ၵႃးတၢင်ႇၽိုၼ်းလမ်းၼိုင်ႈ ပိၼ်ႈတီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူၼ်းလူႉတၢႆ 1 ၵေႃႉ မၢတ်ႇၸဵပ်း 3 ၵေႃႉ။
မိူဝ်ႈဝႃး ဝၼ်းတီႈ 27/2/2022 ယၢမ်းဝၢႆးဝၼ်း မွၵ်ႈ 2 မူင်းၶိုင်ႈ ၵႃးတၢင်ႇၽိုၼ်း လမ်းၼိုင်ႈ ပိၼ်ႈ တီႈႁိမ်းဝၢၼ်ႈပၢင်ႇၸလွပ်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸဝ်ႈၵႃး လူႉတၢႆထင်တီႈ ၵူၼ်းၸွမ်းၵႃး 3 ၵေႃႉ မၢတ်ႇၸဵပ်း။
ၸုမ်းပရႁိတ ဢိုမ်းတမၢဝ်း ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၵႃးပိၼ်ႈၼၼ်ႉ ပဵၼ်တီႈႁိမ်းဝၢၼ်ႈပၢင်ႇၸလွပ်ႈ။ ၸဝ်ႈၵႃးတႄႉ လူႉတၢႆတီႈ ၼၼ်ႈ။ ႁဵတ်းသင်လႄႈ ပိၼ်ႈဢၼ်ဝႃႈၼၼ်ႉ ဢမ်ႇလႆႈႁူႉလွင်ႈတၢင်းၶႃႈ။ ၼႂ်းၵႃးၼၼ်ႉ ၶဝ်မႃးၸွမ်းၵၼ် 4 ၵေႃႉ ပႃးၸဝ်ႈၵႃး။ တႃႇ 3 ၵေႃႉတႄႉ လႆႈမၢတ်ႇၸဵပ်း”- ဝႃႈၼႆ။
ၵူၼ်းႁေႃႈၵႃး တၢင်ႇၽိုၼ်း ဢၼ်လႆႈလူႉတၢႆၵႂႃႇထင်တီႈၼၼ်ႉ ပဵၼ်ၵူၼ်းဝၢၼ်ႈၵဵင်းလေႃး ဢႃယု တေမီးမွၵ်ႈ 50 ပီ ၼႂ်းၵူၼ်းမၢတ်ႇၸဵပ်း 3 ၵေႃႉၼၼ်ႉ ပႃးလုၵ်ႈဢွၼ်ႇ ဢႃယု 5 ၶူပ်ႇ ၵေႃႉၼိုင်ႈ ယၢမ်းလဵဝ် သူင်ႇယူတ်းယႃဝႆႉတီႈ ႁူင်းယႃၵျွၵ်ႉမႄး။
မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 26/2/2022 ပူၼ်ႉမႃးၼၼ်ႉ ၼႂ်းၵႄႈသီႇပေႃႉ – ၼမ်ႉလၼ်ႈၵေႃႈ မီးၵႃးလမ်းၼိုင်ႈ ပိၼ်ႈသေ ၵူၼ်းမႃး ၸွမ်း ၼႂ်းၵႃႈ လႆႈမၢတ်ႇၸဵပ်းၸွမ်း 7 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ