မိူဝ်ႈၼႆႉ ဝၼ်းတီႈ 18/3/2022 ယၢမ်းၵၢင်ဝၼ်းမွၵ်ႈ 12 မူင်း ၸၢႆးဢွင်ႇၵႅၼ်ႇ ဢႃယု 22 ပီ ၵူၼ်းဝၢၼ်ႈသူၼ်ဢွႆႈ ဢိူင်ႇ ၼမ်ႉသိမ်ႇ ၸႄႈဝဵင်းသီႇ ပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၵႂႃႇၵၢၼ်ႉၶဝ်ႈၵၢပ်ႇ ၼႂ်းသူၼ် ယဵပ်ႇၺႃး မၢၵ်ႇမႅင်းၾင်လိၼ် တီႈႁိမ်းထဵင်ၶဝ် မၢၵ်ႇ တႅၵ်ႇ တိူဝ်ႉသႂ်ႇၶႃမၼ်းၸၢႆး မၢတ်ႇၸဵပ်းႁၢဝ်ႈႁႅင်း။
ၵူၼ်းပိုၼ်ႉတီႈ သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၼ်းၸၢႆးၵႂႃႇဢဝ်ၶဝ်ႈၵၢပ်ႇၼႂ်းသူၼ်သေ ယဵပ်ႇၺႃးမၢၵ်ႇ တီႈႁိမ်း ထဵင်ၶဝ်။ ၽိူဝ်ႇၸုမ်းပရႁိတ ၽႅဝ်ၵႂႃႇတီႈၼၼ်ႈၵေႃႈ မႅင်းမူၼ်းပေႃးတွမ် ၸဵပ်းမၼ်းယူႇယဝ်ႉ ၶႃႈဢေႃႈ။ ယွၼ်ႉပိူဝ်ႈမၼ်းဢမ်ႇၸၢင်ႈလုၵ်ႉယဝ်ႉၶႃႈၼႃႇ။”-ဝႃႈၼႆ။
ၸုမ်းၸွႆႈထႅမ်ပရႁိတ ၵၢင်ႉမေႃႇလႄႈ ၸုမ်းၶႂၢႆႇၶႃပႄလႅင် ၵၢင်ႉမေႃႇႁူမ်ႈၵၼ် ၵႂႃႇၸွႆႈ ဢဝ်တူဝ် မၼ်းၸၢႆးဢွၵ်ႇမႃးသေ သူင်ႇယူတ်းယႃ တီႈဝဵင်းလႃႈသဵဝ်ႈ ။
“မူႇလႂ်ၸုမ်းလႂ်ၵေႃႈယဝ်ႉ သင်ႁူႉဝႃႈ မၢၵ်ႇၼႆႉ ႁၢင်ႈၵၢင်ဝႆႉတီႈလႂ်ၼႆ ၶႅၼ်းတေႃႈ ၶိုၼ်းမႃးပူတ်းပၼ်၊ ၽဵဝ်ႈပၼ်သေၵမ်း။ ဢမ်ႇၼၼ်ၵေႃႈ လၢတ်ႈဝႆႉ ပၼ်ၾၢင်ႉၵူၼ်းမိူင်းဝႆႉဝႃႈတီႈလႂ် မီးမၢၵ်ႇၾင်ဝႆႉၸိူဝ်းၼႆႉ ၵူၼ်းမိူင်းတေလႆႈဝႄႈသေ တေဢမ်ႇလႆႈမၢတ်ႇၸဵပ်းလူႉတၢႆၸွမ်းလၢႆလၢႆၸိူင်ႉၼႆ။ ဢမ်ႇၼၼ်ၵေႃႈၸုမ်းလႂ်မူႇလႂ် ၸိူဝ်းႁူႉလွင်ႈတၢင်းသေ လူင်ႉလႅၼ်ႇလွင်ႈၼႆႉ ႁႂ်ႈၸွႆႈၽဵဝ်ႈပၼ်ဢိတ်းၼိုင်ႈ ၶႂ်ႈတုၵ်းယွၼ်းယႂ်ႇၼမ်ဢေႃႈ”- ၵူၼ်းပိုၼ်ႉ တီႈ ဝဵင်းသီႇပေႃႉ ဢွၼ်ၵၼ်တုၵ်းယွၼ်း ၼင်ႇၼႆ။
ဝၢႆးလင်ပၢင်တိုၵ်းယဵၼ်ၵႂႃႇ ၶၢဝ်းတၢင်းမွၵ်ႈ ၽၢၵ်ႇလိူၼ်သၢဝ်းဝၼ်းၼႆႉ ၵူၼ်းမိူင်းတႆး သီႇပေႃႉ ၊ ၵျွၵ်ႉမႄး၊ ၼမ်ႉလၼ်ႈ၊ လွၵ်ႉၸွၵ်ႇ၊ မိူင်းၵိုင်၊ လၢႆးၶႃႈ၊ ပၢင်လူင် ၸိူဝ်းၼႆႉယဵပ်ႇၺႃးမၢၵ်ႇမႅင်းၾင်လိၼ် ၶႂ်ႈဝႃႈၵူႈဝၼ်း။ လုၵ်ႈဢွၼ်ႇလဵၵ်ႉလႅင်ၵေႃႈ ၺႃးၸၢၵ်ႇမၢၵ်ႇလူႉတၢႆၸွမ်း။ ၼႂ်းၶၢဝ်းတၢင်း 3 လိူၼ် ႁူဝ်ပီ 2022 ၼႆႉၵူၺ်း ၵူၼ်းမိူင်းတႆး ဢၼ်ယဵပ်ႇၺႃးမၢၵ်ႇသေ လူႉတၢႆဢမ်ႇယွမ်း 30 မၢတ်ႇၸဵပ်းမီးတင်းၼမ်။
