ၵူၼ်းႁဵတ်းၵၢၼ် တီႈၵဵတ်ႉၵျိၼ်ႊသၢၼ်ႊၵျေႃႉ လႅၼ်လိၼ်တႆး – ၶႄႇ ၸပ်းၶူဝ်ႊဝိတ်ႉ 19 လႄႈ ၾင်ႇမိူင်းၶႄႇ သင်ႇပိၵ်ႉ ဢိုတ်းၽၵ်းတူဝႆႉ ၸူဝ်ႈၶၢဝ်း ၵူၼ်းၵႃႉ ၸဝ်ႈၶူဝ်းႁႆႈၶူဝ်းသူၼ်လူႉသုမ်း။
ၽၵ်းတူ ၵျိၼ်ႊသၢၼ်ႊၵျေႃႉ လႅၼ်လိၼ်တႆး – ၶႄႇ ဢၼ်တိတ်းၵၼ်တၢင်းၸႄႈဝဵင်းမူႇၸေႊ ၼၼ်ႉ ၶႄႇၶိုၼ်းသင်ႇပိၵ်ႉ တင်ႈတႄႇ ဝၼ်းတီႈ 2/3/2022 ယၢမ်းၵၢင်ၼႂ် ။ တီႈၵေႇသုတ်းတေႁိုင်မွၵ်ႈ 3 ထိုင် 5 ဝၼ်း ၵႃးတၢင်ႇ ၶူဝ်းၵုၼ်ႇႁႅင်ႈ၊ တႅင်ၸမ်ႇပူႇ၊ တႅင်ႁွမ်၊ မၢၵ်ႇၽဵတ်း၊ မၢၵ်ႇပၵ်ႉ တႃႇ 300 ပၢႆ ၶမ်ဝႆႉၼႂ်းမိူင်းၶႄႇ။ ဢၼ်တေလုၵ်ႉတၢင်းမိူင်းတႆး ၶဝ်ႈမိူင်းၶႄႇသမ်ႉ မီး 400 လမ်းပၢႆ ၊ လႆႈၵိုတ်းၶမ်ဝႆႉသွင်ၾင်ႇလႅၼ်လိၼ်။ ႁဵတ်းႁႂ်ႈ ၸဝ်ႈသူၼ် ၸဝ်ႈၵုၼ်ႇ ထူပ်းတၢင်း ယၢပ်ႇ လူႉသုမ်းၼမ်။
ၽူႈမီးပုၼ်ႈၽွၼ်း လႅၼ်လိၼ်တႆး – ၶႄႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉဝႃႈ ၽူႈမီးပုၼ်ႈၽွၼ်း ၵူၼ်းႁဵတ်းၵၢၼ် တီႈၵဵတ်ႉ ဢၼ်မီးၾၢႆႇ မိူင်းၶႄႇၼၼ်ႉ ၵူတ်ႇထတ်းႁၼ် တၢင်းပဵၼ်ၶူဝ်ႊဝိတ်ႉ 19 မွၵ်ႈ 10 ၵေႃႉၼႆလႄႈ တၢင်းမိူင်းၶႄႇ သင်ႇပိၵ်ႉၽၵ်းတူၶိုၼ်း ၸူဝ်ႈၶၢဝ်း လႆႈငိၼ်းဝႃႈ တေပိၵ်ႉဢိုတ်း ႁိုင် 3 ဝၼ်း ဢမ်ႇၼၼ် 5 ဝၼ်းၼႆ”- ဝႃႈၼႆ။
ၵူၼ်းႁဵတ်းၵၢၼ်တီႈၽၵ်းတူလႅၼ်လိၼ် ဢၼ်ၸပ်းတၢင်းပဵၼ် ၶူဝ်ႊဝိတ်ႉ ဢူဝ်ႊမီႊၶရွၼ်ႊၼႆႉ ပဵၼ်ၵူၼ်းၾင်ႇမိူင်းၶႄႇ။ ယၢမ်းလဵဝ် ဢၼ်ၶႄႇသင်ႇပိၵ်ႉၼႆႉ ဢမ်ႇၸႂ်ႈတီႈၵျိၼ်ႊသၢၼ်ႊၵျေႃႉ တီႈလဵဝ်ၵူၺ်း။ ပႃးၸဵမ်ၽၵ်းတူလႅၼ်လိၼ် လွႆၸႄႈ ၼႂ်းမိူင်းၶၢင်ၵေႃႈ ၶႄႇသင်ႇပိၵ်ႉမိူဝ်ႈဝၼ်းတီႈ 1/3/2022 ၊ ၽၵ်းတူ ၶျိၼ်ႊသူၺ်ႇႁေႃႇ (ၼမ်ႉၽႃႈ) ၵေႃႈ သင်ႇပိၵ်ႉမိူဝ်ႈဝၼ်းတီႈ 26/2/2022 ။
“ပေႃးၵူတ်ႇထတ်း 10 ၵေႃႉၼႆႉ တေႁၼ်တိတ်းၸပ်း ဢူဝ်ႊမၢႆႊၶရွၼ်ႊ မွၵ်ႈ 3 ၵေႃႉၼႆႉ။ တၢင်းမိူင်းၶႄႇၼႆႉ ၶဝ်ဝႆႉပဵၼ်ယႂ်ႇ ၼႃႇ တင်းပဵၼ် ဢူဝ်ႊမီႊၶရွၼ်ႊၼႆႉ။ ပေႃးႁၼ်ၵူၼ်းၸပ်းၵေႃႉၼိုင်ႈၵေႃႈ ၶဝ်ၵိုတ်းၵၢၼ်ပႅတ်ႈတင်းမူတ်းသေ ပေႃးလၢင်ႉ ၊ သိတ်းယႃႈၶႃႈၸိူဝ်ႉယဝ်ႉတင်းမူတ်း ၶဝ်ၸင်ႇလႅၵ်ႈၵူၼ်းႁဵတ်းၵၢၼ်သေ ၸင်ႇပိုတ်ႇပၼ်ၶိုၼ်း ၸိူင်ႉၼႆၶႃႈၼေႈ။ ”- ၽူႈမီးပုၼ်ႈၽွၼ်း လႅၼ်လိၼ်တႆး – ၶႄႇ သိုပ်ႇလၢတ်ႈၼင်ႇၼႆ။
ၵွပ်ႈၼႆလႄႈ ၸဝ်ႈၵုၼ်ႇ ၸဝ်ႈၵႃးမၢၵ်ႇမႆႉလႄႈၽၵ်းယိူဝ်ႈၼၢင်းၶဵဝ် တၢင်းမိူင်းတႆး မိူင်းမၢၼ်ႈ ယႃႇၽူမ်ႈၶိုၼ်ႈမႃးတၢင်းလႅၼ်လိၼ်သေၵမ်း – ၼႆ ၾၢႆႇသိုဝ်ႉၶၢႆမၢၵ်ႇမႆႉ တီႈလၢၼ်ႇလႅၼ်လိၼ်ၶႄႇ လႆႈဢွၵ်ႇလိၵ်ႈဝႆႉၼင်ႇၼႆ။
ႁႂ်ႈၵႃးၶဝ်ႈသၢၼ် မၢၵ်ႇမႆႉမၢၵ်ႇတွၵ်ႇၶဝ်ႈဢွၵ်ႇသိုဝ်ႉၶၢႆတေႃႇၵၼ် ၶိုၼ်းၼႆသေ ၵဵတ်ႉ ၵျိၼ်ႊသၢၼ်ႊၵျေႃႉၼႆႉ ၶႄႇတႄႇပိုတ်ႇပၼ်ၶိုၼ်း မိူဝ်ႈလိူၼ်ၼူဝ်ႊဝႅမ်ႊပိူဝ်ႊ 2021 ပူၼ်ႉမႃး ။
