မီးၽူႈလၵ်ႉၵူၼ်းၸူၼ် လိူင်ႇၼမ် ၼႂ်းၸႄႈဝဵင်းၵူတ်ႉၶၢႆ သိုၵ်းမၢၼ်ႈယိုတ်းမိူင်းမႃးပီပၢႆၼႆႉ ၵူၼ်းၼုမ်ႇ ၸိူဝ်းတိတ်းယႃႈမဝ်း ၵမ်ၵေႃႈၼမ်ႁႅင်း ၵူၼ်းပိုၼ်ႉတီႈလၢတ်ႈ။
ၼႂ်းၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၸွမ်းၼႂ်းပွၵ်ႉ/ ယွမ်ႇ ၼႂ်းၵိဝ်ႇၼႂ်းငွၼ်ႈ ၸွမ်းယုမ်း ယွမ်ႇ ၸလွပ်ႈ သႃလႃး ၸွမ်းပႃႇႁဵဝ်ႈၸိူဝ်းၼႆႉ ၸဵမ်ၸၢႆး/ ယိင်း ၵူၼ်းၼုမ်ႇ ၵူၼ်းပိုၼ်ႉတီႈ ဢွၼ်ၵၼ်ၵႂႃႇသူႇသမ်း ၵိၼ်ယႃႈ မဝ်းၵမ်။ ဢၼ်သမ်းဢဝ်ၵေႃႈ မီးတင်းယိင်းတင်းၸၢႆး၊ ပၢင်တေႃႇလွင်းၵေႃႈလိူင်ႇမၢၵ်ႈမႃးလႄႈ ၽူႈလၵ်ႉၵူၼ်းၸူၼ် ၵေႃႈၼမ်။ သိုၵ်းမၢၼ်ႈ/ ပလိၵ်ႈ ဢမ်ႇဢဝ်ပုၼ်ႈၽွၼ်း ၵႅတ်ႇၶႄႁႄႉၵင်ႈပၼ်သင်။
ၵူၼ်းၼုမ်ႇ ၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ၼၢင်းယိင်းဢွၼ်ႇ ဢႃယု 14-15 ၼႆႉၵေႃႈ ၵိၼ် သမ်းယႃႈမဝ်းၵမ်ၼမ်ၼႃႇယဝ်ႉ။ လႆႈငိၼ်း ပလိၵ်ႈမၢၼ်ႈၶဝ်ဝႃႈ ၼိုင်ႈႁိူၼ်းၼိုင်ႈၵေႃႉ တေလႆႈၵႂႃႇႁဵတ်းသိုၵ်းမၢၼ်ႈၼႆလႄႈ ၸိူဝ်းပၢႆႈၵေႃႈပၢႆႈ၊ ၸိူဝ်းၶဝ်ႈထိူၼ်ႇၵေႃႈၶဝ်ႈ၊ ၵမ်ႈၽွင်ႈ ပၢႆႈၵႂႃႇယူႇၸွမ်းဝၢၼ်ႈ ၼွၵ်ႈၼႃးပၢင်ႇသေ ဢွၼ်ၵၼ်ၸပ်းယႃႈ ႁဵတ်းၼႆမႃးၵေႃႈ မီးတင်းၼမ်ဢေႃႈ တီႈၼႆႈတႄႉ”- ဝႃႈၼႆ။
ဢိင်ၼိူဝ်ၵူၼ်းသူႇသမ်းၵိၼ်ယႃႈလိူင်ႇၼမ်မႃးသေ ၽူႈလၵ်ႉၵူၼ်းၸူၼ် ၵေႃႈ လိူင်ႇၼမ် ယူႇတီႈၾၢႆႇသိုၵ်းမၢၼ်ႈ/ ပလိၵ်ႈၵေႃႈ ဢမ်ႇဢဝ် ႁူမ်ႇလူမ်ႈပၼ်သေဢမ်ႇၵႃး ပေႃးဢွၵ်ႇတၢင်းၼွၵ်ႈ ယင်းဢမ်ႇႁတ်းသႂ်ႇသိူဝ်ႈၶူဝ်းပလိၵ်ႈလူးၵွၼ်ႇ ဝႃႈၼႆ။
“ ပေႃးၵႂႃႇတိူင်ႇလၢတ်ႈတီႈပလိၵ်ႈယေးၶဝ်ၵေႃႈ ၶဝ် ဢမ်ႇဢဝ်ပုၼ်ႈၽွၼ်း ဢဝ်လိူင်ႈသင်။ ၶဝ်ဢမ်ႇၵႂႃႇႁတ်းတီႉၺွပ်းၶႃႈ ၶဝ်ဢမ်ႇႁတ်းဢွၵ်ႇတၢင်းၼွၵ်ႈၵႂႃႇတၢင်းလႂ် ပေႃးဢွၵ်ႇၼႆၵေႃႈ ဢမ်ႇႁတ်း သႂ်ႇသိူဝ်ႈပလိၵ်ႈ Uniform ၶဝ်”- ၵူၼ်းၼုမ်ႇ သိုပ်ႇလၢတ်ႈ ၼႄၼင်ႇၼႆ။
ၵဵဝ်ႇလူၺ်ႈလွင်ႈ ၽူႈလၵ့်ၵူၼ်းၸူၼ်လိူင်ႇၼမ်မႃးၸိူင့်ၼႆ ၵူၼ်းမိူင်းပိုၼ်ႉတီႈဝဵင်းၵူတ့်ၶၢႆ ၵမ်ႈၼမ် လႆႈၵူဝ် မႆႈၸႂ်ၵၼ်ဝႆႉ။ ယၢမ်းလဵဝ် ပေႃးထိုင် ယၢမ်းႁူဝ်ၶမ်ႈ 6 – 7 မူင်းၸိုင် ဢွၼ်ၵၼ်ပိၵ်ႉဢိုတ်းႁၢၼ်ႉ ဢိုတ်းႁိူၼ်းၸဵမ်ၸဝ်ႉ ဢမ်ႇမီးၽႂ်ႁတ်းဢွၵ်ႇၼွၵ်ႈႁိူၼ်းယေး ဝႃႈၼႆ။
လွင်ႈၽူႈလၵ်ႉၵူၼ်းၸူၼ် ၵူၼ်းသူႇသမ်းၵိၼ်ယႃႈမဝ်းၵမ် ၼမ်မႃးၸိူင်ႉၼႆၼႆႉ ဢမ်ႇၵႃး တီႈဝဵင်းၵူတ်ႉၶၢႆၼႆႉၵူၺ်း ၼႂ်းမိူင်းတႆး လၢႆၸႄႈဝဵင်းၵေႃႈ လိူင်ႇၼမ်မႃး မိူၼ်ၵၼ် ။ ၵူၼ်းမိူင်းၵမ်ႈၼမ်တႄႉ မႆႈၸႂ်လွင်ႈႁူမ်ႇလူမ်ႈ၊ တႃႇၶူဝ်းႁိူၼ်းယေးၵူၺ်းဢမ်ႇၵႃး လွင်ႈၵႂႃႇမႃးၸွမ်းတၢင်း ၸိူဝ်းၼႆႉၵေႃႈ လႆႈမႆႈၸႂ်လိူဝ်မႃးၵူႈပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ