ၼႂ်းၶၢဝ်းတၢင်း 2 လိူၼ် ၼႂ်းပီ 2022 ၼႆႉၵူၺ်း တၢင်းၼႂ်းဢိူင်ႇၼႃးၶၢၼ် ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ၽူႈလၵ်ႉၵူၼ်းၸူၼ် လိူင်ႇၼမ် ရူတ်ႉၶိူင်ႈၵူၼ်းမိူင်း ပိုၼ်ႉတီႈႁၢႆယဝ်ႉ 4 လမ်း။

ၵူၼ်းပိုၼ်ႉတီႈ ၼႂ်းဢိူင်ႇၼႃးၶၢၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းပီၼႆႉၵူၺ်း တီႈဢိူင်ႇၼႃးၶၢၼ် ႁဝ်းၶႃႈၼႆႉ ရူတ်ႉၶိူင်ႈႁၢႆၵႂႃႇၼႆႉ မီး 4 လမ်းယဝ်ႉ။ မိူဝ်ႈႁူဝ်လိူၼ်ၼႆႉ တီႉလႆႈတၢင်းဝၢၼ်ႈယေး ပဵၼ်ၸၢဝ်းမၢၼ်ႈ လုၵ်ႈဢွၼ်ႇၸၢႆး 3 ၵေႃႉ ဢႃယု 15  ပီထိုင် 20 ပီၸိူဝ်းၼႆႉ။ ၼၼ်ႉ တႄႉ လႆႈႁွင်ႉပေႃႈမႄႈၶဝ် မႃးသၢႆႈၶိုၼ်းသေ ရူတ်ႉၶိူင်ႈၵေႃႈ လႆႈၶိုၼ်း ။ ၵူၼ်းလၵ်ႉၼၼ်ႉတႄႉ လႆႈမွပ်ႇပၼ် ၶိုၼ်းပေႃႈမႄႈၶဝ်။ ၶဝ်မီးၸုမ်းဝႆႉၶႃႈဢေႃႈ ၵူၼ်းလၵ်ႉၼႆႉ။ ပဵၼ်ၵူၼ်းၸႃႉတိ ပၢင်လူင်ၵေႃႉၼိုင်ႈ၊ ႁူဝ်ပူင်းၵေႃႉၼိုင်ႈလႄႈ ၸႄႈၵႅင်းၵေႃႉၼိုင်ႈ”- ဝႃႈၼႆ။

လိူဝ်သေ တၢင်းဢိူင်ႇၼႃးၶၢၼ်ယဝ်ႉ လၢႆလၢႆပွၵ်ႉၼႂ်းဝဵင်းမိူင်းၼၢႆး  ၽူႈလၵ်ႉၵူၼ်းၸူၼ်လိူင်ႇၼမ် မိူၼ်ၵၼ် ရူတ်ႉၶိူင်ႈၵူၼ်းမိူင်း  ၶူဝ်းၶွင်မီးပႃႈၶၼ်ႁၢႆ ၶိူဝ်းယႂ်း ၵူၼ်းမိူင်းၼၢႆးလၢတ်ႈ။

“ယွၼ်ႉပၢင်တေႃႇလွင်းၶႃႈဢေႃႈ။ မိူဝ်ႈဝၼ်းတီႈ 4 ပူၼ်ႉမႃးၼႆႉ ၶိုၼ်းပိုတ်ႇပၢင်လွင်းထႅင်ႈယဝ်ႉ၊ ပဵၼ်ၶိုၼ်းတီႈၵဝ်ႇၵူၺ်း တီႈဝၢၼ်ႈသၢႆးၽႄႇ၊  ဢိူင်ႇမႆႉႁႆးၼၼ်ႉၵူၺ်းၶႃႈ။ ပဵၼ်ပွႆးသၢင်ႇလွင်းၼႆၶႃႈဝႃႇ ႁဵတ်းၵိုၵ်းပႃးပွႆးသၢင်ႇလွင်ႈၶႃႈဢေႃႈ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ပၢင်တေႃႇလွင်းတႄႉ တိုၵ်ႉမီးယူႇ ပႆႇဢိုတ်း ၶႃႈ၊ တၢင်းပွတ်းတွၼ်ႈၼၼ်ႉသမ်ႉ ပဵၼ်ၸုမ်းပျီႇတူႉတိတ်ႉ SSS ၵုမ်းၵမ်ဝႆႉ”- ၵူၼ်းမိူင်းၼၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇ ၼႆ။

တၢင်းဝၢၼ်ႈႁႆးၽၵ်း ၸႄႈဝဵင်းၼမ်ႉၸၢင်ၵေႃႈ ပူၼ်ႉမႃးမွၵ်ႈ 2 လိူၼ်ၼႆႉ တီႉလႆႈၵူၼ်းလၵ်ႉၸုမ်းၼိုင်ႈ ပဵၼ်ဢွၼ်ႇၸၢႆး 3 ၵေႃႉ။  ၵူၼ်းလၵ်ႉၼႆႉၵမ်ႈၼမ်လၵ်ႉ ရူတ်ႉၶိူင်ႈ  မိူင်းထႆး ဝႃႈၼႆ။  

“ၵွပ်ႈၼႆလႄႈ သင်ဝႃႈ ၽူႈလႂ်ၽႂ်ႁၼ်ၵူၼ်းပႅၵ်ႇၼႃႈ လၢၵ်ႇလၢႆး ဢမ်ႇႁူႉၸၵ်း ၶဝ်ႈမႃးၼႂ်းဝၢၼ်ႈ ၼႂ်းဢိူင်ႇၼႆ ႁႂ်ႈဢွၼ်သတိၵၼ်ၽွင်ႈ၊ ဢမ်ႇ ၼၼ် ႁႂ်ႈတိူင်ႇလၢတ်ႈတီႈၽူႈယႂ်ႇၵူၼ်းဝၢၼ်ႈဝၢၼ်ႈ ပွၵ်ႉဢိူင်ႇၽႂ်မၼ်း။ ယႃႇပေဝႆႉ မဝ်မၢင် ႁႂ်ႈပဵၼ်ႁူပဵၼ်တႃ တူၺ်းၸွႆႈၵၼ်”-  ၵူၼ်းပိုၼ်ႉတီႈ ဝဵင်းမိူင်းၼၢႆး သိုပ်ႇလၢတ်ႈၼႄၼင်ႇၼႆ။

ၼွၵ်ႈလိူဝ်သေ ဝဵင်းမိူင်းၼၢႆးၼႆႉယဝ်ႉ တၢင်ႇၸႄႈဝဵင်း လၢႆလၢႆတီႈၵေႃႈ ၽူႈလၵ်ႉၵူၼ်းၸူၼ်လိူင်ႇၼမ်မႃးလိူဝ်ၵဝ်ႇ ပူၼ်ႉမႃး မိူဝ်ႈဝၼ်းတီႈ 10/3/2022 ၼၼ်ႉၵေႃႈ ၵူၼ်းၶဝ်ႈၸူၼ်ႁၢၼ်ႉလႅၵ်ႈငိုၼ်းၶႄႇ တီႈပွၵ်ႉၵၢတ်ႇ ၵၢင်ဝဵင်းမူႇၸေႊ ၸဝ်ႈႁၢၼ်ႉသုမ်းငိုၼ်းၶႄႇ တင်းၼမ်။