ႁၢၼ်ႉၶၢႆၾူၼ်းဢၼ်မီးတီႈ ပွၵ်ႉၸၢင်ႈၶမ်းႁွင်ႇ ဝဵင်းသီႇပေႃႉၺႃးယႃႉၽၵ်းတူ ၶဝ်ႈလၵ်ႉၶူဝ်းၶွင်ၼႂ်းႁၢၼ်ႉ၊ ဢဝ်ၵႂႃႇၶူဝ်းၵဝ်ႇလႄႈၶူဝ်းမႂ်ႇတင်းမူတ်းတႃႇၵႃႈၶၼ် 20 သႅၼ်ပၢႆ။
ႁၢၼ်ႉၶၢႆၾူၼ်းၼႆႉၺႃးယႃႉ ၶဝ်ႈလၵ်ႉမိူဝ်ႈဝႃး ဝၼ်းတီႈ 22/3/2022 ယၢမ်းၵၢင်ၼႂ်ၸဝ်ႉ မွၵ်ႈ 3 မူင်း ၊ ပဵၼ်ၶၢဝ်းယၢမ်းႁၢမ်ႈဢွၵ်ႇႁိူၼ်း ဢၼ်သိုၵ်းမၢၼ်ႈပိုၼ်ၽၢဝ်ႇ ၶိူဝ်ႊၾိဝ်ႊ ဝႆႉ။
ၵူၼ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ယႃႉၽၵ်းတူ ၶဝ်ႈလၵ်ႉၶူဝ်းသေ ၶိုၼ်းဢဝ်သေႃးမၢၵ်ႇသေႃး ဝၢင်းဝႆႉပၼ်လီလီၼႃႈႁၢၼ်ႉဢေႃႈ။ ၽိူဝ်ႇၵၢင်ၼႂ်ၶႃႈတေၵႂႃႇပိုတ်ႇႁၢၼ်ႉၶၢႆၶူဝ်းၸင်ႇၵႂႃႇႁၼ်လႄႈႁူႉၵူၺ်း။ ၶဝ်လႅပ်ႈတေၶဝ်ႈလၵ်ႉယၢမ်းၵၢင်ၼႂ်ၸဝ်ႉမိူင်းပႆႇလႅင်းမွၵ်ႈ 3-4 မူင်းၼႆႉၶႃႈယူဝ်ႉ။ ၶမ်ႈဝႃးၾႆးၾႃႉၵေႃႉမွတ်ႇၶႃႈလႄႇ။ ယင်းပၢႆတိုၵ်ႉမီးမၢႆမီႈဢမ်ႇလႆႈဢွၵ်ႇႁိူၼ်းယၢမ်းၵၢင်ၶိုၼ်းယူႇဢေႃႈၼႆႉၶဝ်ယင်းပႆႇပူတ်းလူး”- ဝႃႈၼႆ။
ၽူႈလၵ်ႉလႆႈၵႂႃႇ မိုဝ်းထိုဝ်ဢၼ်မႂ်ႇ 5 လုၵ်ႈလႄႈ ဢၼ်ၵဝ်ႇ မိုဝ်းသွင် ဢိၵ်ႇပႃးဢၼ်ပိူၼ်ႈမႃးၾၢၵ်ႇမႄးဝႆႉၸိူဝ်းၼၼ်ႉ 15 လုၵ်ႈ ။ လိူဝ်ၼၼ်ႉဢဝ်ၵႂႃႇပႃး ၶိူင်ႈပိုတ်ႇ/မႄးမိုဝ်းထိုဝ်ၸိူဝ်းၼၼ်ႉလူးၵွၼ်ႇ။ တင်းမူတ်းတေတူၵ်းမႅၼ်ႈၵႃႈၶၼ်မွၵ်ႈ 20 သႅၼ်ပျႃးၼႆႉ – ၸဝ်ႈၶွင်ႁၢၼ်ႉ လၢတ်ႈၼင်ႇၼႆ။
“တီႈသီႇပေႃႉၼႆႉ မွင်းဝႃႈၵၢင်ၶမ်ႈၵူၺ်းယဝ်ႉ ပိူၼ်ႈဢမ်ႇႁတ်းဢွၵ်ႇႁိူၼ်းၵၼ်ယဝ်ႉၶႃႈ။ လွင်ႈယႃႉၽွၵ်ႈႁၢၼ်ႉၶၢႆ ၸိူဝ်းၼႆႉ ၵႆႉပဵၼ်ၼႃႇၶႃႈ။ မိူဝ်ႈလဵဝ် ႁႃၵေႃႈ ႁႃၵိၼ်ယၢပ်ႇ။ လႆႈဢၼ်လႂ်ၵေႃႈ လၵ်ႉဢၼ်ၼၼ်ႉၶႃႈဢေႃႈ ၵူၼ်းလၵ်ႉတႄႉ။ လွင်ႈယႃႉၽွၵ်ႈသႅင်ႇၼႆႉ ၶႂ်ႈဝႃႈမီးၵူႈဝၼ်းယဝ်ႉ။ တီႈၼိုင်ႈ ယဝ်ႉ တီႈၼိုင်ႈ”- ၵူၼ်းပိုၼ်ႉတီႈ သီႇပေႃႉ သိုပ်ႇလၢတ်ႈၼႄၼင်ႇၼႆ။
တႄႇဢဝ် ႁူဝ်ပီ 2021 သိုၵ်းမၢၼ်ႈ ယိုတ်းမိူင်းမႃးၼၼ်ႉ ၽူႈလၵ်ႉၵူၼ်းၸူၼ် လိူင်ႇၼမ် ။ ၵူႈဝၢၼ်ႈ ၵူႈဝဵင်းၼႂ်းၸိုင်ႈတႆး မီးလွင်ႈ ယႃႉႁၢၼ်ႉၶၢႆၶူဝ်း လၵ်ႉၶူဝ်းၵုၼ်ႇ ႁၢၼ်ႉၶၢႆၶမ်း၊ ႁၢၼ်ႉၶၢႆၾူၼ်း ၸိူဝ်းၼႆႉ ၵူႈဝၼ်း ။ ငဝ်းလၢႆးဝၢၼ်ႈမိူင်းယၢမ်းလဵဝ် ၶုၼ်ၽွင်းငမ်းမိူင်းဢမ်ႇမီး၊ ၵူၼ်းမိူင်းဢမ်ႇၸၢင်ႈၸႂ်ယႂ်ႇၽႂ် ဢမ်ႇၸၢင်ႈၵႂႃႇတိူင်ႇလၢတ်ႈတီႈလႂ်လႄႈ ၼင်ႇႁိုဝ်ၶူဝ်းၶွင်ၸဝ်ႈၵဝ်ႇတေဢမ်ႇထုၵ်ႇလၵ်ႉၼၼ်ႉ ၵူၼ်းမိူင်းတၵ်းၾၢင်ႉတူဝ်ႁင်းၵူၺ်း ၵွၺ်းယဝ်ႉ ဝႃႈၼႆ။