ၵၢတ်ႇ 5 ဝၼ်းလႂ် 1 ပွၵ်ႈ တီႈၸႄႈဝဵင်းသီႇသႅင်ႇ ၼၼ်ႉ ပေႃးပႃးဝႂ်သမ်းၶဵမ် ႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၸင်ႇပၼ်ၶဝ်ႈၵၢတ်ႇ ။
ၵူၼ်းပိုၼ်ႉတီႈ ၸႄႈဝဵင်းသီႇသႅင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝူင်ႈပူၼ်ႉၼၼ်ႉ ႁဵတ်းၼၼ်ၶႃႈ သင်ၽႂ်ဢမ်ႇပႃးဝႂ် သမ်းၶဵမ်မႃးၼႆ ဢမ်ႇပၼ်ၶဝ်ႈၵၢတ်ႇၶႃႈ။ ၼႂ်းဝၼ်းၵၢတ်ႇ ဝၼ်းလဵဝ်ၵူၺ်း ၼင်ႇၵဝ်ႇၶႃႈ။ တၢင်ႇဝၼ်းတႄႉဢမ်ႇယွၼ်းတူၺ်း။ ယွၼ်ႉတၢင်းပဵၼ်တီႈသီႇသႅင်ႇၼႆႉ ပုင်ႈၶိုၼ်ႈမႃးႁႅင်းၶိုၼ်းၼႆၶႃႈဝႃႇ။ ”- ဝႃႈၼႆ။
ၵၢတ်ႇလူင် ၸႄႈဝဵင်းသီႇသႅင်ႇၼႆႉ ပိုတ်ႇၶၢႆၵူႈဝၼ်း။ ၵူၺ်းၵႃႈ ဝၼ်းၵၢတ်ႇ 5 ဝၼ်း 1 ပွၵ်ႈၼၼ်ႉတႄႉ ၵူၼ်းတၢင်းဝၢၼ်ႈ ဢိၵ်ႇပႃး ဝဵင်းႁိမ်းႁွမ်းၵေႃႈမႃးသိုဝ်ႉၶၢႆၶူဝ်း ၵိုၼ်းၶွၼ်ႈလႄႈ ၾၢႆႇပၢႆးယူႇလီ ဢိၵ်ႇၵူၼ်းလူင်ၼႂ်းပွၵ်ႉ ၸင်ႇထတ်းၵူၼ်းသမ်းၶဵမ်ၵွၼ်ႇတေၶဝ်ႈၵၢတ်ႇ။ တႃႇႁႄႉၵင်ႈတၢင်းပဵၼ် တေဢမ်ႇလၢမ်းၽႄႈၸူးၵၼ်ထႅင်ႈ ဝႃႈၼႆ။
မိူဝ်ႈႁၢင်ပီ 2021 ၼႆႉ ၼႂ်းၸႄႈဝဵင်းသီႇသႅင်ႇၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 မီး 1,000 ပၢႆ၊ လူႉတၢႆ 20 ပၢႆ ဝႃႈၼႆသေတႃႉ သိုၵ်းမၢၼ်ႈ ဢမ်ႇပၼ်ပိုၼ်ၽၢဝ်ႇလွင်ႈၵူၼ်းတိတ်းၸပ်းလူႉတၢႆယွၼ်ႉတၢင်းပဵၼ်လႄႈ ဢမ်ႇလႆႈႁူႉၸွမ်း ႁူဝ်ၼပ်ႉၵူၼ်းပဵၼ်တႅတ်ႈတေႃး ၵူၼ်းပိုၼ်ႉတီႈ ၽူႈၸၢႆး ဢႃယု 40 ပၢႆ ၵေႃႉၼိုင်ႈလၢတ်ႈ။
ယူႇတီႈၾၢႆႇပၢႆးယူႇလီ မိူင်းႁူမ်ႈတုမ် တႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ်ဝႆႉ ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 17/3/2022 ၼႆႉ ၼႂ်းမိူင်းႁူမ်ႈတုမ် တင်းမူတ်း ၵူတ်ႇထတ်းႁၼ် ၶူဝ်ႊဝိတ်ႉ 19 မီး 445 ၵေႃႉ ပေႃးဢဝ် ပိူဝ်ႊသႅၼ်ႊ(%) ဝႃႈၸိုင် တေမီး 2.45 % ။ ၼႂ်းၼၼ်ႉ မိူင်းတႆး တိတ်း ၸပ်း 26 ၸႄႈဝဵင်း ၵူၼ်းပဵၼ် 122 ၵေႃႉ။