မိၼ်းဢွင်ႇလၢႆႇ ႁွတ်ႈၵဵင်းတုင်  သိုၵ်းမၢၼ်ႈၶဵင်ႈၶႅင်လွင်ႈႁူမ်ႇလူမ်ႈၵၢင်ဝဵင်း

ၽူႈၼမ်းၸုမ်းသိုၵ်းယိုတ်းဢႃႇၼႃႇ ၸွမ်ၸိၵ်းသိုၵ်းလူင်မိၼ်းဢွင်ႇလၢႆႇ ႁွတ်ႈထိုင်ဝဵင်းၵဵင်တုင်  တၢင်ႇထီးထၢတ်ႈ မႁႃမုၼိ ၽြႃးရၶႅင်ႇၵၢင်ဝဵင်း မၢႆတွင်းတဵမ် 100 ပီ   ၸွမ်းၵၢင်ဝဵင်းမီးသိုၵ်းမၢၼ်ႈပလိၵ်ႈမၢၼ်ႈ ၶဵင်ႉၶႅင်လွင်ႈႁူမ်ႇလူမ်ႈ  ႁၢဝ်ႈႁႅင်း။  

မိူဝ်ႈၼႆႉ ဝၼ်းတီႈ 15/2/2022 ယၢမ်းၵၢင်ၼႂ် မိၼ်းဢွင်ႇလၢႆႇ   မႃးပွႆးတၢင်ႇထီးထၢတ်ႈ 100  ပီတဵမ် ၵျွင်း ၽြႃးလူင် (ဝတ်ႉၽၸဝ်ႈလူင်/ ၽြႃးရၶႅင်ႇ/ ၽြႃးမႁႃမုၼိ) ၵၢင်ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၸွမ်းၵၢင်ဝဵင်းၸိူဝ်းၼႆႉ ၸဵမ်သိုၵ်းမၢၼ်ႈ၊ ပလိၵ်ႈမၢၼ်ႈ ပႂ်ႉဢဝ်ႁူမ်ႇလူမ်ႈ ၶဵင်ႈၶႅင် ႁၢဝ်ႈႁႅင်းတင်းၼမ်လၢႆ။

ၵူၼ်း  လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၼႆႉ ၵၢင်ၼႂ် 7 မူင်းၶိုင်ႈၼႆႉ ပွႆးတၢင်ႇထီး ၽြႃးလူင် ၵၢင်ဝဵင်းၵဵင်းတုင်တႄႉ တၢင်ႇယဝ်ႉၵႂႃႇ ယဝ်ႉ။ ၸွမ်းႁိမ်းႁွမ်းဝတ်ႉၽြႃးလူင်ၼၼ်ႉတႄႉ ပဵၼ်ၵႃး သိုၵ်းမၢၼ်ႈ၊ ပလိၵ်ႈမၢၼ်ႈ၊ ၾၢႆႇၶႄၾႆးလႄႈ ၸုမ်းပျီႇတူႉၸိတ်ႉ ၸိူဝ်းၼႆႉ ပႂ်ႉဢဝ်ႁူမ်ႇလူမ်ႈ တင်းၼမ်ၶႃႈယဝ်ႉ။ ယဝ်ႉၵေႃႈ ဢွင်ႈတီႈဝတ်ႉၽြႃးလူင် ၵၢင်ဝဵင်းၼၼ်ႉ ၶဝ်တိုၼ်းဢမ်ႇပၼ်ၵူၼ်းၶဝ်ႈဢွၵ်ႇ  ၶဝ်ပႂ်ႉႁူမ်ႇလူမ်ႈၸိူဝ်းၼၼ်ႉ မီးမႃးၶၢဝ်းတၢင်း 2-3 ဝၼ်းၼႆႉယဝ်ႉ”- ဝႃႈၼႆ။

ဝၢႆး ယိုတ်းမိူင်းမႃး ၶၢဝ်းတၢင်း ပီပၢႆၼႆႉ မိၼ်းဢွင်ႇလၢႆႇ   မႃးႁွတ်ႈထိုင် ဝဵင်းၵဵင်းတုင်  မီး 2 ပွၵ်ႈ ပႃးပွၵ်ႈၼႆႉယဝ်ႉ။ မိူဝ်ႈဝႃး ဝၼ်းတီႈ 14 ၼႆႉ မိၼ်းဢွင်ႇလၢႆႇ ၵႂႃႇဢႅဝ်ႈယႅမ်ႈတူၺ်း တီႈဝဵင်းလွႆမူၺ်။

“ဢၼ်မၼ်းမႃးပွၵ်ႈၼႆႉ ဢမ်ႇလႆႈႁူႉၸွမ်းၶပ်ႉမၢႆမၼ်းလီလီ တေၵႂႃႇတီႈလႂ် ၸိူဝ်းၼႆႉ။ မိူဝ်ႈဝႃးတႄႉ ၵႂႃႇလွႆမူၺ်၊ မိူဝ်ႈၼႆႉလႅပ်ႈတေၵႂႃႇ သူၼ်ပုတ်ႉထဢူးယဵၼ်ႇၶႃႈယူဝ်ႉ။ ယဝ်ႉၵေႃႈ လွင်ႈမၼ်းမႃးၵမ်းၼႆႉ ဢမ်ႇလႆႈႁၼ်ၵႃးဢဝ်ႁူမ်ႇလူမ်ႈ ၼႄတၢင်းၼႃႈၸိူဝ်းၼၼ် လႆႈႁူႉတႄႉ တဵတ်ႇတဵတ်ႇၵႂႃႇ /မႃး ၸိူင်ႉၼၼ်ၵူၺ်း၊ ၵူဝ်ဢမ်ႇမီးလွင်ႈႁူမ်ႇလူမ်ႈၶႃႈယူဝ်ႉ။ ထၢင်ႇတႄႉ မိူဝ်ႈၽုၵ်ႈ မၼ်းတေပွၵ်ႈယဝ်ႉယူဝ်ႉ”- ၵူၼ်း  ၵဵင်းတုင် လၢတ်ႈၼႄ ၼင်ႇ ၼႆ။

ၼွၵ်ႈလိူဝ်ၼၼ်ႉ ၸဵမ်ၸွမ်းၼွင်တုင် ၵၢင်ဝဵင်းၵဵင်းတုင်လႄႈ ၸွမ်းႁိမ်းႁွမ်း ႁေႃလူင်ၵဵင်းတုင် ဢၼ်ႁဵတ်းဝႆႉ ႁူင်းႁႅမ်း ၸိူဝ်းၼၼ်ႉၵေႃႈ ၾၢႆႇသိုၵ်း မၢၼ်ႈ တမ်းဝႆႉလွင်ႈႁူမ်ႇ လူမ်ႈၼႅၼ်ႈၼႃႇထႅင်ႈတင်းၼမ်။

ၵူၼ်းမိူင်းတႃႈၶီႈလဵၵ်းသမ်ႉမိူဝ်ႈၼႆႉ ၸတ်းပၢင်ၵၢဝ်ႇၵိၼ်ႇၸူး ၸွမ်ၸိၵ်းသိုၵ်း မိၼ်းဢွင်ႇလၢႆႇ ဢၼ်ႁဵတ်းႁၢႆႉမိူၵ်ႈမႂ်ႈတေႃႇၵူၼ်းမိူင်းၼၼ်ႉႁႂ်ႈတူၵ်းသုမ်းဝႆးဝႆး ဝႃႈၼႆ။

ပွႆး 100 ပီတဵမ်လႄႈ ပွႆးတၢင်ႇထီးထၢတ်ႈ ဝတ်ႉၽြႃးလူင် ၵၢင်ဝဵင်းၵဵင်းတုင်ၼႆႉ ဢၢၼ်းၸတ်းႁဵတ်းမိူဝ်ႈႁၢင်ပီ 2021 ။ ယွၼ်ႉတၢင်း ပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၵေႃႈပိူင်ၼိုင်ႈ၊ ငဝ်းလၢႆးၵၢၼ်မိူင်းသုၵ်ႉယုင်ႈၵေႃႈပိူင်ၼိုင်ႈလႄႈ ဢမ်ႇပဵၼ် ၸတ်းႁဵတ်းမႃး။