ၾၢႆႇၾႆးၾႃႉ ၼမ်ႉၶမ်း ၵဵပ်းၵႃႈၾႆးၼမ် ဢမ်ႇပေႃးၸႂ် ႁႂ်ႈတၢင်ႇတီႈၼေႇပျီႇတေႃႇ

ၾၢႆႇၾႆးၾႃႉဝဵင်းၼမ်ႉၶမ်း တႂ်ႈၶွင်ႇသီႇသိုၵ်းမၢၼ်ႈၵုမ်းၵမ် ၵဵပ်းငိုၼ်းၵႃႈၾႆးၼမ်လိူဝ်ၵဝ်ႇလၢႆပုၼ်ႈ ၵူၼ်းမိူင်းယွၼ်းႁႂ်ႈၵႄႈလိတ်ႈ ပၼ်ၶိုၼ်းၵေႃႈ ႁႂ်ႈၵူၼ်းမိူင်းတၢင်ႇတီႈၼေႇပျီႇတေႃႇ  ဝႃႈၼႆ။

ၸူဝ်ႈသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ႁွင်ႈၵၢၼ်ၾၢႆႇၾႆးၾႃႉ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၵဵပ်းၵႃႈ ၾႆးၼမ်လိူဝ်ၵဝ်ႇပဵၼ်လၢႆပုၼ်ႈ ၊ ၽႂ်ဢမ်ႇၵႂႃႇသႂ်ႇ ထုၵ်ႇတတ်းသၢႆၾႆး ၊  ႁဵတ်းႁႂ်ႈၵူၼ်းမိူင်း  ထူပ်းတၢင်းယၢပ်ႇၽိုတ်ႇ၊ ၵူၼ်းမိူင်းတုၵ်းယွၼ်း ၾၢႆႇၾႆးၾႃႉ ဢမ်ႇယွမ်းၵႄႈလိတ်ႈ ၸႂ်ႉၵူၼ်းမိူင်းႁဵတ်းလိၵ်ႈ တၢင်ႇထိုင်တီႈၼေႇပျီႇတေႃႇ။

ၵူၼ်းပိုၼ်ႉတီႈ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပၼ်ႁႃၵႃႈၾႆးၾႃႉတီႈၼမ်ႉၶမ်း မိူဝ်ႈလဵဝ်ၼႆႉ  – ပေႃးၶဝ်မႃးဢၢၼ်ႇမီႇတႃႇၼႆ ၶဝ်ဢၢၼ်ႇယူႊၼိတ်ႉမၼ်းလိူဝ် ဢၼ်ႁဝ်းၸႂ်ႉဝႆႉၼၼ်ႉလၢႆပုၼ်ႈၵမ်းလဵဝ်။   ၵွပ်ႈၼႆပေႃးႁဝ်းၶႃႈၵႂႃႇသႂ်ႇၵႃႈၾႆးၾႃႉၼႆ လႆႈသႂ်ႇၼမ်လူၼ်ႉပူၼ်ႉလိူဝ်။ ပေႃးႁဝ်းဝႃႈ ႁဝ်းဢမ်ႇလႆႈၸႂ်ႉၼမ်ထၢၼ်ႇၼႆႉ ၸွႆႈၵႄႈပၼ်ၵႃႈၶၼ်ႁင်းႁဝ်းၽွင်ႈလႄႈၼႆ ၶဝ်သမ်ႉၶိုၼ်းၸႂ်ႉႁဝ်းတႅမ်ႈလိၵ်ႈတၢင်ႇၼေႇပျီႇတေႃႇ ၸိူင်ႉၼႆၼေႈ။   မၼ်းပွင်ႇဝႃႈ ပဵၼ်လၢႆးလႅၼ်ၵိၼ်ၶဝ် မဵဝ်း ၼိုင်ႈၶႃႈ” – ဝႃႈၼႆ။

သင်ၵူၼ်းမိူင်းဝူၼ်ႉဝႃႈ လႆႈသႂ်ႇၵႃႈၾႆးၼမ်လိူဝ်ဢၼ်ၸႂ်ႉဝႆႉလႄႈ ဢမ်ႇၸၢႆႇ ၼႆသမ်ႉ  ထုၵ်ႇတတ်းၾႆး ။   လွင်ႈၼႆႉ ပဵၼ်တၢင်းယၢပ်ႇၽိုတ်ႇတႃႇၵူၼ်းမိူင်းၼမ်ႉၶမ်းလိူဝ်ႁႅင်း။

“  ၶၢဝ်းတၢင်း 13-14 လိူၼ် ၸင်ႇတေႁူမ်ႈၵၼ်မႃးၵဵပ်းပွၵ်ႈလဵဝ်။ ဢမ်ႇသႂၢင်းဢမ်ႇလႆႈၼႆ ၵူၼ်းမိူင်းသမ်ႉတေႁဵတ်းႁိုဝ်ပဵၼ်လႆႈလႃႇၵႃႈမၼ်းၼမ်ထၢၼ်ႇၼၼ်ႉ။    သမ်ႉပၢႆၵဵပ်းလိူဝ်ထႅင်ႈပဵၼ်လၢႆပုၼ်ႈလူးၵွၼ်ႇ”-  ၵူၼ်း  ၼမ်ႉၶမ်း သိုပ်ႇလၢတ်ႈၼႄၼင်ႇၼႆ။  

ၵဵဝ်ႇလူၺ်ႈ ၾၢႆႇၾႆးၾႃႉ ဝဵင်းၼမ်ႉၶမ်း ၵဵပ်းၵႃႈၾႆးလိူဝ်ၸိူင်ႉၼႆၼႆႉ ၵူၼ်းမိူင်းၵမ်ႈၼမ် တုၵ်းယွၼ်းႁႂ်ႈ ၽူႈယႂ်ႇၵူၼ်းလူင်  ၽူႈမီးပုၼ်ႈၽွၼ်း လူင်းမႃးၵူတ်ႇထတ်းတူၺ်းသေ ၵႄႈလိတ်ႈပၼ် ပၼ်ႁႃဢၼ်ၵူၼ်းမိူင်းလႆႈႁူပ်ႉဝႆႉၼၼ်ႉသေၵမ်း ဝႃႈၼႆ။

ၵူၼ်းၼုမ်ႇ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ လၢႆးၶဝ်ႁဵတ်း ၸိူင်ႉၼႆၼႆႉ ၶဝ်ဢမ်ႇသိုဝ်ႈယူဝ်းတေႃႇၵူၼ်းမိူင်း လႅၼ်ၵိၼ်ပႅတ်ႉၵိၼ် ၵူၼ်းမိူင်းၵူၺ်း။ ယၢမ်းမိူဝ်ႈလဵဝ်သမ်ႉ ငိုၼ်းၵေႃႈႁႃယၢပ်ႇ ၵူၼ်းမိူင်းတႄႉ တုၵ်ႉၶၶႃႈဢေႃႈ သင်ပဵၼ်လႆႈတႄႉ ၶႂ်ႈႁႂ်ႈၵူၼ်းၸၼ်ႉၼိူဝ်ၶဝ် ႁူႉၸွမ်း လွင်ႈၼႆႉသေ လူင်းမႃးၵူတ်ႇထတ်းပၼ်ၶႃႈဢေႃႈ” – ဝႃႈၼႆ။

ၵႃႈၾႆးၾႃႉ ၼႂ်းၸႄႈဝဵင်းၼမ်ႉၶမ်းၼႆႉ တႄႇဢဝ် 1 ယူႊၼိတ်ႊထိုင် 30 ယူႊၼိတ်ႊၼႆႉ တေလႆႈၸၢႆႇငိုၼ်း 1 ယူႊ ၼိတ်ႊလၢႆ 35 ပျႃး။ တႄႇဢဝ် 31-50 ယူႊၼိတ်ႊသမ်ႉ တေလႆႈၸၢႆႇ 1 ယူႊၼိတ်ႊ 50 ပျႃး။ 51- 75 ယူႊၼိတ်ႊ 1 ယူႊၼိတ်ႊလၢႆ 70 ပျႃး။ 75 -100 ယူႊၼိတ်ႊသမ်ႉ လႆႈ ၸၢႆႇငိုၼ်း 1 ယူႊၼိတ်ႊ 90 ပျႃး။

ယဝ်ႉၵေႃႈ 101 – 150 ယူႊၼိတ်ႊသမ်ႉ တေလႆႈၸၢႆႇငိုၼ်း 1 ယူႊၼိတ်ႊလၢႆ 110 ပျႃး။ 151 – 200 ယူႊၼိတ်ႊ 1 ယူႊၼိတ်ႊလၢႆ လႆႈၸၢႆႇ ငိုၼ်း 120 ပျႃးလႄႈ သင် 201 ယူႊၼိတ်ႊၶိုၼ်ႈၼိူဝ်သမ်ႉ တေလႆႈၸၢႆႇ 1 ယူႊၼိတ်ႊလၢႆငိုၼ်း 125 ပျႃး ၼႆယဝ်ႉ။