႉတႄႉ ထွႆထွၼ်ပၼ်ယဝ်ႉ”- ၵူၼ်းပိုၼ်ႉတီႈ မိူင်းပေႃႈ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈပၢင်တိုၵ်းၼႆႉသေ ၵူၼ်းမၢၼ်ႈပဵင်းတင်း ဝၢၼ်ႈၵၢတ်ႇ ၵမ်ႈၽွင်ႈတႄႉ လႆႈဢွၼ်ၵၼ် ငိူင်ႉပၢႆႈၽေးသိုၵ်းၵၼ်ဝႆႉ ၸူဝ်ႈၶၢဝ်း။
ၵူၼ်းၼုမ်ႇ ဢိူင်ႇမိူင်းပေႃႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ပၢင်တိုၵ်းယဵၼ်လူင်းၽွင်ႈယဝ်ႉ။ ၵူၼ်းပၢႆႈၽေးသိုၵ်း ဢၼ်လႆႈငိူင်ႈပၢႆႈၵႂႃႇၼၼ်ႉ ဢွၼ်ၵၼ်ပွၵ်ႈၶိုၼ်းမႃးယဝ်ႉ။ တီႈၵွင်းမၢၵ်ႇၶီႈၼူၼၼ်ႉ သိုၵ်းမၢၼ်ႈ ၵႂႃႇပၵ်းတပ်ႉၶဝ်ဝႆႉ။ ယဝ်ႉၵေႃႈ ထႅမ်ႁႅင်းသိုၵ်းဝႆႉထႅင်ႈ တင်းၼမ်”- ဝႃႈၼႆ။
ပၢင်တိုၵ်း ဢၼ်ပဵၼ်ယူႇၼႆႉ တပ်ႉသိုၵ်းမၢၼ်ႈသမ်ႉ ပဵၼ်တပ်ႉၵွင် 402 တႂ်ႈတပ်ႉမ 99 တင်း သိုၵ်းၶႄႇၵဝ်ႈၵၢင်ႉ MNDAA ။ ပူၼ်ႉမႃး မိူဝ်ႈႁၢင် လိူၼ်မၢတ်ႊၶျ်ၼၼ်ႉၵေႃႈ သိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ်ႁၢဝ်ႈႁႅင်း မိူၼ်ၵၼ်။
