ၵူၼ်းၵျွၵ်ႉမႄး ၽူႈၸၢႆး ၵေႃႉၼိုင်ႈ ဢႃယု 50 ပၢႆ ယဵပ်ႇၺႃးမၢၵ်ႇသေ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ယၢမ်းလဵဝ် သူင်ႇယူတ်းယႃတူဝ် ဝႆႉတီႈႁူင်းယႃ လႃႈသဵဝ်ႈ။
မိူဝ်ႈဝႃး ဝၼ်းတီႈ 15/3/2022 ယၢမ်းဝၢႆးဝၼ်းမွၵ်ႈ 3 မူင်း လုင်းၸၢႆးလႃႉ ဢႃယု 50 ပၢႆ ၵူၼ်းဝၢၼ်ႈမၢၼ်ႈဢေႃႈ ဢိူင်ႇၵျွၵ်ႉမႄးလူင် ယဵပ်ႇၺႃးမၢၵ်ႇ တီႈႁိမ်းလွႆမႄႈၼၢင်းဢူး ၼႂ်းၵႄႈဝၢၼ်ႈ ဢေႃႈ – ၼမ်ႉမင်း ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၽွင်းမၼ်းၸၢႆး တေၵႂႃႇၽၼ်းမႆႉ။
ၽူႈၸွႆႈထႅမ် လုင်းၸၢႆးလႃႉ ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး တေၵႂႃႇၽၼ်းမႆႉ တေမႃးႁဵတ်း မူၵ်ႇပႃသူမ်ႈ ၼႆသေ ၵႂႃႇယဵပ်ႇ မၢၵ်ႇ တီႈႁိမ်းလွႆမႄႈၼၢင်းဢူး ၼႂ်းၵႄႈဝၢၼ်ႈဢေႃႈ – ၼမ်ႉမင်း။ တၢင်းသဵၼ်ႈၼၼ်ႉ ဢမ်ႇၸႂ်ႈတၢင်းလူင်၊ ပဵၼ် တၢင်းလတ်း တၢင်းလေႃႉ တၢင်းပႆ။ မိူဝ်ႈၽွင်းမၼ်းၸၢႆးယဵပ်ႇၺႃး မွၵ်ႈ 3 မူင်း မၼ်းၸၢႆး ယိူၼ်ႉၵၼ်ႈသေ ႁေႃႈရူတ်ႉၶိူင်ႈမႃးႁိူၼ်းပီႈၼွင်ႉ ၼႂ်းဝဵင်း ပွၵ်ႉ 8 မွၵ်ႈ 4 မူင်းၶိုင်ႈ ၵမ်းၼႆႉ ၶႃႈႁဝ်းၵပ်းၸူး ၸုမ်းၶႂၢႆႇၶႃပႄလႅင် ၵျွၵ်ႉမႄးသေ မႃးႁပ်ႉဢဝ်တူဝ်ၵႂႃႇႁူင်းယႃၶႃႈဢေႃႈ”- ဝႃႈၼႆ။
လုင်းၸၢႆးလႃႉၼႆႉ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း တီႈၶႅၼ်ၾၢႆႇသၢႆႉ ၊ တီႈတုမ်ႇၵူၼ်ႈ ၸိူဝ်းၼႆႉ ယၢမ်းလဵဝ် လႆႈသူင်ႇယူတ်းယႃဝႆႉတီႈ ႁူင်းယႃ လႃႈသဵဝ်ႈ။
“မၼ်းၸၢႆး လႆႈတိူဝ်ႉၺႃးမၢတ်ႇၸဵပ်းႁႅင်းၶႃႈဢေႃႈ တီႈၶႅၼ်ၾၢႆႇသၢႆႉ ယဝ်ႉၵေႃႈ တီႈတုမ်ႇၵုမ်ႇၵေႃႈသိၵ်ႇ တေလႆႈယဵပ်ႉ ယူတ်းယႃတႄႉတႄႉၶႃႈ။ ၵူၺ်း ၵႃႈ ယၢပ်ႇၽိုတ်ႇဝႆႉ လွင်ႈငိုၼ်းတွင်းၶႃႈဢေႃး မၼ်းၸၢႆး မီးငိုၼ်းဝႆႉ 23,000 ပျႃးၵူၺ်းၶႃႈ။ တီႈဢေႇသုတ်းတေလႆႈမီးဝႆႉ 1 သႅၼ်ၶႃႈဢေႃႈ။ ၵွပ်ႈၼႆ လႄႈ လူဝ်ႇတၢင်းၸွႆႈထႅမ် ၵႃႈယူတ်းယႃၶႃႈဢေႃႈ” – ၽူႈၸွႆႈထႅမ် လုင်းၸၢႆးလႃႉ ၵူၼ်းပိုၼ်ႉတီႈ သိုပ်ႇလၢတ်ႈ ၼင်ႇၼႆ။
လုင်းၸၢႆးလႃႉ ဢႃယု 50 ပၢႆၼႆႉ ပဵၼ်ၵူၼ်းဝၢၼ်ႈဢေႃႈ ဢိူင်ႇၵျွၵ်ႉမႄးလူင် မၼ်းၸၢႆးမီးလုၵ်ႈဝႆႉ 5 ၵေႃႉ ၸၢႆး 1 ၵေႃႉ၊ ယိင်း 4 ၵေႃႉ။ ၵေႃႉပဵၼ် မေးၼၢင်း တိုၵ်ႉလူႉၵႂႃႇ မွၵ်ႈ 2 လိူၼ်ၼႆႉ ၼႂ်းၼႃးႁိူၼ်းမၼ်းၸၢႆး ပဵၼ်ဢၼ်ထူပ်းတၢင်းယၢပ်ႇၽိုတ်ႇ ၵပ်ႉၵိၼ်းဝႆႉ။
မၢၵ်ႇတႅၵ်ႇ ဢၼ်လုင်းၸၢႆးလႃႉ ယဵပ်ႇသႂ်ႇၼၼ်ႉ ပဵၼ်မၢၵ်ႇၽႂ် ၸုမ်းလႂ် ႁၢင်ႈၵၢင်ဝႆႉ ဢၼ်ဝႃႈၼၼ်ႉ ဢမ်ႇလႆႈႁူႉ။
ၸွမ်းၼင်ႇ ၽူႈပၼ်ပိုၼ်ႉႁူႉ ၽေးၶဵၼ်မၢၵ်ႇတႅၵ်ႇ/ မႅင်း ၼႂ်းပိုၼ်ႉတီႈပၢင်တိုၵ်းၼႂ်းမိူင်းတႆး ၵဵပ်းမၢႆဝႆႉၶေႃႈမုလ်း သဵၼ်ႈမၢႆ ၼႂ်းပီ 2021 ၼၼ်ႉ ၵူၼ်း မိူင်းတႆး ၽႃးၺႃးမၢၵ်ႇတႅၵ်ႇၼႆႉ ပိူင်ပဵၼ်မီး 60 ပၢႆ၊ ၵူၼ်းမၢတ်ႇၸဵပ်း 121 ၵေႃႉ၊ ၼႂ်းၼၼ်ႉ လူႉတၢႆ မီး 24 ၵေႃႉ။ ၼႂ်းပီ 2022 ၼႂ်းၶၢဝ်းတၢင်းမွၵ်ႈ 3 လိူၼ်ၼႆႉ ၵူၼ်းမိူင်းတႆး ၽႃႇၺႃးမၢၵ်ႇ မီး 50 ပၢႆ၊ လူႉတၢႆ 18 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ