သိုၵ်းမၢၼ်ႈၶဝ်ႈဝၢၼ်ႈ ပႄးယိၼ်းတွင်ႇ ဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း၊ ၵူၼ်းမိူင်းတူၵ်းၸႂ်ဢွၼ်ၵၼ်ပၢႆႈ ၵႂႃႇယူႇတၢင်ႇတီႈ သိုၵ်းမၢၼ်ႈလွၵ်ႇငိုတ်ႈသေတဵၵ်းႁွင်ႉၶိုၼ်းႁႂ်ႈပွၵ်ႈယူႇႁိူၼ်း ၊ ၵူၼ်းမိူင်းဢမ်ႇႁတ်းပွၵ်ႈ။
မိူဝ်ႈဝၼ်းတီႈ 24/3/2022 ၼၼ်ႉ ၶွင်ႇသီႇသိုၵ်းမၢၼ်ႈ ဢဵၼ်ႁႅင်းၼမ်လၢႆ ႁွတ်ႈထိုင် ဝၢၼ်ႈပႄးယိၼ်းတွင်ႇ(ပဲယင်တောင်ရွာ) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း၊ၵူၼ်းဝၢၼ်ႈပၢႆႈဢွၵ်ႇဝၢၼ်ႈ ၊ မိူဝ်ႈဝႃး သိုၵ်းမၢၼ်ႈပိုၼ်ၽၢဝ်ႇလွၵ်ႇငိုတ်ႈဝႃႈ ၼႂ်းၶၢဝ်းတၢင်း ၼိုင်ႈဝူင်ႈႁႂ်ႈၵူၼ်းမိူင်းပွၵ်ႈယူႇႁိူၼ်းၶိုၼ်း ဝႃႈၼႆ။
ၵူၼ်းဝၢၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ၸီႉသင်ႇ ႁႂ်ႈႁဝ်းၶႃႈ ပွၵ်ႈၶိုၼ်းႁိူၼ်းယေးၼႆၶႃႈဢေႃႈ။ သင်ဝႃႈ ႁဝ်းၶႃႈ ဢမ်ႇ ပွၵ်ႈမိူဝ်းၶိုၼ်းၼႆၸိုင် ၶဝ်တေယိုတ်း ႁိူၼ်းယေးႁဝ်းၼႆၶႃႈဝႃႇ။ ႁဝ်းၶႃႈ ၶႂ်ႈပွၵ်ႈဢေႃႈ ၵူၺ်းၵႃႈ ၵူဝ်ၺႃးတီႉၶႃႈ”- ဝႃႈၼႆ။
ယၢမ်းလဵဝ် ၶွင်ႇသီႇသိုၵ်းမၢၼ်ႈၼႆႉသမ်ႉ လၢမ်းလိမ်းဢဝ်ၵွင်ႈ ယိုဝ်းၵႂႃႇၵူႈႁူးၵူႈတၢင်းသေဢမ်ႇၵႃး သွၵ်ႈတဝ် ၼႂ်းဝၢၼ်ႈ ပေႃးႁၼ်ၵေႃႉဢၼ်ၶဝ်ထၢင်ႇထိူမ်ၼႆ တီႉၺွပ်းဢဝ်ၵႂႃႇပႃးၸွမ်းလႄႈႁဵတ်းႁႂ်ႈၵူၼ်းမိူင်းဢမ်ႇႁတ်းပွၵ်ႈယူႇႁိူၼ်း ၽွင်းသိုၵ်းမၢၼ်ႈတိုၵ်ႉယူႇသဝ်းသွၵ်ႈတဝ်ယူႇၼႂ်းဝၢၼ်ႈ။
မိူဝ်ႈဝၼ်းတီႈ 27/3/2022 ယၢမ်းၵၢင်ၶမ်ႈမွၵ်ႈ 8 မူင်းၼၼ်ႉ သဝ်ၾူၼ်း Mytel ဢၼ်ပဵၼ်ၶွင်သိုၵ်းမၢၼ်ႈ ၵုမ်းၵမ်ဝႆႉ တီႈဝၢၼ်ႈ ဢၢင်ႇတေႃး(အင်တောကျေးရွာ) ၼၼ်ႉ ထုၵ်ႇယႃႉၵွႆ ။
ၵူၼ်းဝၢၼ်ႈဢၢင်ႇတေႃးလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵၢင်ၶမ်ႈၼၼ်ႉ ႁဝ်းၶႃႈ လႆႈငိၼ်းသဵင်တႅၵ်ႇ 4 ၵမ်း ။ ထိုင်မႃး မိူဝ်ႈဝႃး ၵၢင်ၼႂ် ၸင်ႇ ႁူႉဝႃႈ လၵ်းသဝ် Mytel ထုၵ်ႇယႃႉၵွႆ ။ တေႃႇထိုင် ယၢမ်းလဵဝ် ပဵၼ်ၸုမ်းလႂ် ၵေႃႉလႂ်ႁဵတ်း ဢၼ်ဝႃႈၼၼ်ႉ ပႆႇလႆႈႁူႉၶႃႈ”- ဝႃႈၼႆ။
ဝၢႆးသေ လၵ်းၾူၼ်း Mytel ၶွင်ၸွမ်ၸိၵ်းသိုၵ်း မဢလ ၺႃးၵူၼ်ႇၵွႆၼၼ်ႉမႃး သိုၵ်းမၢၼ်ႈယိင်ႈၶႅၼ်းထႅမ်ႁႅင်း ဢဝ်ႁူမ်ႇလူမ်ႈသေ ပၵ်းတပ်ႉၶဝ်ႈဝႆႉႁိမ်းဝၢၼ်ႈဢၢင်ႇတေႃး။
တီႈဝၢၼ်ႈပႄးယိၼ်းတွင်ႇၵေႃႈ သိုၵ်းမၢၼ်ႈ ဢဵၼ်ႁႅင်း 30 ပၢႆ ပၵ်းယူႇဝႆႉၼႂ်းဝၢၼ်ႈ ၶဝ်ႈၶဝ်ႈဢွၵ်ႇဢွၵ်ႇယူႇသဝ်းၸွမ်းၵူၼ်းဝၢၼ်ႈဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ