သိုၵ်းၵူၼ်းမိူင်း ဢၼ်တႅမ်ႈလိၵ်ႈဝႆႉတီႈၼႃႈသိူဝ်ႈဝႃႈ ပျီႇတူႉၸိတ်ႉ -ၼမ်ႉၶမ်း 1 ၼႆၼၼ်ႉ ႁႄႉၵူတ်ႇထတ်းၵူၼ်းမိူင်း ၼႂ်းဝဵင်းမူႇၸေႊ ႁဵတ်းႁႂ်ႈၵူၼ်းမိူင်းၵႂႃႇမႃးဢမ်ႇလွတ်ႈလႅဝ်း ။
ဝၼ်းတီႈ 27/3/2022 ပျီႇတူႉၸိတ်ႉ ပႂ်ႉတီႈႁိမ်းမိင်ႇၵလႃႇမူႇၸေႊ လႄႈ တၢင်းၽႄ ႁူဝ်သွင် သေ ႁႄႉၵႃးၵူၼ်းမိူင်းၵႂႃႇမႃးၵူတ်ႇထတ်းထဵတ်ႈထၢမ်တႂ်ႈတႂ်ႈၼိူဝ်ၼိူဝ်၊ ႁဵတ်းႁႂ်ႈၵူၼ်းပိုၼ်ႉတီႈၵႂႃႇမႃးႁႃၵိၼ်လဵင်ႉတွင်ႉယၢပ်ႇ။
ၵူၼ်းမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ယၢမ်းဝၢႆးဝၼ်းၼႆႉ ႁဝ်းၶႃႈပေႃႈမႄႈလုၵ်ႈပီႈၼွင်ႉၵူၼ်းႁိူၼ်း ၶီႇၵႃးႁိူၼ်းသေၵႂႃႇၵိၼ်တၢင်းၵိၼ် တီႈႁိမ်းမင်ႇၵလႃႇမူႇၸေႊ ၼၼ်ႉသေ ပွၵ်ႈမႃးၶိုၼ်း ။ မီးၸုမ်းပျီႇတူႉၸိတ်ႉ ၸုမ်းၼိုင်ႈဢၼ်တႅမ်ႈဝႆႉတီႈၼႃႈသိူဝ်ႈဝႃႈ ၼမ်ႉၶမ်း 1 ၼႆၼၼ်ႉ ပႂ်ႉႁႄႉၵႃးသေထဵတ်ႈထၢမ်တႂ်ႈတႂ်ႈၼိူဝ်ၼိူဝ်။ မိူဝ်ႈၵမ်းမႃးၵေႃႈၶဝ်ႁႄႉႁဝ်းၶႃႈသေ ထၢမ်ယဝ်ႉၵမ်းၼိုင်ႈ။ ၽိူဝ်ႇၵမ်းမိူဝ်းၶိုၼ်းၵေႃႈ ႁႄႈဝႃႈမၼ်းႁႄႉၵႃးႁဝ်းၶႃႈ ႁဝ်းၶႃႈဢမ်ႇၵိုတ်းပၼ်လႄႈ ၼႆဝႃႇ ႁိုတ်းႁၢတ်ႇၸၢတ်ႇသႂ်ႇသေထၢမ်ဝႃႈ ႁဝ်းပဵၼ်ၸုမ်းလႂ် လုၵ်ႉလႂ်မႃးဝႃႇ။ ၽိူဝ်ႇမၼ်းမႃးငွၵ်ႈတူၺ်းၼႂ်းၵႃး မီးပႃးလုၵ်ႈဢွၼ်ႇ ၵူၼ်းထဝ်ႈ လႄႈမၼ်းၵေႃႈဢမ်ႇၸၢင်ႈဝႃႈသင်ထႅင်ႈသေ ပွႆႇပွၵ်ႈႁိူၼ်းၶိုၼ်းလီငၢမ်း” – ဝႃႈၼႆ။
တီႈတၢင်းပွၵ်ႉမိင်ႇၵလႃႇမူႇၸေႊ ၼႆႉ ဢမ်ႇၸႂ်ႈၼွၵ်ႈဝဵင်းတႄႉတႄႉ၊ ၶဝ်ႈပႃးၼႂ်းသၢပ်ႇဝဵင်းယဝ်ႉလႄႈ ဢၼ်ပျီႇတူႉၸိတ်ႉမႃးပႂ်ႉၵူတ်ႇထတ်းၼႆႉ ႁဵတ်းႁႂ်ႈလွၵ်ႇငိုတ်ႈၸႂ်ၵူၼ်းၼႂ်းဝဵင်း ဢၼ်ၼိုင်ႈ ၵူၼ်းၼုမ်ႇမူႇၸေႊဢၼ်ၺႃးႁႄႉၵူတ်ႇထတ်းၼၼ်ႉလၢတ်ႈၼင်ႇၼႆ။
“တီႈၶႃႈတႄႉ မၼ်းဢမ်ႇယွၼ်းငိုၼ်းၼင်ႇၵဝ်ႇ။ မၼ်းယွၼ်းတူၺ်းမၢႆၾၢင် မၢတ်ႉပူင်ႇတိၼ်ႇ၊ ႁဝ်းၶႃႈၵႂႃႇမႃးၼႂ်းဝဵင်းၵူၺ်းလူးၼေႃႈ တေႁဵတ်းႁိုဝ်ပႃး မၢႆၾၢင်ၵႂႃႇမႃးလႃႇ။ မၼ်းဢဵၵ်းသၢတ်ႈလွၵ်ႇငိုတ်ႈၶႃႈဝႃႈ – ပွၵ်ႈတေမႃးပေႃးႁဵတ်းၼႆထႅင်ႈတႄႉ ဢမ်ႇလႆႈၵူၺ်ႉၼႆဝႃႇ။ ၶႃႈထၢင်ႇတႄႉ ပေႃးဢမ်ႇပႃးလုၵ်ႈဢွၼ်ႇၵူၼ်းထဝ်ႈသေ ပေႃးမႃးၵေႃႉလဵဝ်ၸိူဝ်းၼႆႉတႄႉ ဢမ်ႇဝႃႈၸၢႆး ဢမ်ႇဝႃႈယိင်း လႅပ်ႈတေလီမႆႈၸႂ်တႄႉယဝ်ႉၶႃႈ ”- မၼ်းၸၢႆးၶၢင်းပွင်ႉၼင်ႇၼႆ။
တၢင်းၶဝ်ႈဝဵင်းမူႇၸေႊၼႆႉ မီးသိုၵ်း၊ ပလိၵ်ႈ၊ ပၢႆးယူႇလီ ပႂ်ႉႁႄႉသေၵူတ်ႇထတ်း ၊ တၢင်းမိင်ႇၵလႃႇမူႇၸေႊ ယွမ်ႇတီႈၵူၼ်းၵိုၼ်းသမ်ႉမီး ပျီႇတူႉၸိတ်ႉပႂ်ႇၵူတ်ႇထတ်း။ တၢင်းလုၵ်ႉမူႇၸေႊ ဢွၵ်ႇၵႂႃႇ ၼမ်ႉၶမ်းၵေႃႈ ယူႇယူႇၵႆႉမီးသိုၵ်း ပလိၵ်ႈ လႄႈပျီႇတူႉၸိတ်ႉႁူမ်ႈၵၼ်ပႂ်ႉၵူတ်ႇထတ်း ဝႃႈၼႆ။
“တီႈႁိမ်းမိင်ႇၵလႃႇမူႇၸေႊ ၼၼ်ႉၶဝ်ပႂ်ႉၵူတ်ႇထတ်းမႃးၼႆႉ တိုၵ်ႉလႆႈမွၵ်ႈ ဝူင်ႈၼိုင်ႈၼႆႉၵူၺ်း။ ပိူင်လူင် ၶဝ်ပႂ်ႉ ထတ်း ၵူၼ်းၶႄႇ ၸိူဝ်းဢမ်ႇမီးမၢတ်ႉပူင်ႇတိၼ်ႇလႄႈ ထတ်းရူတ်ႉၵႃးဢမ်ႇမီးဝႂ်ၶွၼ်ႇၸိူဝ်းၼႆႉ။ ၵမ်ႈၼမ် ပေႃးပဵၼ်ၵူၼ်း ၼႂ်းဝဵင်းမူႇၸေႊတႄႉၶဝ်ၵေႃႈထတ်းထဵတ်ႈထၢမ် သေ ပွႆႇၵႂႃႇၸိူင်ႉၼၼ်ၵူၺ်း။” ၵူၼ်းယူႇတၢင်းပွၵ်ႉတူဝ်ႇယွတ်ႈ ၵေႃႉၼိုင်ႈလၢတ်ႈ။
ၸူဝ်ႈၶၢဝ်းသိုၵ်းမၢၼ်ႈပိုၼ်ၽၢဝ်ႇဝႃႈ တင်ႈၵဝ်ဝၼ်းတီႈ 1/4/2022 ၼႆႉၵႂႃႇ ၽႂ်ဢွၵ်ႇတႃႈပႆတၢင်းၵေႃႈႁႂ်ႈဢဝ်မၢႆၾၢင်မၢတ်ႉပုင်ႇတိၼ်ႇၵႂႃႇပႃးၼႆမႃးၼႆႉ သိုၵ်းမၢၼ်ႈ ပလိၵ်ႈမၢၼ်ႈ ဢမ်ႇၼၼ်ပျီႇတူႉၸိတ်ႉ ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း။
