မိူဝ်ႈၼႆႉ 19/2/2022 ယၢမ်းၵၢင်ၼႂ်မွၵ်ႈ 10 မူင်း သဵင်ၵွင်ႈတႅၵ်ႇႁိမ်းဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ၵူၼ်းမိူင်း တူၵ်းၸႂ် ၼႅတ်ႈဢဝ်ၶူဝ်းၶွင် သွင်ႉပၢႆႈထိုင်ဝဵင်းပၢင်လူင်။
ၵူၼ်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉပဵၼ် တီႈၼမ်ႉၶွႆႈ ႁိမ်းဝၢၼ်ႈၼမ်ႉၵတ်း ဢိူင်ႇထုင်ႉယိူင်းၼႆဢေႃႈ။ ၵွပ်ႈၼႆလႄႈ ပီႈၼွင်ႉၵူၼ်းဝၢၼ်ႈ ၸိူဝ်းမီးႁိမ်းႁွမ်း ဝၢၼ်ႈၼမ်ႉၵတ်းၸိူဝ်းၼၼ်ႉတႄႉ ဢွၼ်ၵၼ်ပၢႆႈလူင်းမႃးပၢင်လူင်ၶႃႈဢေႃႈ ။ ယၢမ်းလဵဝ်တႄႉ တိုၵ်ႉ ဢွၼ်ၵၼ်မႃးလိုဝ်ႈသဝ်း ႁိူၼ်းယေးပီႈၼွင်ႉၽႂ်မၼ်း ၵူၺ်းၶႃႈ ။ ပႆႇထိုင်တီႈလႆႈ ႁၢင်ႈႁႅၼ်းတီႈယူႇတၼ်းသဝ်းပၼ်ႁင်းၶေႃ ၼင်ႇၵဝ်ႇၶႃႈ”- ဝႃႈၼႆ။
ၵူၼ်းဝၢၼ်ႈၸိူဝ်းပၢႆႈမႃးထိုင်တီႈဝဵင်းပၢင်လူင် မိူဝ်ႈၼႆႉ ၵမ်ႈၼမ်ပဵၼ်ၵူၼ်းၼုမ်ႇလႄႈၽူႈယိင်း လုၵ်ႈဢွၼ်ႇ။ တီႈဝၢၼ်ႈတႄႉ ၵိုတ်းၵူၼ်းထဝ်ႈ ယူႇပႂ်ႉၵူၺ်းယဝ်ႉဝႃႈၼႆ။
“ မီးၶၢဝ်ႇဝႃႈ ပိူၼ်ႈႁွင်ႉပၢင်ၵုမ်တၢင်းမိူင်းလၢင်းၼႆႉ ပေႃးၶဝ်လူင်းမႃးႁၼ်ဝႃႈ ႁိူၼ်းလႂ်ဢမ်ႇမီးၵူၼ်းယူႇ၊ ႁိူၼ်းလႂ်ပၢႆႈမူတ်းၼႆ တေၽဝ်ၼႆၶႃႈၼႃႇ ၵွပ်ႈၼႆ ၵႃႈလႆႈဝႆႉၵူၼ်းယူႇႁိူၼ်းဢေႃႈ ”- ၵူၼ်းၼုမ်ႇ ဢၼ်ပၢႆႈထိုင်ဝဵင်းပၢင်လူင် လၢတ်ႈၼင်ႇၼႆ။
သိုၵ်း SSPP လႄႈ RCSS ပိုတ်းယိုဝ်းၵၼ် တၢင်းၸႄႈဝဵင်းလွၵ်ႉၸွၵ်ႇ၊ လူင်းမႃးတၢင်း ၸႄႈဝဵင်းႁူဝ်ပူင်း ယၢမ်းလဵဝ် ထိုင်မႃးတၢင်း ဢိူင်ႇထုင်ႉယိူင်း ။ ၵူၼ်းမိူင်းထုင်ႉယိူင်းၵမ်ႈၽွင်ႈ ပၢႆႈဢွၵ်ႇဝၢၼ်ႈၸဵမ်မိူဝ်ႈဝႃး ဝၼ်းတီႈ 18 ။
ၵူၼ်းမိူင်းၵျွၵ်ႉမႄး 500 ပၢႆ ဢၼ်ပၢႆႈၽေးသိုၵ်းလူင်းမႃးထိုင် ၸႄႈဝဵင်းႁူဝ်ပူင်းၼၼ်ႉၵေႃႈ ယၢမ်းလဵဝ် ထိုင်ဝဵင်းတူၼ်ႈတီးမူတ်းယဝ်ႉ ။