ၶွင်ႇသီႇသိုၵ်းမၢၼ်ႈ ယိုတ်းမိူင်း ပႂ်ႉၵူတ်ႇထတ်း ၵူၼ်းၶဝ်ႈဝဵင်းလွၵ်ႉၸွၵ်ႇႁၢဝ်ႈႁႅင်း သင်ဢမ်ႇပႃးမၢႆၾၢင်လႄႈ ဝႂ်သမ်းယႃႁႄႉၵင်ႈတၢင်းပဵၼ် ၶူဝ်ႊ ဝိတ်ႉ 19 ၸိုင် တိုၼ်းဢမ်ႇပၼ်ၶဝ်ႈဝဵင်း။
တႄႇဢဝ် မိူဝ်ႈဝႃး ဝၼ်းတီႈ 29/3/2022 ၼႆႉမႃးသိုၵ်းမၢၼ်ႈ၊ ပလိၵ်ႈမၢၼ်ႈလႄႈ ၾၢႆႇပၢႆးယူႇလီ ပႂ်ႉၵူတ်ႇထတ်း ၵူၼ်းၶဝ်ႈဝဵင်း တီႈၵဵၵ်ႉတၢင်းၶဝ်ႈဝဵင်းလွၵ်ႉၸွၵ်ႇ – ယွင်ႁူၺ်ႈ၊ လွၵ်ႉၸွၵ်ႇ – တူၼ်ႈတီးလႄႈ တၢင်းၼႃႈတပ်ႉသိုၵ်းမၢၼ်ႈ ပထူး လွၵ်ႉၸွၵ်ႇ – ၼမ်ႉလၼ်ႈ ၸိူဝ်းၼႆႉ ပႂ်ႉၵူတ်ႇထတ်းၵူၼ်းၶဝ်ႈဝဵင်းႁၢဝ်ႈႁႅင်း။
ၵူၼ်း လွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “တႄႇဢဝ် မိူဝ်ႈဝႃး ဝၼ်းတီႈ 29 ၼႆႉမႃး သင်ဝႃႈ ၽူႈလႂ်ၽႂ် ဢမ်ႇပႃးမၢႆၾၢင် (ဝႂ်ၵပ်းတူဝ်) လႄႈ ဝႂ်သမ်းယႃၶူဝ်ႊဝိတ်ႉ ၸပ်းတူဝ်ၸိုင် ၶဝ်တိုၼ်းဢမ်ႇပၼ်ၶဝ်ႈဝဵင်းၶႃႈ။ သင်ဝႃႈ ၽႂ်ပႆႇလႆႈသမ်းယႃၼႆၵေႃႈ ၶဝ်တေၵူတ်ႇထတ်းတီႈၵဵၵ်း ၼၼ်ႉသေ သမ်းယႃပၼ်ၵမ်းလဵဝ်ၶႃႈဢေႃႈ”- ဝႃႈၼႆ။
သိုပ်ႇၵႂႃႇၼၼ်ႉ သင်ဝႃႈ ၽူႈလႂ်ၽႂ် ဢမ်ႇပႃးၵႂႃႇ မၢႆၾၢင်၊ ဝႂ်သမ်းယႃၶူဝ်ႊဝိတ်ႉ ၼႆၸိုင် တေမီးလွင်ႈမႂ်ငိုၼ်း(တၢမ်ႇငိုၼ်း)ထႅင်ႈ ၵူၺ်းၵႃႈ လွင်ႈၼႆႉ တေမႂ်ၵႃႈႁိုဝ် ဢၼ်ဝႃႈၼၼ်ႉ ပႆႇလႆႈႁူႉ။
“ၵူၼ်းဝၢၼ်ႈၼွၵ်ႈၼႃးပၢင်ႇႁဝ်းတႄႉမႆႈၸႂ်ၶႃႈဢေႃႈ ။ သင်ဢမ်ႇမီးမၢႆၾၢင်ၼႆ ဢမ်ႇၸၢင်ႈၶဝ်ႈဝဵင်းယဝ်ႉ။ ယဝ်ႉၵေႃႈ ပေႃး ၶဝ်ႈၵႂႃႇဝဵင်း ၸိူဝ်းပႆႇသမ်းယႃ တေလႆႈသမ်း တေလႆႈတမ်ၶူးၼင် ယဝ်ႉၵေႃႈ ထုၵ်ႇၵူတ်ႇထတ်းၸႅတ်ႈထၢမ် ၼႆလႄႈဢွၼ်ၵၼ်မႆႈၸႂ်ၶႃႈဢေႃႈ” – ၵူၼ်းပိုၼ်ႉတီႈ လွၵ်ႉၸွၵ်ႇ သိုပ်ႇလၢတ်ႈၼႄၼင်ႇၼႆ။
ၾၢႆႇထတ်း/ ၵဵပ်းသဵၼ်ႈမၢႆႁူဝ်ၵူၼ်းလႄႈ ၾၢႆႇႁဵတ်းဝႂ်ၵပ်းတူဝ် (လဝၵ) ဢၼ်ယူႇတႂ်ႈသိုၵ်းမၢၼ်ႈၵုမ်းၵမ် ပိုၼ်ၽၢဝ်ႇဢွၵ်ႇမႃး ၼႂ်းႁူဝ်လိူၼ်မၢတ်ႊၶျ် 2022 ၼၼ်ႉဝႃႈ – တႄႇဢဝ် ဝၼ်းတီႈ 1/4/2022 ယၢမ်းၵၢင်ၼႂ် 6 မူင်းၵႂႃႇ ၵူၼ်းမိူင်းႁူမ်ႈတုမ်၊ ၵူၼ်းမိူင်းတႆး ၵူႈၵေႃႉ သင်ဝႃႈ တေၵႂႃႇတႃႈပႆတၢင်း၊ တေၵႂႃႇမိူင်းတႂ်ႈမိူင်းၼိူဝ်ၸိုင် တေလႆႈပႃး ဝႂ်ၵပ်းတူဝ် (မၢႆၾၢင်) ၸပ်းတူဝ်ၵၼ်ဝႆႉ ၵူႈၵေႃႉ ။
ၵူၺ်းၵႃႈ ဢမ်ႇမၢႆထိုင်ပႃးၵူၼ်းၵႂႃႇမႃးၼႂ်းဝဵင်း၊ လႄႈၵူၼ်းလုၵ်ႉတီႈဝၢၼ်ႈၶဝ်ႈဝဵင်း။ ၵူၺ်းၵႃႈသိုၵ်းမၢၼ်ႈၸၼ်ႉတႂ်ႈသမ်ႉမႃးပႂ်ႉၵူတ်ႇထတ်းၵူၼ်းၵႂႃႇမႃးၵူႈၵေႃႉၸိူင်ႉၼႆ ႁဵတ်းႁႂ်ႈၵူၼ်းမိူင်းယူႇယၢပ်မႃးထႅင်ႈၵူၺ်း ၵူၼ်းပိုၼ်ႉတီႈဢွၼ်ၵၼ်လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ