ၵူၼ်းဢမ်ႇႁူႉၾၢႆႇမႃးပွႆႇမၢၵ်ႇ သႂ်ႇႁိူၼ်း ပလိၵ်ႈမၢၼ်ႈ (နယ်ထိန်းရဲ) လင်ၼိုင်ႈ တီႈဝဵင်းတူၼ်ႈတီး ႁိူၼ်းယေး လူႉၵွႆ၊ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။
မိူဝ်ႈဝႃး ဝၼ်းတီႈ 28/2/2022 ယၢမ်းႁူဝ်ၶမ်ႈ မွၵ်ႈ 6 မူင်း မီးၵူၼ်းမႃးပွႆႇမၢၵ်ႇသႂ်ႇ တီႈႁိူၼ်းပလိၵ်ႈမၢၼ်ႈ ဢၼ်မီတီႈပွၵ်ႉၸဝ်ႈၸၢမ်ႇထုၼ်း ၸႄႈဝဵင်းတူၼ်ႈ တီး ၸိုင်ႈတႆးပွတ်းၸၢၼ်း သွင်လုၵ်ႈ ။ တႅၵ်ႇလုၵ်ႈၼိုင်ႈ တိူဝ်ႉသႂ်ႇလဵၵ်းမုင်းႁွင်ႈႁုင်မိုဝ်ႉ လူႉၵွႆ ။
ၵူၼ်းပိုၼ်ႉတီႈ ပွၵ်ႉၸဝ်ႈၸၢမ်ႇထုၼ်း လၢတ်ႈတီႈၽူႈတွႆႇႁွၵ်ႈဝႃႈ – “ရူတ်ႉၶိူင်ႈ Click လမ်းၼိုင်ႈဢၼ်မီးၼႂ်းဝၢင်းႁိူၼ်း ပလိၵ်ႈၼၼ်ႉ လူႉၵွႆၶႃႈဢေႃႈ ။ ပဵၼ်ၼမ်ႉမိုဝ်းၽႂ်မႃးပွႆႇသႂ်ႇတႄႉ ဢမ်ႇ ႁူႉ။ မႃးပွႆႇသႂ်ႇ သွင်လုၵ်ႈ။ တႅၵ်ႇလုၵ်ႈၼိုင်ႈၶႃႈဢေႃႈ သဵင်ႁႅင်းပေႇၸႂ်ၶႃႈ။ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး၊ လဵၵ်းမုင်းႁွင်ႈ ႁုင်မိုဝ်ႉတႄႉ လႆႈလူႉၵွႆ ၸွမ်းၵမ်ႈၽွင်ႈၶႃႈ”- ဝႃႈၼႆ။
ႁိူၼ်းပလိၵ်ႈၼၼ်ႉ ပဵၼ်ႁိူၼ်းသွင်ၸၼ်ႉ မီးႁိမ်းၵၢတ်ႇၸဝ်ႈၸၢမ်ႇထုၼ်း မေးၼၢင်းပလိၵ်ႈမၢၼ်ႈၼၼ်ႉသမ်ႉ ပဵၼ်ၽူႈ ႁၢပ်ႇၵၢၼ်ၾၢႆႇလိူမ်ႈလႆႇ ။
ဝၢႆးသေ မၢၵ်ႇတႅၵ်ႇယဝ်ႉၼၼ်ႉ ၸွမ်းၼႂ်းဝဵင်းတူၼ်ႈတီးၸိူဝ်းၼႆႉ ယူႇတီႈပလိၵ်ႈ/ သိုၵ်းမၢၼ်ႈ ၵူတ်ႇထတ်းၵူၼ်းမိူင်းပိုၼ်ႉတီႈၵႂႃႇမႃး ႁၢဝ်ႈႁႅင်း။ ၵူၼ်းဢၼ်မႃးပွႆႇမၢၵ်ႇၼၼ်ႉ ပဵၼ်ၼမ်ႉမိုဝ်းၽႂ် ၸုမ်းလႂ် ႁဵတ်းဢၼ်ဝႃႈၼၼ်ႉ ဢမ်ႇလႆႈႁူႉ။
မိူဝ်ႈပူၼ်ႉမႃး ဝၼ်းတီႈ 28/11/2021 ၼၼ်ႉ မၢၵ်ႇတႅၵ်ႇတီႈႁိူၼ်း ၽူႈမီးပုၼ်ႈၽွၼ်း ၾၢႆႇလိူမ်ႈလႆႇ ဝဵင်းတူၼ်ႈတီး လုၵ်ႈၼိုင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ