ပွႆးလိူၼ်သီႇၵၢင်ႉမေႃႇ/ မေႃႇၵျူဝ်ႇ တီႈဝဵင်းသီႇပေႃႉ ပီၼႆႉ တေပဵၼ်ၸတ်းယူႇ ၵူၺ်းတေဢမ်ႇၸႂ်းႁဵတ်းယႂ်ႇလူင် မိူၼ်မိူဝ်ႈၵူႈပီ ပူၼ်ႉမႃး။
ပွႆးၽြႃးလိူၼ်သီႇၵၢင်ႉမေႃႇ/ မေႃႇၵျူဝ်ႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ တေ ၸတ်းႁဵတ်းၼႂ်း ဝၼ်းတီႈ 11-17/3/2022 ၊ တေမီးပွႆးလူႇ ပွႆးၵိၼ်ၵူၺ်း၊ တေဢမ်ႇမီး ၸၢတ်ႈသႅင်း ပၢၼ်ၵဝ်ႇ/ ပၢၼ်မႂ်ႇ ၸိူဝ်းၼႆႉ – ၵေႃးပၵၵျွင်းၵၢင်ႉမေႃႇလၢတ်ႈ။
လုင်းသႃႇဢွင်ႇ ၵေႃးပၵၵျွင်းၵၢင်ႉမေႃႇ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးမိူဝ်ႈႁိုဝ်း 10 ၶမ်ႈၼႆႉ တႄႇပၢင်ပွႆးပထၢၼ်းၵႂႃႇ တေႃႇၽႅဝ် လိူၼ်လွင်ႈ 1 ၶမ်ႈ။ ပေႃး 2 ၶမ်ႈသမ်ႉ တေလူႇတၢၼ်းယၢတ်ႇၼမ်ႉ။ ပီၼႆႉ တေဢမ်ႇၸတ်းယႂ်ႇလူင် တေဢမ်ႇမီးၸၢတ်ႈသႅင်းတႆး/ မၢၼ်ႈ၊ ပၢင် မူၼ်ႈသိူဝ်းသင်။ တေမီးပွႆးတဵၵ်းၶမ်းၽြႃးပဵၼ်ၸဝ်ႈ၊ တၢင်ႇသွမ်းတေႃႇလႄႈ လွတ်ႈႁေႃးပထၢၼ်း ၸိူင်ႉၼႆၵူၺ်း”- ဝႃႈၼႆ။
ယၢမ်းလဵဝ် တၢင်းပဵၼ်ၶူဝ်ႊဝိတ်ႉ 19 တိုၵ်ႉၽႄႈလၢမ်းယူႇလႄႈ ၼင်ႇႁိုဝ် တေႁႄႉၵင်ႈတၢင်းပဵၼ်လႆႈၼၼ်ႉ ၵေႃးပၵလႄႈ ၽူႈမီးပုၼ်ႈၽွၼ်း တေႁၢင်ႈႁႅၼ်း ၽႃႈတူမ်းသူပ်း၊ ၼမ်ႉယႃႈလၢင်ႉမိုဝ်းဝႆႉပၼ်တႃႇၵူၼ်းမႃးလူႇမႃးတၢၼ်း- ဝႃႈၼႆ။
“ႁဝ်းၶႃႈ ႁၢင်ႈႁႅၼ်း ၽႃႈတူမ်းသူပ်း Mask ၸိူဝ်းၼႆႉ သိုဝ်ႉမႃးဝႆႉ။ ပေႃးပီႈၼွင်ႉၶဝ်ႈပွႆးမႃး တေပၼ်ၵူႈၵေႃႉ ႁႂ်ႈပေႃးၸေးၵေႃႉမၼ်း။ ယဝ်ႉၵေႃႈ ၼမ်ႉ ယႃလၢင်ႉမိုဝ်းၵေႃႈတေပၼ်ၵူႈၵေႃႉ။ တေႁဵတ်းၸွမ်းၾၢႆႇပၢႆးယူႇလီၶဝ် ၸီႉသင်ႇဝႆႉၼၼ်ႉၶႃႈ”- လုင်းသႃႇဢွင်ႇ သိုပ်ႇလၢတ်ႈၼႄၼင်ႇၼႆ။
တီႈထၢတ်ႈမူၺ်ႇတေႃႇ ဝဵင်းမိူင်းၵိုင် ၵေႃႈ ပီၼႆႉၵေႃႈမိူၼ်ပီၵၢႆၵူၺ်း၊ တေဢမ်ႇၸတ်းပၢင်ပွႆးလိူၼ်သီႇ ဝႃႈၼႆ။
ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ တီႈမိူင်းၵိုင် ဢမ်ႇလႅပ်ႈၸတ်းၶႃႈ။ ၵူႈပီတႄႉ ပေႃးထိုင်ၶၢဝ်းၼႆႉ ပေႃးမီးၵူၼ်းၵႃႉ မႃးႁဵတ်းသုမ်ႉ/ သွင်းၵၼ်ယဝ်ႉ။ ယွၼ်ႉငဝ်းလၢႆးတၢင်းပဵၼ်ၶူဝ်ႊဝိတ်ႉ ၵေႃႈပိူင်ၼိုင်ႈ၊ ငဝ်းလၢႆးဝၢၼ်ႈမိူင်း ၸိူဝ်းၼႆႉ ပႆႇၼိမ်သဝ်းၵေႃႈပိူင်ၼိုင်ႈ ပၢင် တိုၵ်းသိုၵ်းသိူဝ် ၵေႃႈတိုၵ်ႉပဵၼ်ယူႇတိၵ်းတိၵ်းလႄႈ ဢမ်ႇပဵၼ်ၸတ်းပွႆးလိူၼ်သီႇယဝ်ႉၶႃႈ”- ဝႃႈၼႆ။
ၸွမ်းၼင်ႇၾိင်ႈႁိၵ်ႈႁွႆးတႆးမီးဝႆႉၼၼ်ႉ ပေႃးထိုင်မႃး လိူၼ်သီႇမူၼ်းၸိုင် ၵူၼ်းမိူင်းတႆး ဢွၼ်ၵၼ် ၵႂႃႇပွႆးလိူၼ်သီႇ ၵႂႃႇတဵၵ်းၶမ်းၽြႃးၸွမ်းဝတ်ႉ ဝႃးၽႃႇသိူဝ်ႇ။ တႄႇဢဝ်ပီ 2019 ၼၼ်ႉမႃး ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းလႄႈ ပွႆးလိူၼ်သီႇ ၼႂ်းမိူင်းတႆး ၵူႈတီႈ လႆႈၵိုတ်ႉယင်ႉ ။
ပွႆးလိူၼ်သီႇၼႆႉပဵၼ်ၾိင်ႈပွႆးၶိုၼ်ႈထၢတ်ႈ ဢမ်ႇၼၼ် ပွႆးၵွင်းမူး – ပွႆးဝႆႈမူးၸႃး ဢုတ်ႉတိသ်ႉသၸေတီ ၸိူင်ႉၼင်ႇ ၼႂ်းမိူင်းတႆး ဢၼ်ၸိုဝ်ႈ သဵင်ယႂ်ႇသမ်ႉ တီႈၵွင်းမူးႁူဝ်လိုင်း ဝဵင်းၵႃလီႉ၊ ၵၢင်ႉမေႃႇ ဝဵင်းသီႇပေႃႉ၊ မူၺ်ႇတေႃႇ ဝဵင်းမိူင်းၵိုင်၊ ၼွင်ႁၢႆးယႃႈ ဝဵင်းယွင်ႁူၺ်ႈလႄႈ ထမ်ႈပၢင်းတရႃႉ ၸိူဝ်းၼႆႉ။
