ၵူၼ်းဝၢၼ်ႈ ၼႂ်းဢိူင်ႇသူၼ်ၵွႆ ၸႄႈဝဵင်းလႃႈသဵဝ်ႈ ဢွၼ်ၵၼ်တုၵ်းယွၼ်းဢဝ်ၶိုၼ်း တီႈလိၼ် ဢၼ်တပ်ႉသိုၵ်းမၢၼ်ႈယမၶ တိူင်းသိုၵ်းလႃႈသဵဝ်ႈ ယိုတ်းဢဝ်လၢႆဝႆႉၼၼ်ႉ ႁႂ်ႈပၼ်ၶိုၼ်းၵူၼ်းမိူင်း တႃႇလႆႈၽုၵ်ႇသွမ်ႈႁဵတ်းႁႃၵိၼ်ၶိုၼ်း။
လိူၼ်ၾႅပ်ႊပိဝ်ႊရီႊ 2022 ၼႆႉမႃး သိုၵ်းမၢၼ်ႈ ဢဝ်ၵႃးထုၺ်လိၼ် မႃးထႆလိၼ် ၵူၼ်းဝၢၼ်ႈ ဢၼ်ၶဝ်ယိုတ်းဝႆႉ 800 ဢေႊၶိူဝ်ႊပၢႆ ဢၼ်မီး ၼႂ်းဢိူင်ႇသူၼ်ၵွႆ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇသေ တေၵေႃႇသၢင်ႈ ႁဵတ်းၵျွင်းၼၢႆးၶၢဝ် မၢၼ်ႈ ၼႆယဝ်ႉ။
ၵူၼ်း ၼႂ်းဢိူင်ႇသူၼ်ၵွႆ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းၶၢဝ်းတၢင်းသွင်လိူၼ်ၼႆႉမႃး သိုၵ်းမၢၼ်ႈ ဢဝ်ၵႃးထုၺ်လိၼ် မႃးထႆလိၼ်သေ တေၵေႃႇသၢင်ႈ ႁဵတ်းၵျွင်းၼၢႆးၶၢဝ်မၢၼ်ႈၶဝ်ၼႆဝႃႇ။ ပဵၼ်တီႈလိၼ်ၵူၼ်းမိူင်း ဢၼ်ၶဝ် သိမ်းဢဝ်လၢႆဝႆႉၼၼ်ႉၶႃႈ။ ယၢမ်းလဵဝ် မႃးထႆလိၼ်ယဝ်ႉ ယဝ်ႉၵေႃႈ ႁဵတ်းသဵၼ်ႈတၢင်းၶဝ်ႈၸူးယဝ်ႉ လိူဝ်ၼၼ်ႉ ၶီႈလိၼ်ၸိူဝ်းၼႆႉ ၶဝ်ဢဝ်ၵႂႃႇထွၵ်ႇထူမ်သႂ်ႇႁွင်ႈၼမ်ႉၼႃး ၶွင်ၵူၼ်းဝၢၼ်ႈပႃးထႅင်ႈ။ လွင်ႈၶဝ် ၶဝ်ႈမႃးႁဵတ်းၸိူင်ႉၼႆၼႆႉ ဢမ်ႇထၢမ်ၵၢင်ၸႂ် ၵူၼ်းမိူင်းပိုၼ်ႉတီႈသေဢိတ်းၶႃႈ”- ဝႃႈၼႆ။
တီႈလိၼ် ၼႂ်းဢိူင်ႇသူၼ်ၵွႆ မွၵ်ႈ 800 ဢေႊၶိူဝ်ႊဢၼ်သိုၵ်းမၢၼ်ႈဢဝ်လၢႆၼႆႉ ပဵၼ်လိၼ် ၵူၼ်းဝၢၼ်ႈၽုၵ်ႇသွမ်ႈႁဵတ်းမႃး ပီယၢဝ်းၶၢဝ်းႁိုင် ၸဵမ်ပၢၼ်ပူႇ မွၼ်ႇၼၢႆးယႃႈမႃး။ မိူဝ်ႈ ပီ 2000 ၼၼ်ႉ တိူင်းသိုၵ်းလႃႈသဵဝ်ႈ ယမၶ ယိုတ်းဢဝ်ၵႂႃႇ ၵူၼ်းဝၢၼ်ႈ ဢွၼ်ၵၼ် တုၵ်းယွၼ်းမႃး လၢႆပွၵ်ႈၵေႃႈ ဢမ်ႇပွႆႇပၼ်ၶိုၼ်း ၼႆယဝ်ႉ။
တီႈလိၼ်ၵူၼ်းဝၢၼ်ႈ ဢိူင်ႇသူၼ်ၵွႆ မွၵ်ႈ 800 ဢေႊၶိူဝ်ႊၼႆႉ ပဵၼ်ၶွင်ၵူၼ်းဝၢၼ်ႈ သူၼ်ၵွႆ၊ ဝၢၼ်ႈၵုင်း၊ ၵွင်းဢၢႆႇ၊ ဝၢၼ်ႈမႂ်ႇ၊ ႁုင်းႁၢင်ႇ၊ ၼႃးမူၼ်း လႄႈ ၵွင်းတပ်ႉ ၸိူဝ်းၼႆႉ။