သိုၵ်းၶၢင် KIA ပႂ်ႉၵဵပ်းၶွၼ်ႇ ၸဝ်ႈၵႃးတၢင်ႇဢွႆႈ တီႈဢိူင်ႇၼမ်ႉဢုမ် ၸႄႈဝဵင်းမူႇၸေႊ ႁၢဝ်ႈႁႅင်း ႁဵတ်းႁႂ်ႈၸဝ်ႈၵႃး/ ၸဝ်ႈသူၼ်  ထူပ်း တၢင်းယၢပ်ႇ။

မိူဝ်ႈၼႆႉ ဝၼ်းတီႈ 28/3/2022 ယၢမ်းၵၢင်ၼႂ် မွၵ်ႈ 10 မူင်း သိုၵ်းၶၢင် KIA ဢဵၼ်ႁႅင်း 10 ၵေႃႉ ပႂ်ႉၵဵပ်းၶွၼ်ႇၼိူဝ်သဵၼ်ႈတၢင်းလူင် ဢိူင်ႇၼမ်ႉဢုမ် ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၸဝ်ႈသူၼ်ဢွႆႈ မူႇၸေႊၵေႃႉၼိုင်ႈလၢတ်ႈ။  ပေႃးပဵၼ်ၵႃး 12 လေႃႉ လႆႈပၼ်သွင်သႅၼ်ႁႃႈမိုၼ်ႇပျႃး၊ ၵႃး 10 လေႃႉ လႆႈပၼ် သွင်သႅၼ်ပျႃးလႄႈ ၵႃး 6 လေႃႉသမ်ႉ လႆႈပၼ်ၼိုင်ႈသႅၼ်ႁႃႈမိုၼ်ႇပျႃး ၼႆယဝ်ႉ။

ၸဝ်ႈသူၼ်ဢွႆႈ မူႇၸေႊၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ၸဝ်ႈသူၼ်တႄႉ တုၵ်ႉၶယၢပ်ႇၽိုတ်ႇဢေႃႈပီၼႆႉ။ သိုၵ်းၸိူဝ်းၼႆႉ ၶဝ်ၵဵပ်းၶွၼ်ႇတီႈၸဝ်ႈၵႃး။ ၸဝ်ႈၵႃးသမ်ႉ မႃးၵဵပ်းတီႈၸဝ်ႈသူၼ် ၶိုၼ်းၶႃႈဢေႃႈ”- ဝႃႈၼႆ။

ပီၼႆႉ ယွၼ်ႉဝႃႈ တၢင်းမိူင်းၶႄႇၵေႃႈ ဢမ်ႇႁပ်ႉသိုဝ်ႉဢွႆႈလႄႈ ဢွႆႈၸိူဝ်းၼႆႉ ၵမ်ႈၼမ် လႆႈတေႃႇလူင်းမႃးၶၢႆၶိုၼ်း တၢင်းမိူင်းယႆ။  ၸဝ်ႈသူၼ်တႄႉဢမ်ႇမီးၼမ်ႉတွၼ်းသင် ။ သင်ဝႃႈ  မိူင်းၶႄႁပ်ႉသိုဝ်ႉတႄႉ ၵႃးလူင် ၼိုင်ႈလမ်းလႆႈၶၢႆ 2 မိုၼ်ႇယႂၼ် တေတူၵ်းငိုၼ်းမၢၼ်ႈမွၵ်ႈ 60 သႅၼ်ပျႃး  ဝႃႈၼႆ။

“ဢမ်ႇၸၢင်ႈႁဵတ်းႁိုဝ်ယဝ်ႉၶႃႈ တႅပ်းသေၵေႃႈ လႆႈယိၼ်းဝႃႈတီႈလႂ်ႁပ်ႉသိုဝ်ႉၵေႃႈ တေႃႉၶၢႆတိၵ်းတိၵ်းယဝ်ႉၶႃႈ။ ဢမ်ႇလႆႈၼမ်ႉတွၼ်းသင် ။ လႆႈ 3 – 4 သႅၼ် ၵိုၼ်းမၢၼ်ႈၵူၺ်း ။ တေ လႆႈ ဝႃႈ ယၢပ်ႇၽိုတ်ႇႁႅင်းၶႃႈဢေႃႈ။ ၶၼ်ၵုၼ်ၼႆႉ ၶိုၼ်ႈၵူႈလွင်ႈၶႃႈ၊ ၵႃႈၵႃးၵေႃႈၶိုၼ်ႈ။ ၵူႈပွၵ်ႈ လႆႈပၼ်ၶွၼ်ႇ 5 မိုၼ်ႇၵႃႈၼႆႉၵူၺ်း။ တေႃႈလဵဝ် ၶဝ်သမ်ႉ ၵဵပ်းၼမ်ၶိုၼ်ႈ မႃးထႅင်ႈ ယၢပ်ႇၽိုတ်ႇႁႅင်းၶႃႈဢေႃႈ”- ၸဝ်ႈသူၼ်ဢွႆႈ သိုပ်ႇလၢတ်ႈၼႄ ၼင်ႇၼႆ။

ၼႂ်းၸႄႈဝဵင်းမူႇၸေႊၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း၊ ၸုမ်းဢူၺ်းလီပွတ်းႁွင်ႇလႄႈ ၸုမ်းပျီႇတူႉတိတ်ႉ ၸိူဝ်းၼႆႉ ဢွၼ်ၵၼ်တူင်ႉၼိုင်ယူႇသဝ်း  ။

လွင်ႈၵဵပ်းၶွၼ်ႇၼႆႉ ၽူႈတွႆႇႁွၵ်ႈလႆႈၶတ်းၸႂ်ၵပ်းသိုပ်ႇၸူး ၾၢႆႇပွင်ႇၶၢဝ်ႇ KIA  ယူႇၵေႃႈ ၵပ်းသိုပ်ႇဢမ်ႇလႆႈလႄႈ ဢမ်ႇၸၢင်ႈ ဢဝ်ၶေႃႈယိုၼ်ယၼ်တီႈၶဝ်။

  မိူဝ်ႈၼႆႉ ဝၼ်းတီႈ 28 သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် တီႈဢိူင်ႇမိူင်းပေႃႈ ၸႄႈဝဵင်းမူႇၸေႊ ထႅင်ႈ ႁၢဝ်ႈႁႅင်း။