ၸၢႆးဢွင်ႇၵႅၼ်ႇ ၵူၼ်းၼုမ်ႇ သီႇပေႃႉ ၵေႃႉယဵပ်ႇၺႃးမၢၵ်ႇ တီႈၼႂ်းသူၼ်ၶဝ်ႈၵၢပ်ႇၼၼ်ႉ ယၢမ်းလဵဝ် လႆႈတႅပ်းပႅတ်ႈၶႃၶွၼ်ၼိုင်ႈ  လူဝ်ႇတၢင်း ၸွႆႈထႅမ် ၵႃႈယူတ်းယႃတင်းၼမ်။

ၸၢႆးဢွင်ႇၵႅၼ်ႇ ဢႃယု 22 ပီ  ယဵပ်ႇၺႃးမၢၵ်ႇမႅင်းၾင်လိၼ် တီႈၼႂ်းသူၼ်ၶဝ်ႈၵၢပ်ႇ မၼ်းၸၢႆး   မိူဝ်ႈဝၼ်းတီႈ 18/3/2022 ပူၼ်ႉမႃးၼႆႉၼၼ်ႉ  ၶႅင်ႈၶႃၶႂႃမၢတ်ႇၸဵပ်း ထိုင်လုပ်ႇႁၵ်းလႄႈ လႆႈတႅပ်ႈပႅတ်ႈလုၵ်ႉဢဝ်တီႈၶႃလူင် ၾၢႆႇၶႂႃလူင်းတႂ်ႈ ။ ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃလူင်ၵူၼ်းမိူင်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ  ၊ ယၢပ်ႇၽိုတ်ႇၵိၼ်းၸႂ် လွင်ႈ ၵႃႈယူတ်းယႃ၊  လူဝ်ႇတၢင်းၸွႆႈထႅမ်ဝႆႉၼႆယဝ်ႉ။

ပီႈၼွင်ႉ ၸမ်ၸႂ် ၸၢႆးဢွင်ႇၵႅၼ်ႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈသိုၼ်းၼႆႉ မေႃယႃၶဝ် လႆႈတႅပ်းပႅတ်ႈၶႃမၼ်း  ၾၢႆႇၶႂႃ တႄႇဢဝ် ၶႃလူင်လူင်းတႂ်ႈဢေႃႈ။ ယၢမ်းလဵဝ် လူဝ်ႇတၢင်းၸွႆႈထႅမ် ၵႃႈယူတ်းယႃဢေႃႈ။ သဵင်ႈၵႂႃႇၼပ်ႉႁူဝ်သႅၼ် မၼ်းယဝ်ႉၶႃႈ ပႆႇၼပ်ႉသွၼ်ႇပႃးၵႃႈၵိၼ် ”- ဝႃႈၼႆ။

ယႃႈယႃၵိၼ်သမ်ႉ ၸွမ်းၼင်ႇမေႃယႃၸီႉသင်ႇသေ လႆႈသိုဝ်ႉၵိၼ်တၢင်းၼွၵ်ႈၵမ်ႈၼမ်။   ၵႂႃႇသိုဝ်ႉ ၼိုင်ႈပွၵ်ႈသဵင်ႈ ၼပ်ႉႁူဝ်မိုၼ်ႇဝႃႈၼႆ။

“သင်ဝႃႈ ၼႂ်းႁူင်းယႃ ဢမ်ႇမီးယႃႈယႃၼႆ ႁဝ်းၶႃႈ တေလႆႈၵႂႃႇသိုဝ်ႉတၢင်းၼွၵ်ႈသေ မႃးပၼ်မေႃယႃၶဝ် ယူတ်းယႃ။ ၵႂႃႇသိုဝ်ႉၼိုင်ႈပွၵ်ႈၵေႃႈ ၼပ်ႉ မိုၼ်ႇမၼ်းၶႃႈဢေႃႈ။ သင်ဝႃႈ တီႈႁူင်းယႃမီးၵေႃႈ ဢဝ်တီႈႁူင်းယႃသႂ်ႇၵႂႃႇ ၸိူင်ႉၼႆၶႃႈ။   တႃႇယူတ်းယႃ  ၵႂႃႇထႅင်ႈတႄႉ လူဝ်ႇတၢင်းၸွႆႈထႅမ်ထႅင်ႈ တႄႉတႄႉဝႃႈဝႃႈၶႃႈဢေႃႈ ”-   ပီႈၼွင်ႉၸမ်ၸႂ် ၼၼ်ႉ သိုပ်ႇလၢတ်ႈၼင်ႇၼႆ။

 ၸၢႆးဢွင်ႇၵႅၼ်ႇ ၶဝ်ႈယူတ်းယႃတူဝ်ဝႆႉတီႈ ႁူင်းယႃ လႃႈသဵဝ်ႈၼႆႉ မီးၶၢဝ်းတၢင်း 6 ဝၼ်းယဝ်ႉ။ ၸင်ႇႁႃလႆႈတႅပ်းပႅတ်ႈၶႃႈၵူၺ်းလႄႈ တေလႆႈသိုပ်ႇယူတ်းယႃတူဝ်တေႁိုင်ထႅင်ႈၵႃႈႁိုဝ်တႄႉပႆႇႁူႉ ဝႃႈၼႆ။

ၸၢႆးဢွင်ႇၵႅၼ်ႇၼႆႉ ပဵၼ်လုၵ်ႈၸၢႆး လုင်းၸၢမ်ႇမျႃႉလႄႈ ပႃႈၶမ်းမၢတ်ႈ။ ၵေႃႉပဵၼ်ပေႃႈတႄႉ လႆႈလူႉသဵင်ႈၵႂႃႇ မီး 6 ပီယဝ်ႉ။ မၼ်းၸၢႆးပႆႇမီးၼႃႈႁိူၼ်း၊ ယၢမ်းလဵဝ် ယူႇဝႆႉၸွမ်းၵေႃႉပဵၼ်မႄႈ ႁဵတ်းၵၢၼ်ႁႃလဵင်ႉမႄႈဝႆႉ ။ ၵေႃႉပဵၼ်မႄႈသမ်ႉ ပၢႆးယူႇလီ ဢမ်ႇပေႃး တဵမ်ထူၼ်ႈ ႁူၼၵ်း(ႁူၼူၵ်ႇ)   ။  

 မိူဝ်ႈဝၼ်းတီႈ 18 ယၢမ်းၵၢင်ဝၼ်း မွၵ်ႈ 12 မူင်း  ၸၢႆးဢွင်ႈၵႅၼ်ႇ ၵႂႃႇဢဝ်ၶၢပ်ႈၵႂႃႇ ၼႂ်းသူၼ်မၼ်းၸၢႆး ဢၼ်ယၢၼ်ၵႆ ဝၢၼ်ႈလၵ်းပၢႆ မီးၾၢႆႇၸၢၼ်းဝၢၼ်ႈသူၼ်ဢွႆႈ ဢိူင်ႇၼမ်ႉသိမ်ႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ ယဵပ်ႇၺႃး မၢၵ်ႇမႅင်း ၾင်လိၼ် တီႈႁိမ်းထဵင် မၼ်းၸၢႆးသေ လႆႈတိူဝ်ႉၺႃးမၢတ်ႇၸဵပ်းႁၢဝ်ႈႁႅင်း ယူႇတီႈၸုမ်းၸွႆႈထႅမ် ပရႁိတ ၵၢင်ႉမေႃႉ လႆႈတေႃႉသူင်ႇယူတ်းယႃ တီႈႁူင်းယႃလူင် ဝဵင်းလႃႈသဵဝ်ႈ ၼႂ်း ဝၼ်းၼၼ်ႉၵမ်းလဵဝ်။

မၢၵ်ႇဢၼ်မၼ်းၸၢႆးယဵပ်ႇၺႃးၼၼ်ႉတႄႉပဵၼ်မၢၵ်ႇၽႂ်ၸုမ်းလႂ်မႃးႁၢင်ႈၵၢင်ဝႆႉသေ ဢမ်ႇၽဵဝ်ႈၵႂႃႇၶိုၼ်းၵေၢႈဢမ်ႇႁူႉ။ ထုင်ႉၼၼ်ႉမိူဝ်ႈႁၢင်ပီ 2021 သိုၵ်း RCSS လႄႈ သိုၵ်းဢူၺ်းလီပွတ်းႁွင်ႇ ပိုတ်းယိုဝ်းတိုၵ်းတေႃးၵၼ်ႁၢဝ်ႈႁႅင်း ။ႁူဝ်ပီ 2022 ၼႆႉ ပၢင်တိုၵ်းယဵၼ်ဝႆႉသေတႃႉ ၵူၼ်းမိူင်းသီႇပေႃႉ ၼမ်ႉလၼ်ႈ ၵမ်းၵမ်းယဵပ်ႇၺႃးမၢၵ်ႇ၊ မၢတ်ႇၸဵပ်းလူႉတၢႆ ဢမ်ႇယွမ်း 50 ၵမ်းယဝ်ႉ ၵူၼ်း သီႇပေႃႉလၢတ်ႈ။