ယၢမ်းလဵဝ် ၵူၼ်းမိူင်းတႆး မိူင်းႁူမ်ႈတုမ် ၸိူဝ်းၶိုၼ်ႈၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇၼၼ်ႉ ဢွၼ်ၵၼ်ႁၢမ်းၵၢၼ်(တူၵ်းၵၢၼ်) ၼမ်သေ ထူပ်းတၢင်းယၢပ်ႇၽိုတ်ႇႁႅင်း ယွၼ်ႉပေႃႈလဵင်ႉၶႄႇ(လၢဝ်းပၢၼ်းၶႄႇ) ၸိူဝ်းမႃးလူင်းတိုၼ်းတၢင်းၾင်ႇၼႆႉ ဢွၼ်ၵၼ်ပွၵ်ႈၶိုၼ်းမိူင်းၶႄႇ ၼမ်။
တႄႇဢဝ် ႁူဝ်ပီ 2022 ၼႆႉမႃး ၵူၼ်းမိူင်းတႆး မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ် ႁႃၵိၼ်လဵင်ႉတွင်ႉ ၼႂ်းၼႃႈလိၼ် ၽွင်းငမ်းတူဝ်ၵဝ်ႇ ၶႄႇၵဝ်ႈၵၢင်ႉ MNDAA ၸႄႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇၼၼ်ႉ ယၢမ်းလဵဝ် ဢွၼ်ၵၼ်ႁၢမ်းၵၢၼ်(တူၵ်းၵၢၼ်) ၼမ်သေ ယွၼ်ႉပေႃႈလဵင်ႉၶႄႇ ၸိူဝ်းမႃး လူင်းတိုၼ်းလၢင်းတၢင်းၾင်ႇၼႆႉ ဢွၼ်ၵၼ်ၵိုတ်းယၢင်ႉၵၢၼ်ငၢၼ်းၼမ်သေ ပွၵ်ႈမိူဝ်းၶိုၼ်းမိူင်းၶႄႇၼမ် ႁူဝ်ပၢၵ်ႇလႂ် 80 % ၵႃႈၼႆႉ။
ႁႅင်းၵၢၼ်တႆး ဢၼ်ၵႂႃႇမီးဝႆႉတီႈလၢဝ်ႇၵၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈလၢဝ်ႇၵၢႆးၼႆႉ ႁႃၵၢၼ်ယၢပ်ႇၼႃႇယဝ်ႉ ၵူၼ်းတူၵ်း ၵၢၼ်ၵေႃႈၼမ်။ ယွၼ်ႉၵူၼ်းၶႄႇ ဢၼ်မႃး လူင်းတိုၼ်းလၢင်းႁဵတ်းတၢင်းၼႆႉ မိူဝ်းပႅတ်ႈၼမ်ၼႃႇ ႁူဝ်ပၢၵ်ႇလႂ် 80 % ၶႃႈဢေႃႈ။ ယွၼ်ႉၼၼ် ၵၢၼ် ငၢၼ်းၼႆႉ လႆႈၵိုတ်းပႅတ်ႈၼမ်သေ ၵူၼ်းတူၵ်းၵၢၼ်ၵေႃႈ ဢွၼ်ၵၼ်တူၵ်းၵၢၼ်တူၵ်းငၢၼ်းၼမ်ၶႃႈဢေႃႈ”- ဝႃႈၼႆ။
ယၢမ်းလဵဝ် ႁၢၼ်ႉၶၢႆၶူဝ်း ဢၼ်ပိုတ်ႇဝႆႉ ၸိူဝ်းၼၼ်ႉ ပဵၼ်ၸၢဝ်းၶႄႇ ၼႂ်းပိုၼ်ႉတီႈ ပွတ်းလၢဝ်ႇၵၢႆး လႃႈသဵဝ်ႈ မူႇၸေႊ ၸိူဝ်းၼႆႉ ၶိုၼ်းမႃးသိုပ်ႇၶၢႆ ပုတ်ႈႁဵတ်းၵႂႃႇ ၸိူင်ႉၼၼ်ၵူၺ်း ဝႃႈၼႆ။
ၵူၼ်းပိုၼ်ႉတီႈ ပွတ်းလၢဝ်ႇၵၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႄႇဢဝ် ႁူဝ်ပီၼႆႉမႃး လူင်ပွင်ၸိုင်ႈၶႄႇ ႁွင်ႉၶိုၼ်းၵူၼ်းမိူင်းၶႄႇၶဝ် ၸိူဝ်းယူႇတီႈလႂ်ၵေႃႈ ႁႂ်ႈပွၵ်ႈၶိုၼ်းမိူဝ်းၵၼ် သင်ဝႃႈ ဢမ်ႇမိူဝ်းၼႆ တေထုၵ်ႇမွတ်ႇပႅတ်ႈသဵၼ်ႈမၢႆ ၵူၼ်းမိူင်းၶႄႇၼႆလႄႈ ၸိူဝ်းပဵၼ်လၢဝ်းပၢၼ်း ၶႄႇ ဢၼ်မႃးလူင်းတၢင်းလၢင်း တၢင်းပွတ်းတွၼ်ႈၼႆႉ ဢွၼ်ၵၼ်ပွၵ်ႈမိူဝ်းၼမ်။ ၵွပ်းၼႆ ၵၢၼ်ငၢၼ်းၵိုတ်းယၢင်ႉ ၵူၼ်းမိူင်းတႆး မိူင်းမၢၼ်ႈ ၸိူဝ်း မႃး ႁဵတ်းၵၢၼ်တၢင်းၼႆႉ ၸင်ႇဢွၼ်ၵၼ်တူၵ်းၵၢၼ်ၼမ်။ မၢင်ၵေႃႉ မႃးယဝ်ႉ ဢမ်ႇမီးၵၢၼ်ႁဵတ်း တႃႇတေပွၵ်ႈၶိုၼ်းၵေႃႈ သမ်ႉဢမ်ႇမီးငိုၼ်း ဢၼ်ၼႆႉ ပဵၼ်ဢၼ်ထူပ်းတၢင်းယၢပ်ႇလိူဝ်ႁႅင်းတႃႇၶဝ်တႄႉ”- ဝႃႈၼႆ။
ၵမ်ႈၼမ် ၵူၼ်းမိူင်းတႆး မိူင်းႁူမ်ႈတုမ် ဢၼ်ၶိုၼ်ႈၵႂႃႇ ႁဵတ်းၵၢၼ် ၼႂ်းဝဵင်းလၢဝ်ႇၵၢႆးၼၼ်ႉ တေပဵၼ်ၵၢၼ်တေႃႇလွင်း၊ Club/ Bar ၊ KTV ၵႃႊလႃႊဢူဝ်ႊၶႄႊ၊ ၶၢႆႁၢၼ်ႉၶူဝ်းၵုၼ်ႇ၊ သူၼ်လႄႈ ၵၢၼ်ၵေႃႇသၢင်ႈ ၸိူဝ်းၼႆႉ ႁႅင်းၵၢၼ်တႆး ဢၼ်မီးဝႆႉတီႈလၢဝ်ႇၵၢႆးလၢတ်ႈ။
 ၼမ်သေ ယွၼ်ႉပေႃႈလဵင်ႉၶႄႇ ၸိူဝ်းမႃး လူင်းတိုၼ်းလၢင်းတၢင်းၾင်ႇၼႆႉ ဢွၼ်ၵၼ်ၵိုတ်းယၢင်ႉၵၢၼ်ငၢၼ်းၼမ်သေ ပွၵ်ႈမိူဝ်းၶိုၼ်းမိူင်းၶႄႇၼမ် ႁူဝ်ပၢၵ်ႇလႂ် 80 % ၵႃႈၼႆႉ။){kind=link}