မိူဝ်ႈၼႆႉ ဝၼ်းတီႈ 8/3/2022 ၵူၼ်းၼုမ်ႇ ၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ယဵပ်ႇႁၢင်ႈၼႃႈ မဢလ ၸွမ်ၸိၵ်းသိုၵ်းမၢၼ်ႈ ယိုတ်းမိူင်း တူင်ႉၼိုင် ၼိၵ်ႈၼၢမ်ႇ ႁႂ်ႈၸဵဝ်းတူၵ်းသုမ်း ။
ၵူၼ်းၼုမ်ႇ ၸႄႈဝဵင်းႁူဝ်ပူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈတူင်ႉၼိုင်သၢၼ်ၶတ်း သိုၵ်းမၢၼ်ႈ။ ႁဝ်းၶႃႈဢဝ်ႁၢင်ႈ မဢလ မႃးတိတ်းၸွမ်း သိၵ်ႈၶိုၼ်ႈလႆ၊ တီႈၽၵ်းတူ တၢင်းၶဝ်ႈတၢင်းဢွၵ်ႇ သေၵေႃႈယဵပ်ႇၶိုၼ်ႈ ယဵပ်ႇလူင်း။ၼိၵ်ႈၼၢမ်ႇသိုၵ်းမၢၼ်ႈႁႂ်ႈမၼ်းၵဵဝ်ႇပိူဝ်ႈၵဵဝ်ႇဢူၼ်ႈ၊ ႁႂ်ႈမၼ်းဢမ်ႇယူႇလီ၊ ႁႂ်ႈၵၢၼ်ငၢၼ်းၶဝ်ယႃႇဢွင်ႇ၊ ႁႂ်ႈၶဝ်ၸဵဝ်းတူၵ်းသုမ်း။ ၸွမ်းၼင်ႇတၢင်းယုမ်ႇယမ်ႁဝ်းၶႃႈမီးဝႆႉၼၼ်ႉ။ ဢဝ်လၢႆးတၢင်းၵူႈလၢႆးလၢႆးသေ တိုၵ်းၶႃႈယဝ်ႈႁဝ်းတႄႉ” – ဝႃႈၼႆ။
ၾၢႆႇၼိုင်ႈၵေႃႈပဵၼ် မဵတ်ႇမၢႆ ဢၼ်သိုၵ်းမၢၼ်ႈယိုတ်းမိူင်း ယႃႉပၢင်ၼႄၵၢင်ၸႂ်၊ ႁဵတ်းႁၢႆႉတီႉၺွပ်းၵူၼ်းမိူင်းႁူဝ်ပူင်း ၽွင်းၼႄၵၢင်ၸႂ်ပီၵၢႆၼၼ်ႉ ၶွပ်ႈတဵမ်ပီ ၼႂ်းဝၼ်းမိူဝ်ႈၼႆႉ။
သိုၵ်းမၢၼ်ႈၼႄၶေႃႈဢၢင်ႈဝႃႈ ၽွၼ်းပၢင်ႈ ပၢင်လိူၵ်ႈတင်ႈ 2020 ဢမ်ႇၽဵင်ႇပဵင်းပဵၼ်ထမ်းၼႆသေ ယိုတ်းဢႃႇၼႃႇဝၢၼ်ႈမိူင်း မိူဝ်ႈဝၼ်းတီႈ 1/2/2021။ ၵူၼ်းမိူင်းဢမ်ႇၽွမ်ႉလႄႈ လုၵ်ႉႁိုၼ်ႇၼႄၵၢင်ၸႂ်ပတ်းပိုၼ်ႉၸိုင်ႈမိူင်း။ သိုၵ်းမၢၼ်ႈဢဝ်လၢႆႁုၵ်ႉႁၢႆႉယႃႉပၢင်ၼႄၵၢင်ၸႂ်။ ၸႂ်ႉလၢႆးမိူၵ်ႈမႂ်ႈသေ ၶႃႈႁႅမ်တၢႆၵူၼ်းမိူင်းမႃး မီး 1,620 ၵေႃႉ တီႉၺွပ်းယဵပ်ႈၶွၵ်ႈ 12,550 ၵေႃႉ လႄႈ ပိုၼ်ၽၢဝ်ႇဢဝ်ႈလိူင်ႈဝႆႉ 1,973 ၵေႃႉ ယူႇတီႈ ၸုမ်းၸွႆႈထႅမ်ၵူၼ်း တူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP ပိုၼ်ၽၢဝ်ႇဢွၵ်ႇဝႆႉ မိူဝ်ႈဝႃး ဝၼ်းတီႈ 7/3/2022 ၼႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ