ဝဵင်းမၢၼ်ႈမေႃႇ (မၢၼ်ႈမူဝ်ႇ) ၸႄႈမိူင်းၶၢင် ၼႂ်းဝၼ်းလဵဝ် မၢၵ်ႇတႅၵ်ႇ 3 လုၵ်ႈ တိူဝ်ႉၵူၼ်းမိူင်း မၢတ်ႇၸဵပ်း 4 ၵေႃႉ လူႉတၢႆ ၵေႃႉ ၼိုင်ႈ ပဵၼ်ၼၢင်းယိင်း။
မိူဝ်ႈဝႃး ဝၼ်းတီႈ 28/3/2022 မၢၵ်ႇတႅၵ်ႇ တီႈႁိမ်းၵျွင်းၽြႃးၶရိတ်ႉယၢၼ်ႇ (ရောဘတ် နှစ်ခြင်းဘုရားကျောင်း)တီႈၼိုင်ႈ ၊ တီႈႁိမ်းႁူင်းလိုဝ်ႈယဵၼ် (ဧည့်ရိပ်သာ ) တီႈၼိုင်ႈ လႄႈ တီႈႁေႃၼႃႇလီႇ တီႈၼိုင်ႈ ၼႂ်းဝဵင်းမၢၼ်ႈမေႃႇ ၸႄႈမိူင်းၶၢင်။
ၵူၼ်းမၢၼ်ႈမေႃႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၼႂ်းဝၼ်းလဵဝ်တႅၵ်ႇ 3 တီႈၶႃႈ။ ဢၼ်တႅၵ်ႇတီႈႁိမ်းၵျွင်းၶရိတ်ႉယၢၼ်ႇၼၼ်ႉတႄႉ တိူဝ်ႉသႂ်ႇၵူၼ်းမိူင်း ၶီႇရူတ်ႉၶိူင်ႈၵႂႃႇမႃး မၢတ်ႇၸဵပ်း 4 ၵေႃႉ လူႉတၢႆၵေႃႉၼိုင်ႈ ပဵၼ်ၼၢင်းယိင်း။ ဢွင်ႈတီႈၼၼ်ႈသမ်ႉ ၵူၼ်းၵႂႃႇမႃးၼမ် သဵၼ်ႈတၢင်းၵေႃႈၵႅပ်ႈ။ ဢၼ်တႅၵ်ႇထႅင်ႈ သွင်တီႈၼၼ်ႉတႄႉ ဢမ်ႇမီးလွင်ႈတိူဝ်ႉသင်ၶႃႈ”- ဝႃႈၼႆ။
ယၢမ်းလဵဝ် ၵူၼ်းမၢတ်ႇၸဵပ်း 4 ၵေႃႉၼၼ်ႉတႄႉ လႆႈသူင်ႇယူတ်းယႃတူဝ် ဝႆႉတီႈႁူင်းယႃ မၢၼ်ႈမေႃႇဝႆႉယဝ်ႉ။ ဝၢႆးသေ မၢၵ်ႇတႅၵ်ႇယဝ်ႉ ယူႇတီႈပလိၵ်ႈ/ သိုၵ်းမၢၼ်ႈ ၵူတ်ႇထတ်းၵူၼ်းမိူင်းၵႂႃႇမႃး ၸွမ်းႁိမ်းႁွမ်း ၼိူဝ်သဵၼ်ႈတၢင်း ၸိူဝ်းၼၼ်ႉ ႁၢဝ်ႈႁႅင်း။
“တီႈမၢၼ်ႈမေႃႇၼႆႉ မၢၵ်ႇၵႆႉတႅၵ်ႇၼႃႇၶႃႈ။ ၵူၺ်းၵႃႈ ဢမ်ႇမီးလွင်ႈတုမ်ႉတိူဝ်ႉသင် ၵူၼ်းမိူင်းၵေႃႈ ဢမ်ႇသူၼ်ၸႂ်သင် ၵႂႃႇမႃးၵၼ် ၸိူင်ႉၼၼ်ၵူၺ်း။ ၵူၺ်းၵႃႈ ဢၼ်တႅၵ်ႇၵႂႃႇမိူဝ်ႈဝႃးၼႆႉ တိူဝ်ႉသႂ်ႇၵူၼ်းမိူင်းမၢတ်ႇၸဵပ်းလူႉတၢႆ တေလႆႈဝႃႈ ပဵၼ်ႁၢဝ်ႈႁႅင်းၶႃႈ။ ႁဵတ်းသင် ဢမ်ႇတုမ်ႉတိူဝ်ႉ ပလိၵ်ႈမၢၼ်ႈသိုၵ်းမၢၼ်ႈၶဝ်”- ၵူၼ်းမၢၼ်ႈမေႃႇ သိုပ်ႇလၢတ်ႈၼင်ႇၼႆ။
မၢၵ်ႇတႅၵ်ႇ 3 တီႈၼႆႉ ပဵၼ်ၸုမ်းလႂ် ပဵၼ်ၼမ်ႉမိုဝ်းၽႂ် မႃးႁၢင်ႈၵၢင်ဝႆႉ ဢၼ်ဝႃႈၼၼ်ႉ ပႆႇႁူႉ။ ယွၼ်ႉဝႃႈ ၼႂ်းဝဵင်းမၢၼ်ႈမေႃႇၼႆႉသမ်ႉ မီးဝႆႉ ၸုမ်းၵႅတ်ႇၶႄၵူၼ်းမိူင်း PDF လႄႈ သိုၵ်းမၢၼ်ႈ ပလိၵ်ႈမၢၼ်ႈ ၸိူဝ်းၼႆႉ ယူႇသဝ်း။
မိူဝ်ႈဝႃး ယၢမ်းဝၢႆးဝၼ်း 2 မူင်းပၢႆၵေႃႈ ယူႇတီႈ တပ်ႉသိုၵ်းမၢၼ်ႈ ဢၼ်ပၵ်းဝႆႉတီႈ ဝဵင်းမိူင်းမွၵ်ႇၼၼ်ႉ ယိုဝ်းၵွင်ႈလူင် ၵႂႃႇၵူႈႁူးၵူႈတၢင်း ၸွမ်းသၼ်လွႆ ႁိမ်း ႁွမ်းၼၼ်ႉ ပဵၼ်လၢႆလၢႆလုၵ်ႈ ၼႆယဝ်ႉ။
တီႈၼိုင်ႈ ၊ တီႈႁိမ်းႁူင်းလိုဝ်ႈယဵၼ် (ဧည့်ရိပ်သာ ) တီႈၼိုင်ႈ လႄႈ တီႈႁေႃၼႃႇလီႇ တီႈၼိုင်ႈ ၼႂ်းဝဵင်းမၢၼ်ႈမေႃႇ ၸႄႈမိူင်းၶၢင်။){kind=link}