ၽူႈၸၢႆးၵေႃႉၼိုင်ႈၵူၼ်းယႂႃႇငၢၼ်ႇ ဢၼ်ၸိုဝ်ႈလိုဝ်းဝႃႈပဵၼ်ၻလၢၼ်ႇ ၵူၼ်းသူင်ႇၶၢဝ်ႇ/ သၢႆၸွပ်ႇ ၶွင်ႇသီႇသိုၵ်းမၢၼ်ႈ ၼႆၼၼ်ႉ ၺႃးၵူၼ်းၸုမ်းၼိုင်ႈမႃးၶႃႈႁႅမ်တၢႆ ၽွင်းမၼ်းၵႂႃႇဢႅဝ်ႇႁိူၼ်းပီႈၼွင်ႉမၼ်းၸၢႆး ။
မိူဝ်ႈဝၼ်းတီႈ 29/3/2022 ယၢမ်းၵၢင်ၶမ်ႈမွၵ်ႈ 9 မူင်း ၵူဝ်ႇၺီႇထူၺ်း ၽူႈသူင်ႇၶၢဝ်ႇပၼ် ၶွင်ႇသီႇသိုၵ်းမၢၼ်ႈ ယိုတ်းမိူင်း ထုၵ်ႇၸုမ်း ၵူၼ်းဢမ်ႇ ႁူႉၾၢႆႇ ၶႃႈႁႅမ်တၢႆ တီႈဝၢၼ်ႈဢလႄႇၶျွင်ႇ (အလယ်ချောင်ကျေးရွာ) ပွၵ်ႉၵုင်းဝၼ်းတူၵ်း(အနောက်ကုန်းရပ်ကွက်) ၸႄႈဝဵင်းယႂႃႇငၢၼ်ႇ ၸိုင်ႈတႆး ပွတ်းၸၢၼ်း ၼႆယဝ်ႉ။
ၵူၼ်းပိုၼ်ႉတီႈ ယႂႃႇငၢၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸိုဝ်ႈမၼ်းၸၢႆး ႁွင်ႉၵူဝ်ႇၺီႇထူၺ်း။ မၼ်းၸၢႆးယူႇပွၵ်ႉ ဝၢၼ်ႈလူင် (ရွာမရပ်ကွက်) မႃး ဢႅဝ်ႇ တီႈႁိူၼ်းပီႈၼွင်ႉမၼ်း တီႈပွၵ်ႉၵုင်းတူၵ်း (အနောက်ကုန်းရပ်ကွက်) သေ ထုၵ်ႇၶႃႈႁႅမ်တၢႆတီႈၼၼ်ႈ။ ယွၼ်ႉမၼ်းၸၢႆးၵႆႉပၼ်ၶၢဝ်ႇသိုၵ်းမၢၼ်ႈလႄႈ ၵူၼ်း ဝၢၼ်ႈတႄႉ ဢွၼ်ၵၼ်ၸၢၼ်ႈ/ၵူဝ်မၼ်းတင်းဝၢၼ်ႈၶႃႈဢေႃႈ။ ဢၼ်မၼ်းၸၢႆးၵႂႃႇဢႅဝ်ႇတီႈႁိူၼ်းၼၼ်ႉၵေႃႈ မိူၼ်ၵၼ်ၶႃႈယဝ်ႉ ၶဝ်ၵွင်ႉၵၢႆႇၵၼ် တၢင်းသိုၵ်း ”- ဝႃႈၼႆ။
ၵူဝ်ႇၺီႇထူၺ်းၼႆႉၺႃးတႅင်း ၸွမ်းတူဝ်မၼ်း လၢႆလၢႆၵမ်း လူႉတၢႆ ထင်တီႈ ၼႂ်းႁိူၼ်းၼၼ်ႉၵမ်းလဵဝ်။
ဝၢႆးလင်မၼ်းၺႃးတႅင်းဢမ်ႇႁိုင်သင် ၵႃးသိုၵ်းမၢၼ်ႈလႄႈ ၵႃးႁူင်းယႃ ႁွတ်ႈထိုင်မႃးသေ တၢင်ႇဢဝ်တူဝ်တၢႆမၼ်းၵႂႃႇ။
“ဝၢႆးသေ မၼ်းၸၢႆးထုၵ်ႇၶႃႈတၢႆယဝ်ႉ ယူႇဢမ်ႇႁိုင် ၵႃးသိုၵ်းမၢၼ်ႈ ႁွတ်ႈထိုင်မႃး တီႉဢဝ်ၵႂႃႇၵူၼ်းႁိူၼ်းၼၼ်ႉၵႂႃႇၸွမ်း ယဝ်ႉၵေႃႈ ဢဝ်တူဝ်တၢႆ ၵူဝ်ႇၺီႇထူၺ်းၼၼ်ႉ ၵႂႃႇႁူင်းယႃယဝ်ႉၶႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ၵူဝ်ႇၺီႇထူၺ်းၼႆႉ ယွၼ်ႉပိူဝ်ႈလွင်ႈယူႇသဝ်းၵိၼ်သၢင်ႈပႅၵ်ႇပိူင်ႈလၢၵ်ႇလၢႆး၊ ႁဵတ်းႁႂ်ႈၵူၼ်းၼႂ်းဝၢၼ်ႈ ၼႂ်းဢိူင်ႇဢမ်ႇလႆႈယူႇလီၸႂ်၊ လႆႈၵူဝ်ႁႄယူႇတႃႇသေႇ ဝႃႈၼႆသေ ၸုမ်းသိုၵ်းမုတ်း (ပျောက်ကြားတပ်ဖွဲ့) ဝဵင်းယႂႃႇငၢၼ်ႇလႄႈ ၸုမ်းၵႅတ်ႇၶႄၵူၼ်းမိူင်း ဝဵင်းတူၼ်ႈတီး ႁူမ်ႈၵၼ်သေ ၵႂၢတ်ႇ လၢင်ႉ ၼႂ်းပိုၼ်ႉတီႈႁိုဝ် ၵူၼ်းၼုမ်ႇတူၼ်ႈတီးၵေႃႉၼိုင်ႈလၢတ်ႈ ။
ယၢမ်းလဵဝ် ၼႂ်းၸႄႈဝဵင်းယႂႃႇငၢၼ်ႇၼႆႉ ၶွင်ႇသီႇသိုၵ်းမၢၼ်ႈ ႁွတ်ႈထိုင်မႃးထႅင်ႈ ဢဵၼ်ႁႅင်းမွၵ်ႈ 100 ၽႄပဵၼ်လၢႆၸုမ်းသေ တူင်ႉၼိုင်ယူႇဝႆႉၸွမ်း ၼႂ်းမူႇဝၢၼ်ႈ ႁူမ်ႈပႃးဝၢၼ်ႈဢလေႇၶျွင်ၼႆႉ ယဝ်ႉၵေႃႈ ၵူတ်ႇထတ်းၵူၼ်းပိုၼ်ႉတီႈ ၵႂႃႇမႃးႁၢဝ်ႈႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ