ၵူၼ်းၼုမ်ႇ ၵျွၵ်ႉမႄး ယဵပ်ႇၺႃးမၢၵ်ႇ ၼႂ်းၵႄႈ ဝၢၼ်ႈပူးၶႃး – ဝၢၼ်ႈၼႃးၶေႃ လူႉတၢႆၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း ၵေႃႉၼိုင်ႈ။
မိူဝ်ႈဝႃး ဝၼ်းတီႈ 1/3/2022 ယၢမ်းၵၢင်ဝၼ်း မွၵ်ႈ 11 မူင်းၶိုင်ႈ ၵူၼ်းၼုမ်ႇ 2 ၵေႃႉ ၵႂႃႇႁႃပႃသေ တႃႇသွင်ၵေႃႉသမ်ႉ ယဵပ်ႇၺႃးမၢၵ်ႇ ႁိမ်းႁွင်ႈ ၼမ်ႉ ၼႂ်းၵႄႈဝၢၼ်ႈပူးၶႃး – ဝၢၼ်ႈၼႃးၶေႃ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ လႆႈမၢတ်ႇၸဵပ်းႁၢဝ်ႈႁႅင်း လူႉတၢႆၸွမ်းတၢင်းၵေႃႉၼိုင်ႈ ၽွင်းသူင်ႇယူတ်းယႃတူဝ် တီႈဝဵင်းလိူဝ်ႇ(မၼ်းတလေး) ထႅင်ႈၵေႃႉၼိုင်ႈ သူင်ႇယူတ်းယႃတူဝ် တီႈလႃႈသဵဝ်ႈ။
သြႃႇမ လူၺ်းဢူင်ႇမႃႇ ၸုမ်းၶႂၢႆႇၶႃပႄလႅင် ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ၵႂႃႇႁႃပႃ တီႈ ၼမ်ႉႁွင်ႈ တၢင်းၵႂႃႇၼမ်ႉတူၵ်း တၢတ်ႇပႃၶမ်း ပူၼ်ႉဝၢၼ်ႈၼႃးၶေႃၵႂႃႇၼၼ်ႉ ၶဝ်ၵႂႃႇၸွမ်းၵၼ် ၵေႃႉပႆၵႂႃႇ ဢွၼ်တၢင်း ၼၼ်ႉ ယဵပ်ႇၺႃးသေတႅၵ်ႇ။ တိူဝ်ႉသႂ်ႇပႃးၵူၼ်းပႆမႃး ၸွမ်းတၢင်းလင်ထႅင်ႈၵေႃႉၼိုင်ႈ ။ လႆႈမၢတ်ႇၸဵပ်း ႁၢဝ်ႈႁႅင်းတင်းသွင်။ ၵေႃႉၼိုင်ႈ သူင်ႇယူတ်းယႃဝႆႉတီႈလႃႈသဵဝ်ႈ။ ထႅင်ႈၵေႃႉၼိုင်ႈ ၽွင်းတိုၵ်ႉ တေႃႉသူင်ႇတေၵႂႃႇယူတ်းယႃ တီႈမၼ်းတလေးၼၼ်ႉ လႆႈလူႉတၢႆၸွမ်းတၢင်း”- ဝႃႈၼႆ။
ၵေႃႉလူႉတၢႆၼၼ်ႉ ၸိုဝ်ႈႁွင်ႉ လႃးဢူး(ႁွင်ႉ) ၼၢႆႇၼၢႆႇ ဢႃယု 20 ပီ ယူႇပွၵ်ႉ 2 ဝဵင်းၵျွၵ်ႉမႄး မၼ်းၸၢႆး လႆႈတိူဝ်ႉမၢတ်ႇၸဵပ်းၸွမ်းၶႃ၊ ၼႃႈလႄႈ ၸွမ်းတူဝ် ႁၢဝ်ႈႁႅင်း။
ၵေႃႉမၢတ်ႇၸဵပ်းၼၼ်ႉသမ်ႉ သူင်ႇယူတ်းယႃတူဝ်ဝႆႉတီႈလႃႈသဵဝ်ႈ ၸိုဝ်ႈႁွင်ႉ ၸၢႆးဢွင်ႇမိူင်း ဢႃယု 22 ပီ မၼ်းၸၢႆး တိူဝ်ႉမၢတ်ႇၸဵပ်း တီႈပုမ်/ တွင်ႉ ။
ႁိမ်းဝၢၼ်ႈပူးၶႃး – ၼႃးၶေႃတီႈဢၼ် ၵူၼ်းၼုမ်ႇ ၵျွၵ်ႉမႄး ယဵပ်ႇၺႃးမၢၵ်ႇၼၼ်ႉ ပူၼ်ႉမႃးမိူဝ်ႈလိူၼ်ၵျႅၼ်ႊၼိဝ်ႊရီႊ ၸုမ်းဢူၺ်း လီပွတ်းႁွင်ႇတင်း RCSS လႆႈပိုတ်းယိုဝ်းၵၼ်ႁၢဝ်ႈႁႅင်း။
ၼႂ်းၵႄႈသီႇပေႃႉ – ၵျွၵ်ႉမႄး တီႈဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ်ပိုတ်းယိုဝ်းၵၼ် ပူၼ်ႉမႃး မိူဝ်ႈလိူၼ်ၵျႅၼ်ႊၼိဝ်ႊရီႊၼၼ်ႉၵေႃႈ ၵူၼ်းပၢႆႈၽေးသိုၵ်း 2 ၵေႃႉ ၼႂ်းဢိူင်ႇၼမ်ႉသိမ်ႇ ၸႄႈဝဵင်းသီႇပေႃႉ ယဵပ်ႇၺႃးမၢၵ်ႇၼင်ႇၵဝ်ႇ။
 ထႅင်ႈၵေႃႉၼိုင်ႈ သူင်ႇယူတ်းယႃတူဝ် တီႈလႃႈသဵဝ်ႈ။){kind=link}