ၸွမ်ၽွင်းလူင် ၸႄႈမိူင်းတႆးဢၼ်သိုၵ်းမၢၼ်ႈတႅင်ႇတင်ႈၸၼ်ၸိူၵ်ႈၵုမ်းၵမ်ၼၼ်ႉ မႃးတႃႇၶီႈလဵၵ်း၊ ၾၢႆႇၽွင်းငမ်း သင်ႇႁၢမ်ႈၵူၼ်းမိူင်းတႃႈၶီႈလဵၵ်း ဢွၵ်ႇၶၢႆၶူဝ်းၶွင်ၵိၼ်ယမ်ႉႁိမ်းၶၢင်ႈတၢင်းတႃႇ 3 ဝၼ်း ၵူၼ်းမိူင်း ယၢပ်ႇၽိုတ်ႇ တႃႇႁႃ ၵိၼ်လဵင်ႉတွင်ႉ။
ဝၼ်းတီႈ 20-22/3/2022 ၸဝ်ႈႁၢၼ်ႉၶၢႆၶူဝ်းၵုၼ်ႇ၊ ၶိူင်ႈၸႂ်ႉတိုဝ်း၊ ၶွင်ၵိၼ်ယႅမ်ႉ ဢၼ်ပိုတ်ႇၶၢႆၸွမ်းႁိမ်းၶူဝ်မိုတ်ႈၵိုဝ်းမၢႆ 1 တင်း မၢႆ 2 လႄႈ၊ ၸွမ်းႁိမ်းၶၢင်ႈတၢင်းလူင် ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ထုၵ်ႇႁၢမ်ႈဢွၵ်ႇၶၢႆၶူဝ်း၊ ယွၼ်ႉပိူဝ်ႈ ၻွၵ်ႊတိူဝ်ႊ ၵျေႃႇထုၼ်း ၸွမ်ၽွင်းလူင်မိူင်းတႆး (ၵူၼ်းသိုၵ်းမၢၼ်ႈ ) တေမႃးတႃႈၶီႈလဵၵ်း ဝႃႈၼႆ။
ၸဝ်ႈႁၢၼ်ႉၶၢႆၶူဝ်း ၼႂ်းဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၶႃႈၵေႃႈဝႃႈယူႇ ႁဵတ်းသင် ဝၼ်းသွင်ဝၼ်းၼႆႉ ၸွမ်းၼႂ်းဝဵင်းၼႆႉ ႁၼ်ပၢင်ႇ ပၢင်ႇဝႆႉ။ ၵူၼ်းၶၢႆတၢင်းၵိၼ် ႁိမ်းၶၢင်ႈတၢင်းလူင် ၸိူဝ်းၼႆႉ ဢမ်ႇႁၼ်ၶၢႆ ။ သိုၵ်းမၢၼ်ႈၵေႃႈ ႁၼ်တိုၼ်ႇသၢၼ်ႈၵႂႃႇမႃး ၸွမ်းၼႂ်းဝဵင်းၼႆႉ ဢေႃႈ။ ႁွႆးဝႃႈ ၵူၼ်းလူင်ၶဝ်တေမႃး ”- ဝႃႈၼႆ။
ၵူၼ်းၶၢႆ ဢၼ်ထုၵ်ႇသင်ႇပိၵ်ႉ ႁိမ်းၶၢင်ႈတၢင်းၼၼ်ႉပဵၼ် ၸိူဝ်းဢၼ် တင်ႈၽိူၼ်ၶၢႆ ၶဝ်ႈၽၵ်း တၢင်းၵိၼ်တၢင်းယမ်ႉလႄႈၽၵ်းယိူဝ်ႈၼၢင်းၶဵဝ်ၸိူဝ်းၼႆႉ။ ဢိၵ်ႇပႃးတင်း ၵၢတ်ႇႁိမ်းတၢင်း (ၵၢတ်ႇၼတ်ႉ) ၸိူဝ်းၼႆႉ ဝႃႈၼႆ။
“ လွင်ႈယၢပ်ႇၽိုတ်ႇတႄႉ မၼ်းၵေႃႈ ပေႃးယၢပ်ႇမႃးႁင်းၽႂ်မၼ်း ၸဵမ်လႂ်ယဝ်ႉ။ ၵႃႈၶၼ်ၵုၼ်ႇၵေႃႈၶိုၼ်ႈ၊ ၵႃႈၼမ်ႉမၼ်းၵေႃႈ ၶိုၼ်ႈ ဢီႇသင်ၵေႃႈၶိုၼ်ႈၵူႈမဵဝ်း။ ၵူၼ်းၶၢႆၵၢတ်ႇ ၶၢႆႁၢၼ်ႉ ၺႃးသင်ႇပိၵ်ႉ ၸိူင်ႉၼႆထႅင်ႈတႄႉ ယိင်ႈၶႅၼ်းယၢပ်ႇယဵၼ်းၶၢၼ်ၸႂ်ၶႃႈဢေႃႈ ။ ”- ၵူၼ်းၶၢႆၶူဝ်းၵိုၵ်းႁိူၼ်း တီႈတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။
သိုဝ်ႇၶၢဝ်ႇ Mekong News ဢွၵ်ႇဝႆႉတႄႉ ၸွမ်ၽွင်းလူင် ၸႄႈမိူင်း ၻွၵ်ႊတိူဝ်ႊၵျေႃႇထုၼ်း မႃးတႃႈၶီႈလဵၵ်း သေ ထိုင်တီႈ ၵူၼ်းမိူင်းပေႃးလႆႈဢွၼ်ၵၼ်ယၢပ်ႇၸႂ်ၸွမ်းၼႆႉတႄႉ မၼ်းၸၢႆးမႃးတႃႇပိုတ်ႇပၢင်လဵၼ်ႈႁႅင်း တီႈတႃႈၶီႈလဵၵ်း မိူဝ်ႈၼႆႉ ဝၼ်းတီႈ 21 ။ လိူဝ်ၼၼ်ႉ တႃႇမႃးဢုပ်ႇဢူဝ်းလွင်ႈ တေဢဝ်ႁူင်းႁႅမ်းလႄႈ ပၢင်ႇပေႃႉၵွပ်ႉၾ် မွပ်ႈပၼ် ၶွမ်ႊပၼီႊ ဢၼ်ၸမ်ၸႂ်သိုၵ်းမၢၼ်ႈ သိုပ်ႇတူၺ်းလူႁဵတ်းၵၢၼ်ၵႂႃႇ – ဝႃႈၼႆ။
 တေမႃးတႃႈၶီႈလဵၵ်း ဝႃႈၼႆ။){kind=link}