ႁၢၼ်ႉၶၢႆၾူၼ်း တီႈဝဵင်းၼွင်ၶဵဝ် ႁၢၼ်ႉၼိုင်ႈ ထုၵ်ႇၵူၼ်းႁၢႆႉၶဝ်ႈၸူၼ် လႆႈၵႂႃႇငိုၼ်းလႄႈ ၾူၼ်းၵမ်ႈၽွင်ႈ လွင်ႈၵူၼ်းမၢတ်ႇၸဵပ်း လူႉတၢႆ ဢမ်ႇမီး။
မိူဝ်ႈဝႃး ဝၼ်းတီႈ 27/2/2022 ယၢမ်းႁူဝ်ၶမ်ႈ မွၵ်ႈ 7 မူင်း ႁၢၼ်ႉၶၢႆၾူၼ်း ဢၼ်ပိုတ်ႇဝႆႉ တီႈႁိမ်းသဵၼ်ႈတၢင်းလူင် တီႈဝၢၼ်ႈဢုမ်ႇတီးၸႄႈ ဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းႁၢႆႉ ၶဝ်ႈၸူၼ် လႆႈၵႂႃႇငိုၼ်းမၢၼ်ႈ မွၵ်ႈ 5 သႅၼ်ပျႃးလႄႈ ၾူၼ်း 6 လုၵ်ႈ။
ၵူၼ်း ၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းႁၢႆႉၶဝ်ႈၸူၼ် ၼႂ်းႁၢၼ်ႉၶၢႆၾူၼ်း လႆႈၵႂႃႇငိုၼ်းမွၵ်ႈ 5 သႅၼ် လႄႈ ၾူၼ်းဢၼ်တမ်းၶၢႆ ၼႂ်းႁၢၼ်ႉထႅင်ႈ 6 လုၵ်ႈ။ ၵႃႈၶၼ်ဢၼ်လႆႈ လူႉသုမ်း တႄႉတႄႉ ဢမ်ႇပႆႇႁူႉၶႃႈ။ၵတ်ႉၵႃႈဢေႃႈ ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး ”- ဝႃႈၼႆ။
ၼႂ်းၸႄႈဝဵင်းၼွင်ၶဵဝ်ၼႆႉ ဝၢႆးသေ သိုၵ်းမၢၼ်ႈ ယိုတ်းမိူင်း လွင်ႈၸူၼ်ၶဝ်ႈႁၢၼ်ႉၾူၼ်းၼႆႉ မီးသွင်ပွၵ်ႈ ပႃးပွၵ်ႈၼႆႉယဝ်ႉ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈသင်။
“ ၼႂ်းဝဵင်းၼွင်ၶဵဝ်ၼႆႉ ၵူၼ်းၼုမ်ႇ သူႇသမ်းၵိၼ်ယႃႈမဝ်းၵမ် ၸိူဝ်းၼႆႉၵေႃႈ မီးၼမ်ၼႃႇၶႃႈ ယၢမ်းလဵဝ်ၼႆႉ”- ၵူၼ်း ၼွင်ၶဵဝ် သိုပ်ႇလၢတ်ႈၼႄ ၼင်ႇၼႆ။
ဝၢႆးသေ သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၽူႈလၵ်ႉၵူၼ်းၸူၼ် ၼႂ်းၸႄႈဝဵင်းၼွင်ၶဵဝ်၊ ၵူၼ်းသူႇသမ်းၶၢႆ ယႃႈမဝ်းၵမ်ၵေႃႈ လိူင်ႇၼမ် မႃး လိူဝ်ၵဝ်ႇထႅင်ႈ။ ၵၢၼ်ႁႃၵိၼ်လဵင်ႉတွင်ႉၵေႃႈ ယၢပ်ႇၽိုတ်ႇၵိၼ်းၸႂ်ႁႅင်း။ ၵၢၼ်ၵႃႉၶၢႆဢမ်ႇပဵၼ်။ တၢင်းပဵၼ်ၶူဝ်ႊဝိတ်ႉ/ ဢူဝ်ႊမၢႆႊမရွၼ်ႊ ၵေႃႈ တိတ်းၸပ်းၼမ်ထႅင်ႈ ၵူၼ်းပိုၼ်ႉတီႈ ၼွင်ၶဵဝ်လၢတ်ႈ။
