ၽူႈၵွၼ်းၸႄႈတွၼ်ႈ/ၸႄႈဝဵင်း ၼႂ်းငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ႁူမ်ႈၵၼ် လူင်းႁူပ်ႉထူပ်းၵူၼ်းမိူင်း မိူင်းၵႅတ်ႈ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ပူၼ်ႉမႃးမိူဝ်ႈဝၼ်းတီႈ 02/03/2018 ၵၢင်ၼႂ်မွၵ်ႈၶၢဝ်းယၢမ်း 9 မူင်းၼၼ်ႉ ယူႇတီႈၽူႈၵွၼ်းၸႄႈတွၼ်ႈ မၢႆ 10 ၵႅမ်ၶုၼ်ႁၢၼ်ဝၼ်းလီ လႄႈၽူႈၵွၼ်းၸႄႈဝဵင်း ၵႅမ်ၶုၼ်ႁၢၼ်ၵေႃးလိင်ႇ ဢွၼ်ႁူဝ်သေ လူင်းႁူပ်ႉထူပ်း ၵူၼ်းမိူင်း တီႈႁူင်းႁဵၼ်းဝၢၼ်ႈၼႃး ဢိူင်ႇမိူင်းၵႅတ်ႈ ၼႂ်းၸႄႈဝဵင်းလႃႈသဵဝ်ႈ။ သပ်းလႅင်းၼႄလွင်ႈပၢႆးပၺ်ၺႃ၊ တူင်ႇဝူင်းၵူၼ်း၊ ၽွၼ်းႁၢႆႉယႃႈမဝ်းၵမ်ၸိူဝ်းၼႆႉသေ ၶွတ်ႇၽွတ်ႈပၼ်ၸုမ်းပေႃႈႁႆႈမႄႈၼႃး မုၵ်ႉၸုမ်းၸၢႆးယိင်းပၢၼ်မႂ်ႇ၊ မီးၽူႈၶိုၼ်ႈႁွတ်ႈႁိမ်း 200 ၵေႃႉ-ၼႆယဝ်ႉ။
ၵဵဝ်ႇၵပ်းလွင်ႈၼႆႉ ၽူႈၵေႃႉၵႂႃႇၶဝ်ႈႁူမ်ႈပၢင်ႁူပ်ႉထူပ်း ၵေႃႉၼိုင်ႈလၢတ်ႈဝႃႈ- “ၶဝ်ၸဝ်ႈမႃးသပ်းလႅင်းၼႄ ၵဵဝ်ႇၵပ်းလွင်ႈႁူင်းႁဵၼ်း ပၢႆးပၺ်ၺႃမၼ်းလမ်ႇလွင်ႈၸိူင်ႉႁိုဝ်၊ ၵၢၼ်တူင်ႇဝူင်းၵူၼ်း ဢၼ်လႂ်လီႁဵတ်းသၢင်ႈလႄႈ ဢၼ်လႂ်ဢမ်ႇမီးႁဵတ်းသၢင်ႈ၊ လွင်ႈတုမ်ႉတိူဝ်ႉယႃႈမဝ်းၵမ်ၼႆႉ မၼ်းၸၢင်ႈပဵၼ်ၸိူင်ႉႁိုဝ်၊ ထုၵ်ႇလီဝႄႈယႃႈမဝ်းၵမ် ယႃႇပေသူင်မၵ်ႉမၼ်းၸိူဝ်းၼႆႉ။ လိူဝ်သေၼၼ်ႉ ၶွတ်ႇၽွတ်ႈပၼ်ပႃး ၸုမ်းပေႃႈႁႆႈမႄႈၼႃးလႄႈ မုၵ်ႉၸုမ်းၸၢႆးယိင်းပၢၼ်မႂ်ႇ ၼင်ႇႁိုဝ်သမ်ႉပေႃးတေမီးငိုၼ်းပၼ်ႇႁွၼ်ႈလႄႈ ၵႆယၢၼ်ယႃႈမဝ်းၵမ်ၸိူဝ်းၼႆႉ။ ယူႇတီႈႁဝ်းၶႃႈၵေႃႈ ယိၼ်းၸူမ်းတႄႉတႄႉ တီႈလႆႈမီးပၢင်ႁူပ်ႉထူပ်းၸိူင်ႉၼႆ”- ဝႃႈၼႆ။
“ပၢင်ၵုမ်ဢုပ်ႇဢူဝ်း ဢမ်ႇၼၼ် ပၢင်လူင်းႁူပ်ႉထူပ်းၵူၼ်းမိူင်းၸိူင်ႉၼႆၼႆႉ ၼႂ်းၼႃႈတီႈၵုမ်းၵမ် ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊ ၾၢႆႇၽွင်းငမ်းၸႄႈဝဵင်းလႂ်ၸႄႈဝဵင်းၼၼ်ႉ ၼင်ႇႁိုဝ်သမ်ႉပေႃးတေလႆႈႁူႉ လွင်ႈတၢင်းယၢပ်ႇၽိုတ်ႇၵူၼ်းမိူင်းလႄႈ ၸမ်ၸႂ်ၵူၼ်းမိူင်းၼၼ်ႉ ၵဵပ်းဢဝ်သဵင်ၵၢင်ၸႂ်ၵူၼ်းမိူင်း၊ ၶေႃႈႁၼ်ထိုင်ၵူၼ်းမိူင်း ဢၼ်ၶႂ်ႈပၼ်တၢင်းႁၼ်ထိုင် ၶႂ်ႈလႅၵ်ႈလၢႆႈၼိူဝ် SSPP/SSA ၸိူင်ႉႁိုဝ်ၸိူဝ်းၼႆႉ၊ ပဵၼ်လွင်ႈထႅမ်ထွၼ် လႅၵ်ႈလၢႆႈ မူၼ်ႉမႄးၵၼ် ၼင်ႇႁိုဝ်တေၶိုၼ်ႈယႂ်ႇၵႂႃႇ။ ယွၼ်ႉၼၼ် ပၢင်ႁူပ်ႉထူပ်းၵူၼ်းမိူင်းၼႆႉ ႁဝ်းၶႃႈယၢမ်ႈၸတ်းႁဵတ်းမႃးယူႇၵူႈပီပီ၊ မိူဝ်းၼႃႈမႃးၵေႃႈ တေၶတ်းၸႂ်လူင်းႁူပ်ႉထူပ်းၵူၼ်းမိူင်းႁဝ်းၶႃႈသေ ပိၼ်ႇပႆႇလႅၵ်ႈလၢႆႈၵၼ်ၵႂႃႇတိၵ်းတိၵ်း”- ၽူႈမီးၸၼ်ႉၼႂ်း SSPP/SSA ၸဝ်ႈၼိုင်ႈလၢတ်ႈၼင်ႇၼႆ။
ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA)ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၸၼ်ႉၸႄႈမိူင်း၊ ၸၼ်ႉမိူင်းႁူမ်ႈတုမ်ဝႆႉ တင်းလူင်ပွင်ၸိုင်ႈမၢၼ်ႈ/ တပ်ႉသိုၵ်းမၢၼ်ႈ မိူဝ်ႈႁူဝ်ပီ 2012 ။ ၵူၺ်းၵႃႈ ပဵၼ်ၸုမ်းဢမ်ႇလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၊ မိူဝ်ႈလဵဝ် ၶဝ်ႈပႃးပဵၼ်လုၵ်ႉၸုမ်း FPNCC ဢၼ်ၸုမ်းဝႃႉဢွၼ်ႁူဝ်ၼမ်းၼႃႈဝႆႉ။
