တပ်ႉသိုၵ်းထႆး ၸတ်းပၢင်ၾိုၵ်းသွၼ် လၢႆးၸတ်းပွင်ၵၢၼ်ၽုၵ်ႇသွမ်ႈ ပိူဝ်ႈယုၵ်ႉမုၼ်းၵၢၼ်ၽုၵ်ႇသွမ်ႈၼႂ်းၸိုင်ႈမိူင်း။
ဝၼ်းတီႈ 07 – 14/03/2018 တပ်ႉသိုၵ်းထႆးပဵၼ်ၵဝ်ႉၵၼ်းသေ ၸတ်းႁဵတ်းပၢင်သွၼ် လၢႆးၸတ်းပွင်ၵၢၼ်ၽုၵ်ႇသွမ်ႈ၊ လႅၵ်ႈလၢႆႈတၢင်းႁူႉၵၼ်၊ လွၵ်းလၢႆးၽုၵ်ႇၶဝ်ႈႁႂ်ႈဢွၵ်ႇၼမ်ၸိူဝ်းၼႆႉ ၸတ်းႁဵတ်းတီႈဢိူင်ႇၶူႊၶူတ်ႊ ၸႄႈဝဵင်းလမ်ႊလုၵ်ႊၵႃႊ ၸႄႈတွၼ်ႈပထုမ်းထႃႊၼီႊ ၸိုင်ႈထႆး ၽူႈၶဝ်ႈႁူမ်ႈ 14 ၵေႃႉ ။
Maesainews ပိုၼ်ၽၢဝ်ႇဝႃႈ – ယိူင်းဢၢၼ်းဢၼ်ၸတ်းႁဵတ်းၼႆႉ ပိူဝ်ႈသၢင်ႈလွင်ႈမိုတ်ႈၵိုဝ်းၸမ်ၸႂ်မိူင်းႁူမ်ႈတုမ်မၢၼ်ႈလႄႈ မိူင်းထႆး ၊ ႁႂ်ႈၸၢင်ႈႁူမ်ႈမိုဝ်းပူၵ်းပွင်ၵၢၼ်ၽုၵ်ႇသွမ်ႈ၊ ႁႂ်ႈမီးလွင်ႈၵႂႃႇမႃးၶဝ်ႈဢွၵ်ႇၵၼ် ၸဵမ်ၸိူဝ်းၼႆႉ။
လိူဝ်ၼၼ်ႉၼႂ်း ဝၼ်းတီႈ 12 /03/2018 ၸွမ်သိုၵ်းလူင် ထၢၼ်ႊၶျႆႊယၼ်ႊ သီႊသူႊဝၼ်ႊ ၽူႈၵွၼ်းသိုၵ်းထႆးသုင်သုတ်း ႁူပ်ႉထူပ်းၸုမ်းၽွင်းလူင်မိူင်းမၢၼ်ႈလႄႈ ၸုမ်းတူင်ႉၼိုင်ၾၢႆႇၵၢၼ်ၽုၵ်ႇသွမ်ႈ ဢၼ်မႃးၶိုၼ်ႈပၢင်သွၼ်ၵၢၼ် ၽုၵ်ႇသွမ်ႈ ၼႆယဝ်ႉ။
ပၢင်ၾိုၵ်းၽွၼ်ႉ လၢႆးပူၵ်းပွင်ၵၢၼ်ၽုၵ်ႇသွမ်ႈၼႆႉ ယူႇတီႈတပ်ႉသိုၵ်းထႆး ၸတ်းႁဵတ်းမႃး 8 ၸုပ်ႈ ႁူမ်ႈၵူၼ်းဢၼ်လႆႈၶဝ်ႈႁူမ်ႈ 73 ၵေႃႉ ၸုပ်ႈၼႆႉပဵၼ်ၸုပ်ႈတီႈ 9 ယဝ်ႉ ဝႃႈၼႆ ။