ၵူၼ်းဝၢၼ်ႈၵွင်းႁုင်း ၸႄႈဝဵင်းသီႇပေႃႉၵေႃႉၼိုင်ႈ ယဵပ်ႇၺႃးမၢၵ်ႇမႅင်းၾင်လိၼ်ၼႂ်းႁႆႈ တၢႆထင်တီႈ လုၵ်ႈလၢင်းမေးၼၢင်းမၼ်းၸၢႆးၸိူဝ်း ၵိုတ်းတၢင်းလင် ထူပ်းတၢင်းယၢပ်ႇၽိုတ်ႇ တႃႇလွင်ႈယူႇလွင်ႈၵိၼ် တႃႇလဵင်ႉလူၵၼ်ၵႂႃႇမိူဝ်းၼႃႈ။
မိူဝ်ႈဝၼ်းတီႈ 26/3/2022 ယၢမ်းၵၢင်ၼႂ် 6 မူင်းပၢႆ ၸၢႆးပႃႉသူၺ်ႇလႄႈ ၵူၼ်းဝၢၼ်ႈ 2 ၵေႃႉ ၵႂႃႇတီႇၽဵဝ်ႈႁႆႈၸွမ်းၵၼ် ႁိမ်းဝၢၼ်ႈၵွင်းႁုင်း ဢိူင်ႇၼမ်ႉယၢင်း ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ၊ ၸၢႆးပႃႉသူၺ်ႇ ယဵပ်ႇၺႃးမၢၵ်ႇ လူႉတၢႆထင်တီႈ ၼႂ်း ႁႆႈ။
ၽူႈၵွၼ်းဝၢၼ်ႈ ၵွင်းႁုင်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၵႂႃႇတီႇၽဵဝ်ႈႁႆႈ၊ မၼ်းၸၢႆးသမ်ႉ ၵႂႃႇၽၢႆႈ(ယဵဝ်ႈ) ၼႂ်းႁႆႈၸွမ်းယုမ်းၼၼ်ႉသေ ယဵပ်ႇ ၺႃးမၢၵ်ႇတႅၵ်ႇ။ ၵူၼ်းၵႂႃႇႁဵတ်းႁႆႈၸွမ်းၵၼ်ၼၼ်ႉ ၼႅတ်ႈၵႂႃႇတူၺ်း မၼ်းသေ ၽိူဝ်ႇထိုင်တီႈမၼ်းၸၢႆးၼၼ်ႉ ပေႃးဢမ်ႇမီးသၢႆၸႂ်ယဝ်ႉ” – ဝႃႈၼႆ။
ၸၢႆးပႃႉသူၺ်ႇၼႆႉ ဢႃယုတေမီး 40 ပီ ပဵၼ်ၵူၼ်းဝၢၼ်ႈၵွင်းႁုင်း ဢိူင်ႇၼမ်ႉယၢင်း ၸႄႈဝဵင်းသီႇပေႃႉ မီးဝႆႉလုၵ်ႈၸၢႆးၵေႃႉၼိုင်ႈ၊ လုၵ်ႈယိင်းၵေႃႉ ၼိုင်ႈလႄႈ မေးၼၢင်း ယၢမ်းလဵဝ် ၶွပ်ႈၶူဝ်းမၼ်းၸၢႆး ဢွၼ်ၵၼ် ထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း လွင်ႈၵၢၼ်ၵိၼ်ယူႇလဵင်ႉတွင်ႉၵႂႃႇ။
“မၼ်းၸၢႆးၼႆႉ ပဵၼ်ၵူၼ်းႁႃလဵင်ႉၼႂ်းၶွပ်ႈၶူပ်းၵမ်းလဵဝ်။ ၶွပ်ႈၶူဝ်းၶဝ်သမ်ႉ ပဵၼ်ၵူၼ်းႁဵတ်းၵၢၼ်ႁႃၵိၼ်ၸွမ်းဝၼ်းလႄႈ သင်ဢမ်ႇမီးမၼ်းၸၢႆး ယဝ်ႉ ၼႆၸိုင် ၸိူဝ်းလုၵ်ႈလၢင်းၼၢင်းမေး ၸိူဝ်းၵိုတ်းတၢင်းလင်တႄႉ ပဵၼ်ဢၼ်ယၢပ်ႇၽိုတ်ႇ ၵိၼ်းၸႂ် ႁႅင်းၶႃႈဢေႃႈ။ သင်ဝႃႈ မီးၸဝ်ႈတႃႇၼ ၵမ်ႉၸွႆႈ ထႅမ်မႃးၼႆၸိုင် တေၶႅၼ်းၸႂ်လူမ်ၸႂ်မႃးၵႂႃႇၽွင်ႈယူႇၶႃႈ”- ၽူႈၵွၼ်းဝၢၼ်ႈၵွင်းႁုင်း သိုပ်ႇလၢတ်ႈၼႄၼင်ႇၼႆ။
ၼႂ်းဝၼ်းၼၼ်ႉၵူၺ်း ယၢမ်းဝၢႆးဝၼ်း ယူႇတီႈလုၵ်ႈလၢင်းၼၢင်းမေးလႄႈ ပီႈၼွင်ႉၸိူဝ်ႉၶိူဝ်း ႁူမ်ႈလူၺ်ႈၵူၼ်းဝၢၼ်ႈသေ လႆႈပူၼ်ႉၶၢပ်ႈတူဝ် ၸၢႆးပႃႉ သူၺ်ႇၵႂႃႇ ၼႆယဝ်ႉ။
ဢွင်ႈတီႈ ၸၢႆးပႃႉသူၺ်ႇ ယဵပ်ႇၺႃးမၢၵ်ႇမႅင်းၾင်လိၼ်သေ လႆႈလူႉတၢႆၵႂႃႇၼၼ်ႉ မိူဝ်ႈပူၼ်ႉမႃး ပဵၼ်ဢွင်ႈတီႈ သိုၵ်းဢူၺ်းလီပွတ်းႁွင်ႇလႄႈ RCSS ယၢမ်ႈပဵၼ်ပၢင်တိုၵ်းၵၼ်မႃးႁၢဝ်ႈႁႅင်း တင်းၼမ် ၵဵဝ်ႇလူၺ်ႈလွင်ႈၼႆႉ ယွၼ်ႉမီး လွင်ႈႁၢင်ႈၵၢင်မၢၵ်ႇတေႃႇၵၼ်သေ ဝၢႆးသိုၵ်းထွၼ်ဢွၵ်ႇ ၼႂ်းပိုၼ်ႉတီႈယဝ်ႉၼၼ်ႉ လွင်ႈႁၢင်ႈၵၢၼ်မၢၵ်ႇမႅင်းၼႆႉ ဢမ်ႇမီးၸုမ်းလႂ် မႃးပူတ်းဢွၵ်ႇပၼ်ၶိုၼ်း။
ၵဵဝ်ႇလူၺ်ႈ လွင်ႈၵူၼ်းမိူင်း ယဵပ်ႇၺႃးမၢၵ်ႇမႅင်းလႆႈလူႉတၢႆ ထင်တီႈၸိူင်ႉၼႆ ဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် မႃးႁပ်ႉဢဝ်ပုၼ်ႈၽွၼ်းသင်။
ပူၼ်ႉမႃး မိူဝ်ႈဝၼ်းတီႈ 18/3/2022 ၼၼ်ႉၵေႃႈ ၸၢႆးဢွင်ႇၵႅၼ်ႇ ဢႃယု 22 ပီ ၵူၼ်းဝၢၼ်ႈသူၼ်ဢွႆႈ ဢိူင်ႇၼမ်ႉသိမ်ႇ ယဵပ်ႇၺႃးမၢၵ်ႇတီႈႁိမ်းထဵင် ၶဝ်ႈ မၼ်းၸၢႆးသေ တႅၵ်ႇတိူဝ်ႉသႂ်ၶႃမၼ်းၸၢႆး ယၢမ်းလဵဝ် လႆႈတႅပ်ႈတႅတ်ႈၶႃၶွၼ်ၼိုင်ႈ လူဝ်ႇတၢင်းၸွႆႈထႅမ် ၵႃႈယူတ်းယႃတင်းၼမ်။
