ၶုမ်ၵူၼ်းတၢႆၼႂ်းပႃႇႁဵဝ်ႈဝဵင်းၼမ်ႉၶမ်း ၺႃးထုပ်ႉၵွႆသေၸၼ်ဢဝ်လဵၵ်းၵေႃႇၶုမ်ၼၼ်ႉၵႂႃႇၶၢႆၵိၼ် ၵူၼ်းမိူင်းၼမ်ႉၶမ်း လၢတ်ႈဝႃႈလႅပ်ႈပဵၼ်ႁွႆးမိုဝ်းၵူၼ်းသူႇသမ်းၵိၼ်ယႃႈ ၸိူဝ်းယူႇၼႂ်းပႃႇႁဵဝ်ႈ။
မိူဝ်ႈဝႃး ဝၼ်းတီႈ 27/3/2022 ၶုမ်ၵူၼ်းတၢႆ ပႃႇႁဵဝ်ႈ ဝဵင်းၼမ်ႉၶမ်း ၺႃးထုပ်ႉၵွႆသေ ဢဝ်လဵၵ်းမၼ်းၵႂႃႇ၊ ၽူႈမီးပုၼ်ႈၽွၼ်း ၵႂႃႇၵူတ်ႇထတ်းတူၺ်း ၶုမ်ၵုတ်းလူႉၵွႆဝႆႉမွၵ်ႈ 10 ၶုမ်ဝႃႈၼႆ။
ၽူႈမီးပုၼ်ႈၽွၼ်း ဢၼ်လူင်းပိုၼ်ႉတီႈၵႂႃႇတူၺ်းငဝ်းလၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ၽွင်းႁဝ်းၶႃႈ ၵႂႃႇၽႅဝ် တီႈၼၼ်ႈ ၵူၼ်းသူႇသမ်းၵိၼ်ယႃႈမဝ်းၵမ် ၸိူဝ်းဢၼ်ယူႇၼႂ်းပႃႇႁဵဝ်ႈဝႆႉၸိူဝ်းၼၼ်ႉတႄႉ ဢမ်ႇမီးသေၵေႃႉယဝ်ႉၶႃႈ။ ပၢႆႈမူတ်းယဝ်ႉ။ ဢမ်ႇတီႉလႆႈ သေၵေႃႉၶႃႈ။ တေပဵၼ်ၼမ်ႉမိုဝ်းၶဝ်ၵူၺ်း။ ထုပ်ႉယႃႉၶုမ်ၵူၼ်းတၢႆဝႆႉ 10 ၶုမ်ပၢႆ ယဝ်ႉၵေႃႉ လဵၵ်းၵေႃႇၶုမ်ၵေႃႈဢဝ်ၵႂႃႇမူတ်း။ လႅပ်ႈတေဢဝ် ၵႂႃႇၶၢႆ ၵိၼ်ၶႃႈၵႂႃႈ”- ဝႃႈၼႆ။
ၼႂ်းဝဵင်းၼမ်ႉၶမ်းၼႆႉ ဝၢႆး သိုၵ်းမၢၼ်ႈ ယိုတ်းမိူင်းမႃး ၵၢၼ်ႁႃၵိၼ်လဵင်ႉတွင်ႉယၢပ်ႇယဵၼ်း၊ ၵူၼ်းဢမ်ႇမီးၵၢၼ်မီးငၢၼ်းၵေႃႈမီးၼမ်မႃး၊ ၵူၼ်းၸိူဝ်းလုၵ်ႉတၢင်ႇတီႈသီႇလႅၼ်မႃးၵေႃႈ ပႃးၵၼ်သူႇသမ်းၵိၼ်ယႃႈမဝ်းၵမ်၊ ပၢင်တေႃႇပၢင်လွင်းၵေႃႈသမ်ႉမီးထႅင်ႈလႄႈ ယၢမ်းလဵဝ်ၽူႈလၵ်ႉၵူၼ်းၸူၼ်ၵေႃႈလိူင်ႇၼမ်။
ၵူၼ်း ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “တီႈၼမ်ႉၶမ်းၼႆႉ ၽူႈလၵ်ႉလိူင်ႇၼမ်တႄႉၶႃႈ။ တေႃႈၼင်ႇၾႆးသႅင်လႅတ်ႈ ဢၼ်သႂ်ႇဝႆႉတီႈၼႃႈ ႁိူၼ်းၼႆႉယင်းလၵ်ႉဢဝ်ၵႂႃႇၶႃႈဢေႃႈ။ ယဝ်ႉၵေႃႈ ပၢင်တေႃႇလွင်း ၵဵမ်းပႃၼႆႉ ယိုင်ႈၶႅၼ်းၼမ်လိူဝ်ၵူႈပွၵ်ႈၶႃႈယဝ်ႉ”- ဝႃႈၼႆ။
တီႈဝဵင်းၼမ်ႉၶမ်းၼႆႉ ၵူၼ်းသူႇသမ်းၵိၼ်ယႃႈမဝ်းၵမ်လိူင်ႇၼမ် ၵေႃႈသိုၵ်းမၢၼ်ႈ ပလိၵ်ႈမၢၼ်ႇဢမ်ႇတီႉၺွပ်းဢဝ်လိူင်ႈသေပွၵ်ႈ ။ ပွႆႇဝႆႉၵူၼ်းၸိူဝ်းၼၼ်ႉယူႇၵိၼ်ၵႂႃႇမႃးလွတ်ႈလႅဝ်းၼႂ်းဝဵင်း ။
မိူဝ်ႈႁူဝ်လိူၼ်မၢတ်ႉၼႆႉ ဢၼ်သိုပ်ႇၾူၼ်းႁူၺ်းဢဝ်ၼၢင်းယိင်းဢွၼ်ႇၵေႃႉၼိုင်ႈ ဝႃႈတေသိုဝ်ႉၵႃးမၼ်းၼၢင်းၼႆသေ ဢဝ်ၵႂႃႇၵၼ်ႉၸၼ်လူလၢႆၶႃႈႁႅမ်တၢႆယဝ်ႉ ဢဝ်တူဝ်တၢႆၵႂႃႇပႅတ်ႈဝႆႉၼႂ်းပႃႇႁဵဝ်ႈၵေႃႈယၢမ်ႈမီးမႃး။
မိူဝ်ႈဝူင်ႈပူၼ်ႉၼႆႉၵူၺ်း တီႈဝဵင်းၵူတ်ႉၶၢႆ မီးၵူၼ်းၸုမ်းၼိုင်ႈတီႉဢဝ်လုၵ်ႈဢွၼ်ႇၵႂႃႇသေႁႂ်ႈပေႃႈမႄႈမၼ်းဢဝ်ငိုၼ်းမႃးထုတ်ႇဢဝ်ၶိုၼ်း။ ပေႃႈမႄႈမၼ်းဢမ်ႇမႃးထုတ်ႇလႆႈလႄႈ ၶႃႈႁႅမ်လုၵ်ႈဢွၼ်ႇသေ ဢဝ်ၵႂႃႇပႅတ်ႈဝႆႉၼႂ်းပႃႇႁဵဝ်ႈၶႄႇ။
ၵူၼ်းၼုမ်ႇၽူႈတူင်ႉၼိုင်တူင်ႇဝူင်းၵူၼ်း ၵူၼ်းၼမ်ႉၶမ်းဝႃႈ ၸူဝ်ႈယႃႈမဝ်းၵမ်လိူင်ႇ ပၢင်လွင်းလိူင်ႇၼႆႉ ဢွၼ်ၵၼ်ႁဵတ်းလွင်ႈၽိတ်းမၢႆမီႈ မီးယူႇၵူႈဝၼ်း ဝႃႈၼႆ။
