ဝၼ်းတီႈ 22-25/2/2022 ၼႆႉ ပၢင်တိုၵ်းသိုၵ်းမၢၼ်ႈလႄႈ တပ်ႉၽွမ်ႉႁူမ်ႈဢူၺ်းလီ PDF ၾၢႆၶုၼ် – မိူင်းပၢႆး လႅၼ်ၶႅၼ်ႈ မိူင်းတႆး မိူင်းယၢင်းလႅင် ၶိုၼ်းပိုတ်းယိုဝ်းၵၼ်ႁၢဝ်ႈႁႅင်း ၊ ၵူၼ်းမိူင်းဢွၼ်ၵၼ်ပၢႆႈၽေးသိုၵ်း ႁွတ်ႈထိုင် ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ထႅင်ႈႁူဝ်ၵူၼ်း 2 ႁဵင်ပၢႆ ။
ၵူၼ်းဝဵင်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၼမ် ဢၼ်ပၢႆႈမႃးတႄႉ ပဵၼ်ၵူၼ်းဝၢၼ်ႈလွႆလႅမ်ဢွၼ်ႇ ၸႄႈဝဵင်းလွႆၵေႃႇ မိူင်းယၢင်း လႅင်။ ယွၼ်ႉဝႃႈ မၢၵ်ႇလူင်တူၵ်းသႂ်ႇ ၼႂ်းဝၢၼ်ႈၶဝ် ၵူၼ်းလူႉတၢႆၵေႃႈမီး ။ ဢၼ်ပၢႆႈမႃးၼႆႉ ပႃးတင်းၵူၼ်းဝၢၼ်ႈလွႆလႅမ်ဢွၼ်ႇလႄႈပႃးတင်းၵူၼ်းပၢႆႈၽေးသိုၵ်းဢၼ်လုၵ်ႉတၢင်ႇတီႈမႃးသွၼ်ႈဝႆႉတီႈဝၢၼ်ႈၶဝ်ၼၼ်ႉယဝ်ႉၶႃႈ။ ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်မႃး တီႈၸႄႈဝဵင်းသီႇသႅင်ႇၵမ်းၼႆႉၼႆႉ မၢင်ၵေႃႉပဵၼ်ၵူၼ်းပၢႆႈမႃးၵမ်းတီႈ 2။ ၽွင်းပၢင်တိုၵ်းၵမ်းတီႈ 1 လိူၼ်ပူၼ်ႉမႃးၼႆႉ ၸိူဝ်းၶဝ် ပၢႆႈမႃးတီႈသီႇသႅင်ႇယဝ်ႉၵမ်းၼိုင်ႈ။ ငဝ်းလၢႆးၼႂ်းပိုၼ်ႉ တီႈၼိမ် ယဵၼ်ယဝ်ႉၼႆသေ ၶိုၼ်းဢွၼ်ၵၼ်ပွၵ်ႈမိူဝ်း ယူႇဢမ်ႇတၢၼ်းႁိုင် ယၢမ်းလဵဝ်သမ်ႉ ၶိုၼ်းလႆႈပၢႆႈဢွၵ်ႇမႃး ၶိုၼ်း။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၵူၼ်းဝၢၼ်ႈတၢင်း တိုဝ်ႉၸၢႆးၶႃး(ထီစဲခါးကျေးရွာ) ၶႃႈဢေႃႈ ဢၼ်ပွၵ်ႈမႃးၵမ်းတီႈ 2 ၼႆႉ။ လႆႈႁၢင်ႈႁႅၼ်းတမ်းဝၢင်းပၼ်တီႈယူႇလႄႈ လွင်ႈၵိၼ်ယႅမ်ႉပၼ်ယဝ်ႉၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း တီႈၸႄႈဝဵင်းသီႇသႅင်ႇၼႆႉ ၶိုၼ်းၼမ်မႃးသေတႃႉ ၸဝ်ႈတႃႇၼ ၽူႈၵမ်ႉၸွႆႈသမ်ႉ ဢမ်ႇပေႃးမီးလိူင်ႇလိူဝ်၊ ပေႃးပၢင်တိုၵ်းတေသိုပ်ႇပဵၼ်ၶၢဝ်းယၢဝ်းတႄႉ တေမီးလွင်ႈယၢပ်ႇၽိုတ်ႇတႃႇၵိၼ်တႃႇယူႇ ၽူႈၸွႆႈထႅမ် ၵူၼ်းပၢႆႈၽေး သိုၵ်း သီႇသႅင်ႇလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ