သိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ၽဵဝ်ႈပၼ် မၢၵ်ႇမႅင်းၾင်လိၼ် ဢၼ်သိုၵ်းမၢၼ်ႈမႃးၾင်ဝႆႉၸွမ်းသူၼ်ႁႆႈၼႃးၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်း ၾရူးသူဝ်း လွႆၶေႃ ၼႂ်းမိူင်းယၢင်းလႅင်၊ ႁဵတ်းႁႂ်ႈၵူၼ်းမိူင်းၵႂႃႇမႃးငၢႆႈလူမ်။
တီႈၼႃႈၽိုၼ်ၶၢဝ်ႇ KNDF တပ်ႉၵွင် 2 ၼၼ်ႉတႅမ်ႈတၢင်ႇပိုၼ်ၽၢဝ်ႇဝႆႉမိူဝ်ႈဝၼ်းတီႈ 28/3/2022 ၼၼ်ႉဝႃႈ -“ထိုင်ၶၢဝ်းၵူၼ်းမိူင်းလူဝ်ႇၶဝ်ႈသူၼ်ၶဝ်ႈႁိူၵ်ႈၶိုၼ်းယဝ်ႉလႄႈ ၼင်ႇႁိုဝ်ၵူၼ်းမိူင်းတေလွတ်ႈၽေးလွင်ႈယဵပ်ႇမၢၵ်ႇၼၼ်ႉ ယူႇတီႈ ၵူၼ်းသိုၵ်း KNDF လႆႈလူင်းပိုၼ်ႉတီႈၶူၼ်ႉႁႃ မၢၵ်ႇမႅင်းၾင်လိၼ် ၸွမ်းသူၼ်ႁႆႈၼႃးၵူၼ်းမိူင်း ၊ ဢၼ်သိုၵ်းမၢၼ်ႈၾင်ဝႆႉ ႁၢင်ႈဝႆႉၸိူဝ်းၼၼ်ႉ ။ လုၵ်ႈၸုမ်း KNDF ၸွႆႈပူတ်းၸွႆႈၽဵဝ်ႈပၼ်ၼင်ႇၵႃႈပွင်ပဵၼ်လႆႈ” – ဝႃႈၼႆ။
ၵွပ်ႈၼႆလႄႈၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ပီပၢႆ၊ ပၢင်တိုၵ်းဢၼ်ပဵၼ်ၼႂ်းမိူင်းယၢင်းလႅင်ၶၢဝ်းတၢင်း မွၵ်ႈ 1 ပီၼႆႉၼၼ်ႉ ၶၢဝ်ႇဢၼ်ဝႃႈၵူၼ်းမိူင်းၵႂႃႇသူၼ်ႁႆႈၼႃးသေယဵပ်ႇၺႃးမၢၵ်ႇမႅင်းၾင်လိၼ် မၢတ်ႇၸဵပ်းလူႉတၢႆၼႆဢမ်ႇသူႈမီး။
ၾၢႆႇတၢင်းၸုမ်းၸွႆႈထႅမ်လွင်ႈၸဵပ်းမႆႈမၢတ်ႇတၢႆတႄႉတႅမ်ႈၽိုၼ်ႁၢႆးငၢၼ်းတၢင်ႇဝႆႉဝႃႈ ၼႂ်းလုမ်ႈၾႃႉၼႆႉ မိူင်းမၢၼ်ႈၵေႃႈၶဝ်ႈပႃးဝႆႉၼႂ်းသဵၼ်ႈမၢႆ မိူင်းဢၼ်ႁဵတ်းႁႂ်ႈၵူၼ်းမိူင်းယဵပ်ႇၺႃးမၢၵ်ႇမႅင်းသေလူႉတၢႆၼမ် ဝႃႈၼႆ။
ၼႂ်းမိူင်းတႆးၵေႃႈ ၶၢဝ်းတၢင်း 3 လိူၼ်ႁႅၵ်ႈပီ 2022 ၼႆႉယွၼ်ႉပၢင်တိုၵ်း သိုၵ်းၸၢဝ်းၶိူဝ်းၼင်ႇၵၼ်ပိုတ်းယိုဝ်းၵၼ်သေ ၵူၼ်းမိူင်း လႃႈသဵဝ်ႈ ၵျွၵ်ႉမႄး သီႇပေႃႉ ၼမ်ႉလၼ်ႈ လွၵ်ႉၸွၵ်ႇ မိူင်းၵိုင် လၢႆးၶႃႈ ပၢင်လူင် ယဵပ်ႇၺႃးမၢၵ်ႇ ဢမ်ႇယွမ်း 50 ပွၵ်ႈ 50 ၵမ်းယဝ်ႉ ။ ၵူၼ်းဢၼ်မၢတ်ႇၸဵပ်းဢမ်ႇယွမ်း 70 လႄႈၵူၼ်းဢၼ်လူႉတၢႆ ၸွမ်းဢမ်ႇယွမ်း 20 ၸိူဝ်းၼႆႉယဝ်ႉ -ၵူၼ်းၼုမ်ႇ ၸွႆႈထႅမ်လွင်ႈၵူၼ်းယဵပ်ႇမၢၵ်ႇ ၼႂ်းၸိုင်ႈတႆးပွတ်းႁွင်ႇ ၵေႃႉၼိုင်ႈလၢတ်ႈ။
