ၾင်ႇမိူင်းၶႄႇ ဢမ်ႇႁပ်ႉသိုဝ်ႉတႅင်တဝ်ႈ/ တႅင်ၸမ်ႇပူႇလႄႈ ၸဝ်ႈသူၼ်လႆႈၵိုတ်းယင်ႉလိုဝ်ႈ လွင်ႈ ၽုၵ်ႇသွမ်ႈတႅင်။
ၽွင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼႂ်းမိူင်းႁူမ်ႈတုမ် ပွၵ်ႈၵမ်း 3 ၼႆႉသေ ၾင်ႇမိူင်းၶႄႇ ပိၵ်ႉဢိုတ်းၽၵ်းတူလႅၼ်လိၼ်တႆး – ၶႄႇ ၼႂ်းၸိုင်ႈတႆးပွတ်းႁွင်ႇ ပွတ်းၸႄႈဝဵင်းမူႇၸေႊ – ၼမ်ႉၶမ်း ၸိူဝ်းၼႆႉ ႁဵတ်းႁႂ်ႈၵူၼ်းမိူင်းၸိူဝ်းသူင်ႇၶူဝ်းၵုၼ်ႇၶဝ်ႈတၢင်းမိူင်းၶႄႇ ထူပ်းတၢင်းယၢပ်ႇ ၽိုတ်ႇၵူၺ်းဢမ်ႇၵႃး ယဝ်ႉၵေႃႈ ၸဝ်ႈသူၼ်တႅင်ၸိူဝ်းၼႆႉၵေႃႈ ထိုင်တီႈပေႃးလႆႈၵိုတ်းယင်ႉၵၢၼ်ၽုၵ်ႇသွမ်ႈ ။
ၸဝ်ႈသူၼ်တႅင် ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်း ၶႃႈ လႆႈဢဝ်ၼႂ်းထူင်ၼႂ်းထွင်းႁဝ်းသေ ဢွၵ်ႇႁဵတ်းမူတ်းမူတ်းလႄႈ ယူႇ ၾၢႆႇ ႁဝ်းတႄႉ သုမ်းတိၵ်းတိၵ်းယဝ်ႉၶႃႈ ။ ႁဵတ်းဢဝ်တင်းႁိူဝ်ႉမၼ်းၵူၺ်းၶႃႈယဝ်ႉ။ ၵွပ်ႈပိူဝ်ႈၼႆ လႄႈ ၵူၼ်းၽုၵ်ႇသွမ်ႈတႅင်ႁူပ်ႉတၢင်းယၢပ်ႇၽိုတ်ႇႁႅင်းၼႃႇၶႃႈ”- ဝႃႈၼႆ။
ယၢမ်းလဵဝ် ၸဝ်ႈသူၼ်တႅင်ၵမ်ႈၼမ် လႆႈၶိုၼ်းၽုၵ်ႇၶဝ်ႈၵၢပ်ႇ ၶဝ်ႈၽႃႉ တႅၼ်းသေတႃႉ တႃႇတေတေႃႉၶၢႆၵေႃႈ တိုၵ်ႉမီးတၢင်းယၢပ်ႇၽိုတ်ႇယူႇ။ ၵွပ်ႈၼႆလႄႈ ယူႇတီႈၸဝ်ႈသူၼ်တႅင်တဝ်ႈတႄႉ မုင်ႈမွင်းႁႂ်ႈဝၢၼ်ႈမိူင်းၸဵဝ်းလီ ႁႂ်ႈၸဵဝ်းလႆႈသူင်ႇၶၢႆလႄႈ လႆႈၽုၵ်ႇသွမ်ႈတႅင်ၶိုၼ်း။
“ႁဝ်းၶႃႈတႄႉ မုင်ႈမွင်းႁႂ်ႈဝၢၼ်ႈမိူင်းၸဵဝ်းလီ လွင်ႈၵႂႃႇမႃးၵေႃႈႁႂ်ႈငၢႆႈလူမ်ၸႂ် ပေႃးယင်းဝႃႈ ငဝ်းလၢႆး မၼ်းလီ လႆႈၶိုၼ်းၶၢႆတီႈ 105 လၵ်းယူႇ ၼႆ တႄႉ ၼႂ်းတိၼ်ၼႂ်းမိုဝ်းဢမ်ႇမီးၵေႃႈ တိုၼ်းဝႃႈ တေႁႃ ၵူႈယိမ်ပီႈၼွင်ႉသေ လူင်းတိုၼ်းလၢင်းၽုၵ်ႇသွမ်ႈႁဵတ်းၵႂႃႇၶႃႈ။ ပေႃးဢမ်ႇလႆႈၶၢႆတီႈ 105 လၵ်းတႄႉ ဢမ်ႇမုင်ႈမွင်းၶႃႈယဝ်ႉ။ ၼၵ်းၸႂ်ၼၵ်းၶေႃးၵူၺ်း သုမ်းၵႂႃႇၸွမ်းမၼ်းၵေႃႈ ၼမ်ၼႃႇယဝ်ႉ”- ၸဝ်ႈ သူၼ်တႅင် ဝဵင်းလႃႈသဵဝ်ႈ သိုပ်ႇ လၢတ်ႈၼႄၼင်ႇၼႆ။
ယၢမ်းလဵဝ် ၵႃႈတၢင်ႇတႅင် ဢၼ်ၶဝ်ႈလႆႈၼႂ်းမိူင်းၶႄႇၵေႃႈ ၼိုင်ႈဝၼ်းလႂ် ၶဝ်ႈလႆႈမွၵ်ႈ 10 လမ်းပၢႆ ၸဝ်ႈၵႃးတၢင်ႇတႅင်မၢင်ၸိူဝ်း လႆႈပိၼ်ႇႁူဝ် ရူတ်ႉမႃးၶိုၼ်းၵေႃႈမီးတင်းၼမ်။ မၢင်ၸိူဝ်းၵေႃႈ ဢမ်ႇမႃး ထွၵ်ႇပႅတ်ႈၸွမ်းသဵၼ်ႈတၢင်းၵူတ်ႉၶၢႆ ဝဵင်းမူႇၸေႊ ၸိူဝ်းၼႆႉၵေႃႈ မီးထႅင်ႈတင်းၼမ်။ တႃႇတေတေႃႉသူင်ႇၶူဝ်း ၶဝ်ႈဢွၵ်ႇၼႂ်းမိူင်းၶႄႇၵေႃႈ တေလႆႈဢဝ်ငိုၼ်းၶႄႇသႂၢင်းၶွၼ်ႇလႄႈ ၼႆႉၵေႃႈ ႁဵတ်းႁႂ်ႈၸဝ်ႈၵုၼ်ႇၸဝ်ႈၵႃးၶဝ် ထူပ်းတၢင်း ယၢပ်ႇၽိုတ်ႇပႃးထႅင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ