သၢႆၵၢၼ်မိၼ်ၼႂ်းမိူင်းမၢၼ်ႈ ပိုၼ်ၽၢဝ်ႇဝႃႈ တင်ႈဢဝ် ဝၼ်းတီႈ 1 ဢေႊပရိူဝ်ႊလ် 2022 ၼႆႉၵႂႃႇ   ၽႂ်ဢမ်ႇပႃးမၢႆၾၢင် (မၢတ်ႉပုင်ႇတိၼ်ႇ) တေဢမ်ႇပၼ်ၶိုၼ်ႈၶိူင်ႈမိၼ် ၵႂႃႇမႃးၼႂ်းမိူင်းယဝ်ႉဝႃႈၼႆ။

ဢိင်ၼိူဝ်ၾၢႆႇ လဝၵ ႁွင်ႈၵၢၼ်ၵဵပ်းသဵၼ်ႈမၢႆႁူဝ်ၵူၼ်း ပိုၼ်ၽၢဝ်ႇမိူဝ်ႈဝၼ်းတီႈ 22/3/2022 ဝႆႉဝႃႈ တင်ႈဢဝ် ဝၼ်းတီႈ 1 ဢေႊပရိူဝ်ႊလ် ၼႆႉၵႂႃႇ  ၽႂ်ၵေႃႉလႂ်တေဢွၵ်ႇတႃႈပႆတၢင်း တၵ်းတေလႆႈမီး မၢႆၾၢင် မၢတ်ႉပုင်ႇတိၼ်ႇ ၵႂႃႇပႃးၸွမ်း ၵူႈၵမ်းဝႃႈၼႆ။

ဢိင်ၼိူဝ်လွင်ႈၼႆႉသေ ၾၢႆႇသၢႆၵၢၼ်မိၼ်ၵေႃႈ ၸိူဝ်းပဵၼ် သၢႆၵၢၼ်မိၼ် ၸိူဝ်ႉၸၢတ်ႈမၢၼ်ႈ (MNA) ၊ သၢႆၵၢၼ်မိၼ် မၢၼ်းရတၼႃႇပူင်ႇ ၊ Air KBZ  ဢႄးၵမ်ႇပေႃးၸ ၊  Air Thanlwin ဢႄးတၢၼ်ႇလုၼ်ႇ ၸိူဝ်းၼႆႉၵေႃႈ ပိုၼ်ၽၢဝ်ႇဢွၵ်ႇမႃးႁင်းၽႂ်ႁင်းမၼ်းဝႃႈ-ၵူၼ်းမိူင်းၸိူဝ်းတေၶိုၼ်ႈၶိူင်ႈမိၼ် တၵ်းလႆႈဢဝ်မႃး မၢႆၾၢင် (မၢတ်ႉပုင်ႇတိၼ်ႇ) ။ ဢဝ် ဝႂ်ၵမ်ႉတီႈ လဝၵ၊ ဝႂ်ၵမ်ႉတီႈႁူင်းပလိၵ်ႈ ၊ ဝႂ်ၶပ်းၶီႇရူတ်ႉ၊ ဝႂ်လုၵ်ႈႁဵၼ်း ၸိူဝ်းၼႆႉမႃး တႅၼ်းတၢင် မၢတ်ႉပုင်ႇတိၼ်ႇသေၶိုၼ်ႈၶိူင်ႈမိၼ်မိူၼ်ၵူႈပွၵ်ႈတႄႉဢမ်ႇလႆႈယဝ်ႉ ဝႃႈၼႆ။

ၽွင်းၶၢဝ်းလူင်ပွင်ၸိုင်ႈၵူၼ်းမိူင်းလိူၵ်ႈတင်ႈ 10 ပီ မႃးၼၼ်ႉ ၵူၼ်းမိူင်း ၵႂႃႇတႃႈပႆတၢင်း လႆႈလွတ်ႈလႅဝ်း။ ဢမ်ႇမီးၵဵတ်ႉ/လၢၼ်ႇထဵတ်ႈထၢမ်သင်၊ ၶၢဝ်းတၢင်းမၢင်ဢၼ် ဢမ်ႇပႃးမၢႆၾၢင်ၵေႃႈယင်းလႆႈ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 1 ပီၼႆႉ သိုၵ်းမၢၼ်ႈၶိုၼ်းတင်ႈ လၢၼ်ႇ/ ၵဵတ်ႉ ဝႆႉတၢင်းၶဝ်ႈ တၢင်းဢွၵ်ႇဝဵင်း ၊ ၸွမ်းသဵၼ်ႈတႃႈသၢႆတၢင်း ၵူႈတီႈသေ ၵူတ်ႇထတ်းၵူၼ်းမိူင်းၵႂႃႇမႃး။ ၵူတ်ႇထတ်းပႃးမၢႆၾၢင် မၢတ်ႉပုင်ႇတိၼ်ႇ ၊ ၽႂ်ဢမ်ႇမီးၵေႃႈ ယွၼ်းငိုၼ်းမႂ်ၵိၼ်ၼပ်ႉႁူဝ်မိုၼ်ႇ ၵူႈၵမ်း။