ၵူၼ်းပၢႆႈၽေးသိုၵ်း တီႈဝဵင်းသီႇသႅင်ႇ ႁူဝ်ၵူၼ်းၸမ်ႁဵင် လူဝ်ႇတၢင်းၸွႆႈထႅမ်ၶူဝ်းၶွင်ၵိၼ်ယႅမ်ႉလႄႈ ၼမ်ႉၵိၼ်/ ၸႂ်ႉ ႁၢဝ်ႈႁႅင်း။
ယၢမ်းလဵဝ် ၵူၼ်းမိူင်းယၢင်းလႅင်လႄႈ ၵူၼ်းမိူင်းတႆး ၼႂ်းၸႄႈဝဵင်းၾၢႆၶုၼ် ဢၼ်ပၢႆႈမႃးသွၼ်ႈဝႆႉ တီႈၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ႁူဝ်ၵူၼ်းၸမ်ႁဵင်ၼႆႉ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ၼမ်ႉၵိၼ်ၼမ်ႉၸႂ်ႉ ၸိူဝ်းၼႆႉ ႁၢဝ်ႈႁႅင်း ယွၼ်ႉၽူႈမီးၼမ်ႉၸႂ်ၸေႇတႃႇၼ ၶဝ်ႈ ၸွႆႈလူတ်းယွမ်းလူင်းတင်းၼမ်။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇသႅင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် လူဝ်ႇတၢင်းၸွႆႈထႅမ်ႁၢဝ်ႈႁႅင်းၶႃႈ။ ယၢပ်ႇၽိုတ်ႇ လွင်ႈၵိၼ်ယႅမ်ႉၶဝ်ႈၼမ်ႉတၢင်းၵိၼ် ၸိူဝ်းၼႆႉၶႃႈဢေႃႈ။ ယဝ်ႉၵေႃႈ ၼမ်ႉၵိၼ်ၼမ်ႉၸႂ်ႉ ၸိူဝ်းၼႆႉၵေႃႈလူဝ်ႇ လိူဝ်ၼၼ်ႉ ငိုၼ်းတွင်း ၸိူဝ်းၼႆႉသေ လူဝ်ႇၼႃႇၶႃႈ ယွၼ်ႉဝႃႈ တႃႇၵႂႃႇၼႄမေႃ ယူတ်းယႃ ၸိူဝ်းၼႆႉ။ မၢင်ၵေႃႉ ပဵၼ်ယဵဝ်ႈဝၢၼ်၊ လိူတ်ႈၶိုၼ်ႈ၊ ယူႇဢမ်ႇလီ ၵိၼ်ဢမ်ႇဝၢၼ် ၸိူဝ်းၼႆႉ”- ဝႃႈၼႆ။
ၵူၼ်းပၢႆႈၽေးသိုၵ်း တီႈၸႄႈဝဵင်းသီႇသႅင်ႇၼႆႉ ၵမ်ႈၼမ် ယူႇသဝ်းၸွမ်းႁိူၼ်းယေးပီႈၼွင်ႉၽႂ်မၼ်း။ ၸဝ်ႈႁိူၼ်းၵေႃႈ ဢိင်ၼိူဝ်တၢင်းပဵၼ်ၶူဝ်ႊဝိတ်ႉၽႄႈလၢမ်း ၊ ပၢႆးမၢၵ်ႈမီးတူၵ်းလႄႈ ၼွၵ်ႈလိူဝ်တီႈယူႇ ဢမ်ႇၸၢင်ႈၸွႆႈထႅမ်သင်ထႅင်ႈ၊ ၵူၼ်းပၢႆႈၽေးသိုၵ်းတိုၵ်း လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း။
“ဢၼ်လိူဝ်ႁႅင်းတႄႉ တေပဵၼ်ၸိူဝ်းယူႇၸွမ်းႁိူၼ်းယေး ပီႈၼွင်ႉ ၸိူဝ်းၼႆႉဢေႃႈ၊ မၢင်ႁိူၼ်းယူႇၵၼ် 3 ၼႃႈႁိူၼ်းထိုင် 5 ၼႃႈႁိူၼ်း၊ မၢင်ႁိူၼ်းမီးၵူၼ်းမႃးပိုင်ႈပဵၼ် 8 ၼႃႈႁိူၼ်းၸိူဝ်းၼႆႉၵွၼ်ႇဢေႃႈ။ ၵူၼ်းပၢႆႈၽေးတႄႉ ပၢႆႈမႃးႁိုင်ယဝ်ႉ ၶဝ်ဢွၵ်ႇႁိူၼ်းမႃး မီး 7-8 လိူၼ် ၸိူဝ်းၼႆႉ။ တႄႇပဵၼ်ပၢင်တိုၵ်းတၢင်း မိူင်းယၢင်းလႅင် ၼၼ်ႉမႃးၵေႃႈ ဢၼ်ၶဝ်ပၢႆႈမႃးႁွတ်ႈထိုင် တီႈသီႇသႅင်ႇၼႆႉတႄႉ တေမီး 3 လိူၼ်ၼႆႉ”- ၽူႈၸွႆႈထႅမ် ၵူၼ်းပၢႆႈၽေး တီႈသီႇသႅင်ႇ သိုပ်ႇလၢတ်ႈၼႄႇ ၼင်ၼႆ။
တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊမႃး တေႃႇထိုင်ယၢမ်းလဵဝ် ၵူၼ်းမိူင်းယၢင်းလႅင် ဢွၼ်ၵၼ်ပၢႆႈၽေးသိုၵ်း မႃးသွၼ်ႈယူႇဝႆႉ ၸွမ်း ဝတ်ႉမုၼ် ၸဝ်ႈ၊ ဢွင်ႈတီႈၵူၼ်းပၢႆႈၽေး၊ ၸွမ်းႁိူၼ်းယေးပီႈၼွင်ႉ ၽႂ်မၼ်း ၼႂ်းၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း ၸိူဝ်းၼႆႉ ယွၼ်းမိူဝ်ႈလဵဝ် ၵူၼ်းပၢႆႈၽေးသိုၵ်းသမ်ႉ မိူဝ်းမိူဝ်းမႃးမႃး မီးယူႇၵူႈဝၼ်းလႄႈ ၵွပ်ႈၼႆ ႁူဝ်ႁုပ်ႈတင်း မူတ်းတႄႉ တေဢမ်ႇလႆႈတႅတ်းတေႃး ၵူၼ်း ပိုၼ်ႉတီႈလၢတ်ႈ။
