ဝၼ်းတီႈ 22/02/2022 မိူဝ်ႈၽုၵ်ႈၼႆႉ ပဵၼ်ဝၼ်းဢၼ်မီး တူဝ် 2 ႁူၵ်းတူဝ်လႄႈ တႃႇမၢႆတွင်းဝၼ်းၼႆႉသေ ၵူၼ်းၼုမ်ႇ ၵူၼ်းမိူင်းမၢၼ်ႈဢွၼ်ၵၼ် ပိုၼ်ၽၢဝ်ႇႁူၺ်းသူၼ်းၵၼ်ၼိူဝ် Social Media (Facebook/ Online) ဝႃႈတေႁဵတ်း “စည်ကားသပိတ်” ပၢင်ၼႄၵၢင်ၸႂ်ၵိုၼ်းၶွၼ်ႈ ။
ၼႂ်းလိၵ်ႈပိုၼ်ၽၢဝ်ႇၼၼ်ႉ တႅမ်ႈဝႆႉဝႃႈ ဝၼ်း 2 ႁူၵ်းတူဝ် မိူဝ်ႈၽုၵ်ႈၼႆႉ ႁႂ်ႈၵူၼ်းမိူင်း ဢွၵ်ႇႁိူၼ်း ၊ ၵႂႃႇၶွၼ်ႈၵၼ်တီႈတၢင်းၶွႆႈ တၢင်းလူင်၊ ဢွၼ်ၵၼ်တိုဝ်းၵုပ်း တိုဝ်းမူၵ်ႇႁူဝ်၊ တႃးၼႃႈသၼၢပ်ႈၶႃး၊ ဢွၼ်ၵၼ်ယိပ်းမွၵ်ႇ ၼႄၵၢင်ၸႂ်သၢၼ်ၶတ်း သိုၵ်းယိုတ်းမိူင်း ။ သင်ဝႃႈ ငဝ်းလၢႆးလီ ၊ ဢမ်ႇမီးသိုၵ်း ဢမ်ႇမီးပလိၵ်ႈ ပႂ်ႉႁူမ်ႇလူမ်ႈၸိုင် ႁႂ်ႈပူၵ်းမိုဝ်းသၢမ်ၼိဝ်ႉ သႅၼ်ႇပၢဝ်ႇသၢၼ်ၶတ်းသိုၵ်းမၢၼ်ႈ။ ပေႃးထိုင်ယၢမ်းၵၢင်ၶမ်ႈ 8 မူင်း ႁႂ်ႈဢွၼ်ၵၼ်တွႆႇမေႃႈတွႆႇပုင်းလဵၵ်း လိုပ်ႈၽီႁၢႆႉ ၵူၼ်းမိူၵ်ႈ၊ လိုပ်ႈသိုၵ်းမၢၼ်ႈ ယိုတ်းမိူင်း ဝႃႈၼႆ။
ၵူၼ်းၼုမ်ႇ ၽူႈယၢမ်ႈၶဝ်ႈႁူမ်ႈ ၼႄၵၢင်ၸႂ် ၽွင်းပၢင်ၼႄၵၢင်ၸႂ်ပူၼ်ႉမႃးၸိူဝ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈပီပူၼ်ႉ ဝၼ်းတီႈ 2 ႁႃႈတူဝ်ၼၼ်ႉ ႁဝ်းၶႃႈ ၸူႉတုမ် ၵၼ် ဢွၵ်ႇၼႄၵၢင်ၸႂ်။ ဢၼ်ၼၼ်ႉတႄႉ လႆႈဝႃႈၼႄၵၢင်ၸႂ် တင်းဝၢၼ်ႈ/ မိူင်း။ ၵူၼ်းၵေႃႈ တေမီးၼပ်ႉႁူဝ်မိုၼ်ႇ/ သႅၼ်။ တႄႇၵၢင်ၼႂ်ၸဝ်ႉ တေႃႇ ပေႃး ထိုင်ၵၢင်ၶမ်ႈ ၼႄတင်းဝၼ်း ။ ၵၢင်ၶမ်ႈမႃးၵေႃႈ တွႆႇမေႃႈဝၢၼ်ႇ သဵင်ပၼ်းတင်းမိူင်း။ တေမီးလၢႆတွၼ်ႈဝႆႉ လၢႆးႁဝ်းၶႃႈ ၼႄ ၵၢင်ၸႂ်ၼႆႉ”- ဝႃႈၼႆ။
ပီၼႆႉတႄႉ တႃႇတေၶွၼ်ႈတုမ်ၵၼ် ဢွၵ်ႇ ၼႄၵၢင်ၸႂ် သၢၼ်ၶတ်း မိူၼ်မိူဝ်ႈပီ ၵၢႆ 2021 ပူၼ်ႉမႃးတေဢမ်ႇငၢႆႈ။ တေလႆႈဢဝ်လၢႆးႁူလႅတ်းတႃလႅတ်းသေ ၼႄၵၢင်ၸႂ်ၵႂႃႇၵူၺ်းယဝ်ႉဝႃႈၼႆ ။
“ ပီၼႆႉ ၶွၼ်ႈတုမ်ၵၼ်ယၢပ်ႇ တႃႇတေၼႄ ၵၢင်ၸႂ်ၵေႃႈ ဢမ်ႇလွတ်ႈလႅဝ်း မိူၼ်ပီၵၢႆ။ တႃႇတေႁွင်ႉသႅၼ်ႇ ၵေႃႈတေယၢပ်ႇ ။ တေလႆႈဝႃႈ ပီၼႆႉ မီးတၢင်းယၢပ်ႇလၢႆလၢႆလွင်ႈ”- ၵူၼ်းၼုမ်ႇ သိုပ်ႇလၢတ်ႈၼႄၼင်ႇၼႆ။
ၼႂ်းပီ 2021 လိူၼ်ၾႅပ်ႊပိဝ်ႊရီႊ 2 ဝၼ်း ၽွင်းသိုၵ်းမၢၼ်ႈတိုၵ်ႉတႄႇယိုတ်းဢႃႇၼႃႇဝၢၼ်ႈမိူင်းယဝ်ႉပႆႇတဵမ်လိူၼ် ၊ ၵူၼ်းမိူင်း ဢွၵ်ႇၼႄၵၢင်ၸႂ် ၸွမ်းတၢင်းလႆႈလွတ်ႈလႅဝ်း။ တပ်ႉသိုၵ်း မၢၼ်ႈၵေႃႈ ပႆႇလူင်းမိုဝ်းႁဵတ်းႁၢႆႉမိူၵ်ႈလိူင်း တေႃႇၵူၼ်းမိူင်းႁႅင်းလႄႈ ၵူၼ်းၼုမ်ႇၵူႈၸႄႈဝဵင်း လုၵ်ႉႁိုၼ်ႇၼႄၵၢင်ၸႂ်ၵၼ်မႃး လႆႈလီငၢမ်း ။ ယၢမ်းလဵဝ်တႄႉ သိုၵ်းမၢၼ်ႈ ဢမ်ႇဝႆႉၼႃႈၽႂ် ၊ တီႉၺွပ်း ၶႃႈႁႅမ်ၵူၼ်းၵူႈသႅၼ်းပၢၼ် ၵူႈၸၼ်ႉထၢၼ်ႈ ဢၼ်ၶတ်းၶႂၢင်ဢႃႇၼႃႇၶဝ်။
ၵူၼ်းၼုမ်ႇသႅၼ်းပၢၼ်မႂ်ႇလၢတ်ႈဝႃႈ- သိုၵ်းမၢၼ်ႈဢမ်ႇမီးၸႂ်ထမ်းတြႃးသင်သေဢိတ်းလႄႈ ၽိူဝ်ႇတႃႉတၢႆတႂ်ႈမိုဝ်းၶဝ် လွၵ်ႇလွၵ်ႇလၢႆလၢႆၼၼ်ႉ တႃႉသိုပ်ႇမီးသၢႆၸႂ်ၶီး သိုပ်ႇတေႃႇသူႈ ၵႂႃႇထႅင်ႈတေႃႇပေႃးဢွၵ်ႇပူၼ်ႉလွတ်ႈ တႂ်ႈမိုဝ်း ၸဝ်ႈဢႃႇၼႃႇသိုၵ်း ဝႃႈၼႆ။
ၸူဝ်ႈ သိုၵ်းမၢၼ်ႈ ယိုတ်းမိူင်းမႃးၶၢဝ်းတၢင်း ပီပၢႆ တေႃႇထိုင် ဝၼ်းတီႈ 18/2/2022 ၼႆႉ ၸႂ်ႉလၢႆးႁုၵ်ႉႁၢႆႉသေ ၶႃႈႁႅမ်တၢႆ ၵူၼ်းမိူင်းၵႂႃႇယဝ်ႉ 1,560 ၵေႃႉ၊ တီႉၺွပ်း 12,228 ၵေႃႉလႄႈ ၸွႆးတြႃးဝႆႉ 1,973 ၵေႃႉ ယူႇတီႈ AAPP ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
