ၶူဝ်မိုတ်ႈၵိုဝ်း မၢႆ 1 လႅၼ်လိၼ်တႆး – ထႆး တႃႈၶီႈလဵၵ်း – မႄႈသၢႆ  ပိၵ်ႉယွၼ်ႉၶူဝ်ႊဝိတ်ႉမႃး ၶၢဝ်းတၢင်း 2 ပီ ပႆႇပိုတ်ႇ တုမ်ႉယွၼ်ႈၵူၼ်းမိူင်းပိုၼ်ႉတီႈ ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉ ။

တႄႇဢဝ် ဝၼ်းတီႈ 23/3/2020 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 23/3/2022 ၼႆႉ  လူင်ပွင်ၸိုင်ႈထႆးပိၵ်ႉၽၵ်းတူလႅၼ်လိၼ် မႄႈသၢႆ-တႃႈၶီႈလဵၵ်းဝႆႉ လႆႈ 2 ပီ ၊ တႃႇႁႄႉၵင်ႈတၢင်းပဵၼ်   ၶူဝ်ႊဝိတ်ႉ 19  ယၢမ်းလဵဝ်တၢင်းပဵၼ်ယဵၼ်လူင်းၵႂႃႇယဝ်ႉသေတႃႉပႆႇပိုတ်ႇပၼ်ၶိုၼ်းလႄႈ ၵူၼ်းမိူင်းပိုၼ်ႉတီႈယၢပ်ႇၽိုတ်ႇတႃႇၵႃႉၶၢႆတေႃႇၵၼ် တႃႇႁႃၵိၼ်လဵင်ႉတွင်ႉ။

ၵူၼ်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်းသွင်ပီမႃးၼႆႉ ယၢပ်ႇၵွပ်ႈတၢင်းပဵၼ်ၶူဝ်ႊဝိတ်ႉ ၵူဝ်ယဝ်ႉၵူဝ်ထႅင်ႈ ပေႃးဢမ်ႇ သုတ်း။ ယဝ်ႉၵေႃႈ ၵၢၼ်မိူင်းၵေႃႈသမ်ႉ မႃးသုၵ်ႉယုင်ႈ ၸိူင်ႉၼႆထႅင်ႈသေ ပေႃးဢမ်ႇမီးတီႈလၢတ်ႈယဝ်ႉ လွင်ႈယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉၼႆႉ။ ၵႃႈၶၼ်ၵုၼ်ႇၵေႃႈ ၶိုၼ်ႈယဝ်ႉၶိုၼ်ႈထႅင်ႈတိၵ်းတိၵ်း ၶိုၼ်ႈၵူႈမဵဝ်း တႃႇတေယူႇၸွမ်းငဝ်းလၢႆး ဢၼ်ပဵၼ်ယူႇၼႆႉ လႆႈဝႃႈယၢပ်ႇၸႂ်ႁႅင်းတႄႉ ၵူၺ်းၵႃႈ ယၢပ်ႇတၢၼ်ႇႁိုဝ်ၵေႃႈ တိုၼ်းလူဝ်ႇလႆႈႁႃတၢင်း ယူႇလွတ်ႈလႆႈ ႁင်းၽႂ်မၼ်း ”- ဝႃႈၼႆ။

 ၽၵ်းတူလႅၼ်လိၼ် ၶူဝ်မိုတ်ႈၵိုဝ်းမၢႆ 1 ပိၵ်ႉဝႆႉယူႇသေတႃႉ တႃႇတေႃႉသူင်ႇၶူဝ်းၵုၼ်ႇတႄႉ ၶူဝ်လႅၼ်လိၼ်မၢႆ 2 ပိုတ်ႇဝႆႉယူႇ။ ၵူၺ်းၵႃႈ ပဵၼ်ႁိုဝ်ၵေႃႈ လွင်ႈတေႃႉသူင်ႇသိုဝ်ႉၶၢႆ ၵႂႃႇမႃး ဢမ်ႇၶိုတ်းတၼ်းၸႂ်ၼင်ႇပိုတ်ႇဝႆႉၽၵ်းတူတင်းသွင်ဢၼ်လႄႈ လွင်ႇယူႇသဝ်းၵိၼ်သၢင်ႈၵူၼ်းမိူင်း တင်း 2 ၾင်ႇ ပႃးၸဵမ်လွင်ႈၶိုၼ်ႈယႂ်ႇမၢၵ်ႇမီး ႁၢင်ႇယၢၼ်ၵၼ်ႁႅင်း ယၢပ်ႇၽိုတ်ႇၵိၼ်းၸႂ်လိူဝ်ႁႅင်း ဝႃႈၼႆ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈတႄႇပိၵ်ႉၽၵ်းတူလႅၼ်လိၼ်ၼၼ်ႉတႄႉ ယၢပ်ႇၽိုတ်ႇၵၼ်မူတ်းၶႃႈဢေႃႈ လွင်ႈၵၢၼ်ၵိၼ်ယူႇၼႆႉ။ ဝၢႆးၼႆႉမႃး ၶူဝ်းၵုၼ်ႇၼႆႉ လႆႈသိုပ်ႇသိုဝ်ႉဢဝ် တီႈၸဝ်ႈၵုၼ်ႇၵူၼ်းၵႃႉယႂ်ႇလူင်ၶဝ်သေ သိုပ်ႇမႃးၶၢႆၶိုၼ်းလႄႈ ၸင်ႇၶႅၼ်း ၸႂ်မႃး ဢိတ်းၼိုင်ႈ။ ယၢမ်းလဵဝ် ဢၼ်ယၢပ်ႇၽိုတ်ႇႁႅင်းတႄႉ   ယွၼ်ႉၵၢၼ်တေႃႉသူင်ႇ ယၢပ်ႇ ၊ ဢမ်ႇၶိုတ်းတၼ်းလႄႈ ၶၼ်ၶူဝ်းၵုၼ်ႇ ၵေႃႈၶိုၼ်ႈ  ၊ ၵူၼ်းမိူင်းႁႃငိုၼ်းယၢပ်ႇသေ သမ်ႉလႆႈၸႂ်ႉၸၢႆႇၼမ် ၼၼ်ႉၶႃႈၼႃႇ ။  ”- ဝႃႈၼႆ။

လူင်ပွင်ၸိုင်ႈမိူင်းထႆး  တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉၼႆသေ  သဵၼ်ႈတၢင်းလူင်ဢေႊသျိူဝ်ႊ မႄႈသွတ်ႈ – မျဝတီႇ၊ သင်ၶရပူရီ – ၵွင်းမူးသၢမ်သူႇ( ၽယႃးတူင်းသူႇ) ၸိူဝ်းၼႆႉၵေႃႈ ပိၵ်ႉဢိုတ်းမူတ်း။ မိူၼ်ၼင်ႇၽၵ်းတူ ဢၼ်ဢမ်ႇပိုတ်ႇပဵၼ်တၢင်းၵၢၼ် လၢၼ်ႇသဵၼ်ႈတၢင်းၵိဝ်ႇၽႃဝွၵ်ႈ BP1 ၊ လၢၼ်ႇပႃၶီး၊ လၢၼ်ႇၼမ်ႉယွၼ်း၊ လၢၼ်ႇလၵ်း တႅင်ႇလႄႈ လၢၼ်ႇၼႃးမူၼ်း – မႄႈႁွင်ႈသွၼ် ၸိူဝ်းၼႆႉၵေႃႈ ဢမ်ႇပၼ်ၵူၼ်းပိုၼ်ႉတီႈၵႂႃႇမႃး။

ၵူၼ်းပိုၼ်ႉတီႈ တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“လႆႈငိၼ်းၶၢဝ်ႇလိုဝ်းၵၼ်ဝႃႈ ၶၢဝ်းတၢင်းလိူၼ်သွင်လိူၼ်ၼႆႉ တီႈၶူဝ်မၢႆ 1 မႄႈ သၢႆ – တႃႈၶီႈ လဵၵ်း တေပိုတ်ႇပၼ်ယဝ်ႉၼႆဝႃႇ ၵူၺ်းၵႃႈ လွင်ႈၼႆႉတႄႉ ႁဝ်းၶႃႈ ပႆႇယိုၼ်ယၼ် ၵွပ်ႈပႆႇႁၼ် လူင်ပွင်ၸိုင်ႈတၢင်းၾင်ႇလႂ် ပိုၼ်ၽၢဝ်ႇ ဢွၵ်ႇမႃး ပဵၼ်တၢင်းၵၢၼ်”-  ဝႃႈၼႆ။

ၶူဝ်မိုတ်ႈၵိုဝ်းမၢႆ  1 ၼႆႉဝၢႆးလင်ပိၵ်ႉယွၼ်ႉၶူဝ်ႊဝိတ်ႉ လႆႈ ပီပၢႆ မီးၶၢဝ်ႇလိုဝ်းဝႃႈတေၶိုၼ်းပိုတ်ႇၶိုၼ်းယဝ်ႉၼႆလၢႆလၢႆၵမ်းယူႇသေတႃႉ ဢိင်ၼိူဝ်ၵၢၼ်မိူင်း မိူင်းမၢၼ်ႈဢမ်ႇၼိမ်တဵင်ႈ ၊ ပၢင်တိုၵ်းသိုၵ်းသိူဝ်လိူင်ႇၼမ် တၢင်းပဵၼ်ၶူဝ်ႊဝိတ်ႉၶိုၼ်းၽႄႈလၢမ်းမႃးၶိုၼ်းထႅင်ႈႁွပ်ႈၼိုင်ႈလႄႈ ဢမ်ႇပဵၼ်ပိုတ်ႇၶိုၼ်းႁၼ်ႉတေႃႇထိုင်ယၢမ်းလဵဝ် ၊ ၵူၼ်းၸွႆႈထႅမ် ၵူၼ်းမိူင်းၸိူဝ်းလုၵ်ႉမိူင်းထႆးပွၵ်ႈမိူဝ်းၶိုၼ်းမိူင်းမၢၼ်ႈ လၢတ်ႈၼင်ႇၼႆ။

ၼွၵ်ႈလိူဝ်ၼၼ်ႉ တၢင်းလႅၼ်လိၼ်တႆး – ၶႄႇ ၼႂ်းၸိုင်ႈတႆးပွတ်းႁွင်ႇၵေႃႈ တေႃႈၼင်ႇၼၼ် ယူႇတီႈလူင်ပွင်ၸိုင်ႈမိူင်းၶႄႇ ၸီႉသင်ႇပိၵ်ႉဢိုတ်း ၽၵ်းတူ လႅၼ်လိၼ် ႁၢမ်ႈၵူၼ်းၶဝ်ႈဢွၵ်ႇၵႂႃႇမႃးသေ တုမ်ႉတိူဝ်ႉၵူၼ်းမိူင်းယူႇၸွမ်းလႅၼ်လိၼ် ႁၢဝ်ႈႁႅင်း မိူၼ်ၵၼ်။  ၶႄႇ  ပိၵ်ႉၽၵ်းတူလႅၼ်လိၼ်  တင်ႈတႄႇ ဝၼ်းတီႈ 1/4/2020 ၼၼ်ႉမႃးတေႃႇထိုင်ယၢမ်းလဵဝ် ပႆႇပိုတ်ႇ တေမီးၶၢဝ်းတၢင်းၸမ် 2 ပီယဝ်ႉ။