သိုၵ်းမၢၼ်ႈ ႁူဝ်ၵူၼ်းၼပ်ႉႁူဝ်ပၢၵ်ႇ ၵႃးသိုၵ်း 30 လမ်းပၢႆ မုင်ႈၸူး တၢင်းမိူင်းၵူဝ်း မူႇၸေႊထႅင်ႈ လႄႈ ၵူၼ်းမိူင်း မႆႈၸႂ် ၵူဝ်ပဵၼ် ပၢင်တိုၵ်းသိုၵ်းသိူဝ် ယႂ်ႇလူင် ထႅင်ႈ။
မိူဝ်ႈဝၼ်းတီႈ 15/3/2022 ၵႃးသိုၵ်းမၢၼ်ႈ 33 လမ်း လုၵ်ႉတၢင်းလႃႈသဵဝ်ႈ ၵႂႃႇတၢင်းမူႇၸေႊ သိုပ်ႇပူၼ်ႉၵႂႃႇတၢင်းပၢင်ႇသၢႆး မုင်ႈၸူးတၢင်းမိူင်းၵူဝ်း။ ၵႃးသိုၵ်းၸိူဝ်းၼၼ်ႉ တၢင်ႇၵူၼ်းသိုၵ်း ၼပ်ႉႁူဝ်ပၢၵ်ႇ တၢင်ႇပႃးတၢင်းၵိၼ်တၢင်းယမ်ႉ ၸိူဝ်းၼႆႉ။
ၵူၼ်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်း 4-5 လိူၼ်ၼႆႉၵူၺ်း ၶဝ်လႅၵ်ႈၵူၼ်းၶဝ် မွၵ်ႈ 10 ပွၵ်ႈယဝ်ႉ။ လႅၵ်ႈတပ်ႉၵွင် ၵူၺ်း တပ်ႉမတႄႉဢမ်ႇလႅၵ်ႈ။ တပ်ႉ 295 ဢၼ်ပၵ်း တီႈပၢင်ႇသၢႆး ႁႅင်းၵူၼ်းတေမီးမွၵ်ႈ 60 ၼၼ်ႉၵေႃႈလႅၵ်ႈဢေႃႈ”- ဝႃႈၼႆ။
တပ်ႉမၢၼ်ႈဢၼ်တူင်ႉၼိုင် တၢင်းထုင်ႉ ပၢင်ႇသၢႆး မိူင်းၵူဝ်း ၼႆႉ ပဵၼ်တပ်ႉမ 77၊ 99 ၸိူဝ်းၼႆႉ။
ၼႂ်းထုင်ႉ ပၢင်ႇသၢႆး၊ မိူင်းၵူဝ်းၼႆႉ မီးသိုၵ်းတႆး SSPP ၊ သိုၵ်းၶၢင် KIA ၊ သိုၵ်းၶႄႇၵဝ်ႈၵၢင်ႉ MNDAA ၊ ဢၼ်ပဵၼ် ပၢင်တိုၵ်းၵၼ် တင်းၸုမ်းသိုၵ်းမၢၼ်ႈ ၼမ်လိူဝ်ပိူၼ်ႈတႄႉ ပဵၼ်ၸုမ်းသိုၵ်းၶႄႇ ၵဝ်ႈၵၢင်ႉ MNDAA ။
ၵူၼ်းၼုမ်ႇ ပၢင်ႇသၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉပၢင်တိုၵ်းသေ ၵူၼ်းပၢႆႈၽေးသိုၵ်း တိုၵ်ႉမီးယူႇၼႂ်း တူဝ်ဝဵင်း မိူင်းၵူဝ်း၊ ၸိူဝ်းဢမ်ႇမေႃႁႃၵိၼ်ၼႂ်းဝဵင်းတႄႉ ဢွၼ်ၵၼ်ပွၵ်ႈၶိုၼ်းဝၢၼ်ႈ ၽွင်ႈယဝ်ႉဢေႃႈ”- ဝႃႈၼႆ။
မိူဝ်ႈႁူဝ်လိူၼ်ၼႆႉ ဝၼ်းတီႈ 3/3/2022 ၼၼ်ႉၵေႃႈ သိုၵ်းမၢၼ်ႈ တင်း သိုၵ်းၶႄႇ ၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ႁိမ်းဝၢၼ်ႈပၢင်သႃႇ ဝဵင်းမိူင်းၵူဝ်းထႅင်ႈ ၊ ၼၼ်ႉၵေႃႈ တုမ်ႉယွၼ်ႈ ၵူၼ်းဝၢၼ်ႈ ၵူၼ်းသူၼ် ၵႂႃႇမႃး ႁႃၵိၼ်လဵင်ႉတွင်ႉ ၼင်ႇၵဝ်ႇ ဝႃႈၼႆ။
